لٹ خانہ 56

”لَٹ خانہ“ نا نن و دیک مستی راہی روان ئسُر۔ ننکان غلام محمد شاہوانی، انجم قزلباش، خدائیداد، کمال خان شیرانی و بہادر خان ہراتم تینا علاقہ غاتیان کوئٹہ غا بسرہ ننا کچاری ٹی اوار مسرہ۔ حبیب اللہ و مستری محمد غوث تینا ٹھکانہ غاتیان بسرہ۔ محمد اکبر نوشیروانی، عبدالرزاق مدراسی و بھاز وخت غلام محمد شاہوانی نا ماما محمد حیات و ایلو ہمو ہمسائیک ہرافک نن تون ننا ہیت آتتون اُستخواہی تخارہ اوفک ہم ننا مجلس اٹی توسرہ۔ ہروڑ انا ہیت شغل شغال مخنگ ٹاکو لطیفہ ملنڈ مسخرا ننا مجلس آتیٹ مسکہ۔ نن گندہ انگا حالیت آتیا مسخرہ خلکنہ۔ مڑوئی اودے تیٹ نن تینے کوئٹہ نا کل آن خوش نصیب آ بندغ تکانہ۔ اگہ کہ مخلوق پد پُشت ننے آ مسخرہ کریکہ ننے گنوک پاریرہ۔ دافک بلوچستان نا منہ خوانندہ وسرکاری ملازم ئسُر ولے تینا مفت و مُبا تینا زندگی تے تباہ کریر ملازمت آتے یلہ کریر، داسہ بیکار توسنو۔ ایڑے مسرہ تو مخلوق کن گڑاس کاریم اس تو کریرہ:
فکرِ ہرکس، بد قدر ہمت اوست
سرکار و اونا کارندہ آک ننا رَند ءِ الیتوسہ و نن تینے اوفتیان اسل بے چکارکریسُن۔
چڑئی امر ءُ وئی اسے، ننے آ ہچ ءُ گڑتی اس بیٹ الّو، ”لونگ نا لاب ءِ کتونہ۔“ نئے چنا، نئے خاہوت، اُرا سیال و قریب، کس انا خیال اٹی اَلون۔ صحت ہم جوان ئس۔ دم دری نا پن ءِ تتونہ۔ نئے مونجا مسنہ نئے کہ تینا کڑد و کار آن پشوانی ئس۔ پُرعزم باہمت ئسُن۔
لَٹ خانہ ٹی ہراسٹ مجلس کچاری تون اوار جوان انگا کتاب، رسالہ، اخبار اسے نا خواننگ تون ہم مشغول خننگاکہ۔ دے آن طالبعلم غاک لٹ خانہ غا بسرہ۔ کتاب آتے خوانارہ پدی ایسرہ۔ اوفتا فکر ردوم ہلنگ ئس، ذہن سازی مننگ ئس۔ خیال و فکر اٹ ترقی پسندی، روشن خیالی نا چراغ ٹِک تننگ ئس، اوفتا شعور اٹی دیمروی و شونداری بننگ ئس۔
دا دور ہم عجب ءُ دور اس ئس۔ انقلاب، آزاتی نا تحریک آک، استعمار و سامراج، طبقاتی جہد، ہراڑے مخلوق ظلم وجبر انا برخلاف جنگ وجہد اس کننگ ئس، ننے اوفتتون غمخواری ئس، نن اوفتا بہادری ءِ سفت کرینہ۔
ننے آن خڑک ایران اٹی انقلابی جہد اٹ ترندی بسوسس۔ پروگریسو تپہ ٹی ہم ترندی اس خننگاکہ۔ ایران آن پروگریسو لٹریچر بننگ ئس۔ معلوم مس کہ شہشناہِ ایران ءِ ملک بدر کننگانے۔ جہدکارک اودے پیشن نَرّنگ آ مجبور کریر او اٹلی کن ہنا۔
ڈاکٹر مصدق نا ”تودہ پارٹی“ حزبِ جمہوریت ملی ایران داجہد کار تا راہشونی و رابلدی ءِ کننگ ئسُر۔
ڈاکٹرمصدق ’تودہ‘ وحزب پارٹی شہنشاہ ءِ ایران آن مِڑار۔ ڈاکٹر حسین فاطمی، ڈاکٹر مصدق نا کماشی ٹی وزیر خارجہ گچین کننگا۔ کل اسٹ مرسا دا فیصلہ کریرکہ ایران نا تیل انا مڈّی تے برطانیہ نا کمپنی تیان تینائی کین۔ حسین کاظمی دا دور اٹ سیاسی پڑ آ بھلو پن اس دوئی کریسس۔ سامراج نا زوراکی دے پہ دے آن زیات مننگ ئس۔ تیل سامراج و ایلو زوراک آتیٹ شہ رگ نا حیثیت ءِ تخاکہ۔ دادے امر اوفک دوآن بٹوسُر۔ داڑے ایران نا مخلوق عجب ءُ تُغ خننگ ئس۔ غریبی آن جان خلاسی نا تُغ، نا خوانندہی، بزگی، ناجوڑی ہروڑ انا دَین تیان آجوئی نا تُغ۔
یزدان و ہرمن نا جنگ تینا زورآ ئس۔ امریکہ نا سی آئی اے ہراکہ دا وخت و حالیت ءِ تباہ کننگ نا تاڑ اٹی ئس یکدم شاہ انا مخ تفی کن رسینگا۔ ڈلس ہراکہ سی آئی اے نا سوبرآ چالاخ آ سرخیل ئس۔ روم آ سرمس و ایران آن ملک بدر مروک آ شہنشاہ نا کوپہ غا دوتخسا پارے:
”نرینہ اس مر، نن نے تون تفوک اُن۔ دا انقلاب ءِ ہندن تباہ کین کہ کس پن ءِ تے ہم ہلپ۔“ گڑا سی آئی اے جائی ہندن کرے۔ ایران نا جنرل زاہدی ءِ پبی ءُ کمک اس کرے۔ سلہہ تون اوار ڈالر نا لوت آتے ہم بڈ ترسا پارے تے تہران نابازار اٹی لُنڈ لوفر، خونی، کاچو کَش، گنڈ کپ آتے پیسہ ایت یلہ کرتا، چاگڑد ءِ پراگندہ کیر۔ امن آشتی ءِ خاخر ایتر، چک و تاڑ کش وبگیر اس بَش کیر۔ ہراڑے دافک ترقی پسند، انسان دوست، الس نا خیرخواہی کروک ظلم انا مزاحمت کار وطن پرست اس خنار پڈ اَرّ کیر تے، روتینک آتے تے کَشر….
گُڑا ہنداوڑ مس۔ ایران نا بھلا شار تیٹ دتر تا جوک وہار۔ ڈلس جنرل زاہدی نا کمک اٹ تودہ ومصدق نا انقلاب ءِ بیران و تباہ کرے۔ حسین کاظمی ءِ عدالت اٹ کاچو اسے نا جلہو اٹ کسفیر۔ تودہ نا کماش کار وکارندہ غاتے تیران باران Firing Squad نا مون آ سُم تیٹ رگبار کرسا آخبتی کن چُٹفیر۔ تیویٰ پارٹی قیادت ءِ سرعام چوک اسے آ پاہو تننگا۔ ڈاکٹر محمد مصدق ءِ زندان اٹی بٹنگا او ہموڑے کزیت کرے۔
ڈاکٹر خدائیداد پین تو ہچ اس کننگ کتو۔ ارواح شاہ نا فوٹو ءِ ایرانی رسالہ اسے آن ہُرسا پنسل اسکیچ اٹ کشا و لَٹ خانہ نا دیوال آخلک۔
ہندادے تیٹ کوئٹہ نا اسہ ورنا اس ”نوائے وطن“ نا دفتر آ بس۔ دا ورنا امان اللہ بارکزئی (باران زئی) ئس۔ او بھاز ذہین و ہشار ءُ ورنا اس ئس۔ کنے سما تماکہ او بلوچ تاریخ نا پنی آ شخصیت سردار دوست محمد خان بارانزئی نا نواسہ ءِ۔ دانا باوہ نا پن محمد یعقوب خان ءِ۔ لمہ نا پارہ غان اسہ پین پنی ءُ بندغ اس کریم بخش سعیدی نا خوارزادہ ءِ۔ سعیدی نا ذکر قادربخش نظامانی و غوث بخش بزنجو نا حوال تون بسنے۔ ہندا وڑ یوسف علی مگسی نا ہم حوالہ ٹی سعیدی اوار ءِ، دا سند آک اودے سوبرکرینو۔ دا رشتہ غاتا سوب آن او باشعور و سیاسی گشاد نا خواجہ مس۔ ہچ سما تمتو کہ اودے ہراکان لٹ خانہ و نوائے وطن نا ڈس مِلّا۔
امان اللہ بارکزئی تہران یونیورسٹی ٹی بڑزکو کہولی تعلیم دوئی کننگ ئس، اوڑے محمد مصدق وحزبِ تودہ نا بے سہبی تا سوب آن اوتہران ءِ السا زہدان نا کسر اٹی کوئٹہ غا رسینگا۔ اوڑے اودے ہمو جاگہ نا خوانندہ غاتتون نوائے وطن نا گڑاس تاک رسینگاسُر۔ ہنداکان اودے نن تون ملنگ نا شغف مرو۔ امان اللہ بارکزئی نا ارادہ دا ئس کہ او داکان ٹائپ رائٹر اس دوئی کرسا اوغانستان نا سیم آن ایمون مرسا یورپ آ کاہے اوڑے تینا حزب انا سنگت آتتون اوار کاریم کے۔ ولے او دا مسخت اٹی سرسہب متو، نئے کس اونا کمک ءِ کرے۔ منہ وخت آن پد اودے کوئٹہ ٹی بلوچ آتا سنگتی ولٹ خانہ نا چاگڑد دوست بس۔ وخت اس کہ ای آزات جمالدینی، غلام محمد شاہوانی، سردار خان گشکوری تون اوار گشکوری نا بلوچ تاریخ نا رد اٹ نوشتہ مروک آ کتاب نا شینکاری نا بابت کراچی آ ہنان، تو اوڑ ے امان اللہ تون چندی وار ملان۔ او آزات جمالدینی نا بلوچی رسالہ توئی ”بلوچی“ نا دفتر آ بسکہ ہناکہ۔ دا رسالہ ٹی لکھاکہ ہم۔ سردار خان نا کمک اٹ بلوچ آتا پنی آ انقلابی لیڈر جمعہ خان تون ہم او درستی راستی مسوسس۔
دا دے تیٹ شاہِ ایران نا برخلاف بغداد اٹی بھلو تَک سُر اس مننگ ئس۔ ایران حکومت مخالف بلوچ آتیان ہم چندیک بغداد آ سر مسوسُر۔ ہرافتیٹ میر عبدی خان پنی ئس۔ ہرا امان اللہ و حاجی کریم بخش سعیدی نا خڑک سیال اس ئس۔ گڑا سردار خان، جمعہ خان و امان اللہ اسہ اودیم پروگرام اس جوڑار کہ داحالیت آن فائدہ ہرفنگے۔ جمعہ خان کراچی آن بغداد آ رسینگا۔ امان اللہ بارکزئی کسری شاہ ایران نا اودیم ایجنسی ساواک نا دوٹی بس، و دزگیر کننگا۔ اودے بھاز اذیت تننگا، اونا شخصیت ءِ ساواک مسخ کرے الا۔ خمینی نا انقلاب نا دے تیٹی امان اللہ اوکان نرسا کراچی آ سرمس۔ بھلو زمانہ اس کراچی ٹی مننگ آن گُڈ آخر ایران حکومت تون اونا خیر مس۔ کوئٹہ غان ایران تینا اُرا سراوان آ ہنا۔ داسکان ہمونگ ءِ چپی ٹی زندءِ گدریفنگ ءِ۔
مہالو ہم ذکر مسنے کہ اِرا مہروان ءُ اُستادِ محترم نا لٹ خانہ نا باتی تتون سنگتی اس مسنے۔ اسٹ اُستادِ محترم چوہدری عطاءمحمد صاحب ئس (دا او چوہدری عطاءمحمد اف ہرا سنڈیمن اسکول ٹیم انا ہاکی نا پنی آ گوازی گِر ئس۔ ہراکہ پدا محکمہ تعلیم اٹی ڈائریکٹر مس) دا چوہدری صاحب دے ٹکی پنجاب ’جالندھر‘ نا مہاجر اس ئس۔ او کوئٹہ ٹی ٹیچر ئس۔ اودے لٹ خانہ غان خڑک میکانگی روڈ اناگلی سے ٹی اُرا اس تننگاسس۔ دا مکان ہم ہمو ہجرت کروک آ بخال یا سکھ اسے نا ئس۔ ہرادے ہُشاسُر۔ دا ہُشنگوک آ اُرا ٹی مسہ چار فٹ انا بیرہ دیوال آک سلوک ئسُر۔ انتئے کہ تقسیمِ ہند آن مُست کوئٹہ نا زمی جمب آن پد داڑے زلزلہ پروف مکان جوڑ کننگا۔ لٹ خانہ نا وڑ دانا ہم پکا انگا خشت آتا اسہ خشتی دیوال اس جوڑسا دافتیا چادر خلسا نیام اٹ تا سرمٹ و کنکریٹ آن پُر کننگاسس۔ زی آ گتہ نا سیلنگ و چادرنا چھت اس ئس۔ دافتے ہم فساد نا وخت آ ہشاسُر۔ ہرافک بچاسُر اوفتے غریب مہاجر تے تننگا۔ چوہدری صاحب نا بشخ اٹ ہندا اُرا بس۔
چوہدری صاحب نا دا مہر آک ئسُر کہ اولٹ خانہ نا باتی تے کن ڈال، برنج و اِرغ نا مہمانی کریکہ۔ ای، خدائیداد و انجم اونا اُراٹی مہمانی کُنگنہ۔ اونا زیبا ءُ چنکو مسڑ اس ئس، ہرادے اوکاکی نا پن اٹ توار کریکہ۔ اونا اِرا مار ہم ئسُر، ہرافک خوانارہ۔ چوہدری صاحب ہر وخت لٹ خانہ غا بسکہ۔ او مبارکی نا ناجوڑی نا گواچی مسوسس، ولے داسہ جوان ئس۔ پِف تے سخت مسوسس۔ ہنداڑان دم ہلنگ اوڑکن مشکل ئس۔ چہرہ غا پُٹہ نا نشانک ہم ئسُر۔ او تینا شاگڑد آتے روایتی تعلیم تون اوار سیاسی شعور کن ذہن سازی ہم کریکہ۔ شاگڑد آتتون تینا چنا نا وڑ پیش بسکہ۔ اونا شاگڑد آتیٹ چندی ذہین آ ورناک مون مستی پیش تمار۔ ہرافتیٹ پنی آ سیاسی کارندہ عبدالحق و اونا ایلم ڈاکٹر لطیف محمد شہی اوار ءِ۔ داڑتون اوار بلوچستان نا پنی آ سیاسی سروک میر محمود جان کرد ہم اونا شاگڑد مسنے۔ ہرا وخت مستونگ آن بروسس تو لٹ خانہ غا ضرور بسکہ۔ او تینا شاگڑد آتے پاریکہ کہ لٹ خانہ غا ہنبو اوڑے نما فکری پرورش مریک۔ اونا شاگڑد آک ہراتم مستونگ نا ہائی اسکول آن میٹرک کریر و کوئٹہ، کالج نا ہاسٹل آ رسینگار تو ہر وخت لٹ خانہ غا بسرہ۔ داکان کتاب آتے خواننگ کن دریرہ و ایلو خوانندہ غاتے تین تون ہم خیال جوڑ کریرہ۔ دا ڈول دا فکری چرچوئی برجا ئس چراغ آن چراغ لگسا ہناکہ۔
پدا معلوم مس کہ چوہدری صاحب نا اسہ مار اس انجینئرنگ ءِ پاس کرسا ایس ڈی او نا عہدہ غا رسینگانے۔ بد ٹِکئی داکہ اونا دا مار ورنائی ٹی شکست اسے ٹی دنیا ءِ الا۔ چوہدری ءِ داڑان بھلو صدمہ اس مس۔
کاکی داسہ برام نا وئی آ رسینگاسس، اسہ گشادی ءُ ورنا سے تون اونا نکاح مس ہراکہ جوان ءُ عہدہ اسے آ اسلام آباد اٹی ملازمت کریکہ۔ اوفک تینا اُراٹی خوش و آسودہ ئسُر۔ اوفک کوشست کریر کہ چوہدری صاحب ءِ تین تون اوار اسلام آبادآ دیر، ولے چوہدری صاحب منتو، او کراچی گلشن اقبال آ تینا انجینئر مار انا ہلوک آ پلاٹ ہراکہ خالی ئس ہمو ٹی اُراس تفے رہینگا۔ اوڑے اسہ پھل آتا نرسری اس جوڑسا تینے اختہ کرے۔
ہفتاد نا دہائی ٹی ہرا وخت ای کراچی آن پدی کوئٹہ ٹی رہینگ کن بسٹ تو ارمانی مسٹ کہ کراچی ٹی رہینگ نا وخت آ کنے سما الو کہ چوہدری صاحب کراچی ٹی رہینگک۔ نئے اودے کنا معلوم مسوسس کہ ای اوڑان خڑک لیبر کالونی ٹی رہینگانُٹ۔ پدا بھاز ارمانی مسٹ کہ ای کوئٹہ ٹی اونا بارو اٹی کس آن سوج ہم کتویسُٹ۔