تنقید و ادبی تھیوری نا تعلقداری

علمی اختلاف رائے چندی کسر کشنگ، اوفتے ملنگ یا دا علمی شرہ نا خسی کشنگ کِن المی ءِ۔ اینو اگہ براہوئی ادب اٹ اسہ علمی شرہ اس بنا کرینے، تو داڑان اُست بھاز خوش ءِ کہ سوج مننگ ءِ، سوج ہرفنگ انگ ءِ، سوج علم انا کلیت ءِ، اگہ سوج کننگ بند مس تو تنقید مفک، تنقید متو تو تخلیقی عمل سنٹ مریک، اوٹی ردوم بفک۔

گدرینگوک آ دے اسہ وٹس ایپ گروپ اسے ٹی اسہ شرہ اس بنا کرے، ہرانا سرحال ”ادبی تھیوری“ ئس، دا شرہ ٹی سنگت عمران فریق پارے کہ ادبی تنقید اٹ تھیوری تا کاریم اف۔ او بیرہ کورس یا معلومات اسکان تو سہی ءُ، ولے نئے مشرق و نئے مغرب اٹ باقاعدہ وڑ تھیوری تے ادب تون بیٹ تننگانے، نئے براہوئی ادب اٹ دافک بیٹ مننگ کیرہ۔ ہُننگے تو براہوئی زبان و ادبی تھیوری تا بابت خواجہ نا اسہ کتاب اس ہم دا زوت آتیٹی مُستی بس، اوٹی ہم تھیوری تا ادب تون تعلقداری یا ادبی تنقید تون بیٹ تننگ المی مفننگ نا کُنڈ ءِ ہلنگانے۔ سوج دا ودی مریک کہ تھیوری تا ادب اٹ مون آبننگ آن ادب ءِ انت فائدہ؟ دا بیرہ اوفتے خواننگ اسکان ٹھیک ءِ یا کورس اسکا ن تو کنے عجب لگا۔

تنقیدی اصول و ادبی تھیوری تا اسہ ایلو تون اسہ سوگو ءُ تعلق داری اسے، تنقیدی اصول اصل اٹ ہمو قاعدہ یا ہمو ضابطہ ءِ ہرا اسہ ادبی نمشت اسے نا جاچ و اوڑا تنقید کننگ کِن اسہ بنیاد اس ایتک، ادبی تھیوری ہندا فکری نظریہ و مکتبہ فکر و فلسفیانہ بنیاد آتیا جوڑ مریک۔ ہرا تنقیدی اصول ءِ رِد و بند اس ایتک یا اودے بدل کیک، تھیوری ادب ءِ چندی زاویہ غاتا رِد اٹ ہُننگ کِن کمک ایتک دا اسہ ایلو تون تفوک ءُ۔

چندی ادبی تھیوریک ادبی نِمشت ءِ پرکنگ نا وڑ تے پک کیرہ۔ دُن کہ ہر نقاد اودے اسہ نظریہ اسے نا عینک اٹ پرکھسا اوڑان تینا معنہ کشک۔ ادبی تنقید اٹ تھیوری تا اثر دُن پاش مریک کہ ہر نظریہ ادبی نِمشت نا تشریح یا معنہ کِن خاص انگا اصول آتے جوڑ کیک۔ ہرا نقاد نا جاچ انا و نِمشت نا معنہ ءِ پک کننگ آ اثر انداز مریک۔

دن کہ مارکسی تھیوری ادب ءِ تپہ ئی جُہد انا آدینک اٹ ہرک، ہندُن ساختیاتی تھیوری نمشت نا تہہ انا ہاٹی ءِ ہرک۔ مابعد ساختیات نمشت نا معنہ نا غیر مستقل آ حیثیت ءِ پاش کیک۔ دافتیا نن تون چندی نقاد آتا درور آک اریر۔

دُنکہ ارسطو ناکلاسیکی تنقید، کہ اونا poetics اٹ ہرا اصول آک بیان کننگانو او وحدت تاثر، المیہ و طربیہ نا تعریف یا تقلید نا نظریہ ءِ مون آ ایسر۔ اوفک کلاسیکی اصول پاننگرہ، اوفک اینو ہم تنقیدی اصول نا بنیاد پاننگرہ۔ ولے تنقیدی تھیوری ساختیات پس ساختیات یا مابعد جدید اوفتے اسہ پوسکن ءُ زاویہ اسے ٹی ہننگ آ مجبور کرے۔

ہندن ٹی ایس ایلیٹ نا اصول آک روایت وانفرادیت آ زور شاغرہ، ولے ساختیات و مابعد جدید دا تصور ءِ چیلنج کرے، نمشت نا معنویت ءِ اسہ پوسکُن ءُ زاویہ اسے ٹی ہُرا، ادبی تھیوری و تنقیدی اصول آک اسہ ایلو تون گنڈوک ءُ۔ ہراڑے تنقیدی اصول اسہ نمشت اسے نا جاچ اسے کِن اسہ بنیادی ءُ خاکہ اس جوڑ کیک تو ہموڑے ادبی تھیوری دا اصول آتے سوگو و اوفتا گُشاد اٹ ردوم نا کاریم ءِ کیک۔ ہندا تنقیدی اصول و تھیوری تیان علمی وڑ اوفتا تشریح نا پاناد پین زیات شابیت مریک۔ کنا سلاہ دادے کہ ادبی تھیوری تا ادبی تنقید آ بھلو اثر اس ارے، ہیت دادے کہ نوشت یا ادب مغرب نا مرے یا مشرق نا اوٹی انسانی جوزہ غاتا اسٹی تون اوار ہرا ادب نا تینا ہاٹی مریک یا اونا صنفی بشخ آک ءُ، نِمشت نا بابت اسٹ مننگ کیرہ۔ نن پان کہ ادبی تھیوریک براہوئی ادب آ بیٹ مفسہ تو دا تینے کشنگ والا گپ مریک، براہوئی ادب نا تخلیق اسُل کہ او نظم مرے یا نثر، تھیوری تا رِد اٹ جاچ ءِ تا ہلنگے تو اوفتیٹی نمشت نا بابت چندی گُرج آک اریر، اگہ نن پان کہ ننا نقاد دافتے داسکان جوان وڑ اٹ پہہ متنے یا اوٹی براہوئی ادب تون بیٹ تننگ نا گُشاد اف، تو راست مرو۔ ولے ادبی تھیوریک و تنقیدی اصول آک ادب نا چندی علمی پالو تے ملنگ اٹ سرسہب مننگ کیرہ۔۔۔

ڈاکٹر لیاقت سنی نا کتاب ہرا جاپان آن ترجمہ مس تو اوٹی ہم نِمشت آ کاریم کننگانے، او ہم اسہ لسانی تھیوری اسے نا رِِد اٹ افسانہ غاتا ترجمہ غاتے تینا اصل نِمشت و انگریزی ترجمہ ٹی کرینے، اونا مسخت ہم لسانی حوالہ اٹ تھیوری اس ئس، ہرانا پس منظر اٹی معانیات (ٹیگنگ، سمینٹک انلائس) ئس، او دا تھیوری ءِ لیبزک رولز آتا کمک اٹ مونی ایس۔

اصل اٹ نن ہرن تو ہر تھیوری نا بنیاد اسہ تھیوری اسے نا بج آن ءِ، یا اوٹی بدلی اتیک یا اودے رد کیک، اسہ پوسکن ءُ شرہ اسے نا بنا ءِ کیک تو تھیوریک نقاد آتے کِن مریرہ، تخلیق کار ای پاو تینا جوزہ غاتا درشانی ءِ کیک، اوٹی گڑاتے سائنسی حوالہ اٹ پٹنگ نقاد نا ءِ، دا علمی تفہیم و ادب نا گشاد ءِ ملنگ کِن مریرہ، اسہ نوشت پاس یا اسہ فکشن اسے ٹی بیرہ نِمشت اف، اودے پٹوک آ نا رجحان کہ انت اس اوٹی پٹے، دا اونا فکری میلان آ بیس کیک، اگہ اسہ نوشت اسے آن لسانیات والا تینا رِد اٹ مسخت نا گڑا کشک، تو ایلو اوڑان اونا جمالیاتی پالو تے، داڑان نوشتوک ءِ خلوئی اف۔۔۔ و اگہ دا کل انا بنیاد ءِ ہرس تو او تخلیق، نِمشت، نوشت ارے کہ دا تھیوریک مُستی بسنو۔

اگہ ننے معلوم کروئی مرے کہ ہرا نقاد ہرا تھیوری نا رد اٹ تنقیدی اصول آتے اپلائی کرینے تو ہر نقاد وڑ انا وڑ اسے ٹی اسہ فکری و نظریاتی پس منظر اسے ٹی تنقید کرینے، اگہ نن اونا زاویہ نظر ءِ سرپند مرین تو اونا دوئی کروک آ تھیوری نا درست کننگ آسان مریک۔ تنقیدی اصول تھیوری اسے نا بنیاد مریک۔

اول ہرن کہ او متن آ یا اونا سیاق سباق آ زور شاغنگ ءِ، اونا structure آ تو او ساختیاتی تھیوری ءِ کاریم اٹ ایسنے۔

اگہ نِمشت یا متن نا معنہ نا کہ او پاہک دا مستقل حیثیت تخپک معنہ بدل کیک تو دا تنقید نا تعلق مابعد ساختیات آن یا ڈی کنسٹریکشن رد تشکیل آن ءِ۔

اگہ او تاریخی راجی پس منظر آ چکار کننگ ءِ تو اونا رجحان مارکسی تھیوری تاریخی تنقید یا ثقافتی مطالعہ غان ءِ۔

دا ہمو پیمانہ ءِ کہ نقاد نا زاویہ نظر ءِ پاش کیک، کہ او ہرا تھیوری ءِ اپلائی کرینے۔

تھیوری اسہ فکری میلان اسے، و ہر نقاد تھیوری نا رِد اٹ تنقید نا تینا اسہ نظریہ اس تخک لازمی اف کہ او تھیوری نا تعریف آن گڈ اودے اپلائی کے۔

تھیوری اسہ فریم ورک اسے۔ تھیوریک وخت اتون اوار دروشم بدل کیرہ، یا اوفتا مُخ آن پوسکُن ءُ تھیوری اس مُستی بریک۔ ایلو اگہ نن ہرن تو فلسفہ ٹی یا علمی استدلال اٹ رجیکشن اف، تھیوری اس تھیوری اسے نا بُنچخ آن ودی مریک، اسکول آف تھاٹس آک ءُ، فرائیڈ نا تحلیل نفسی آن گُڈ اونا شاگرد آک اونا بج آن اونا تفہیم ءِ اسہ پوسکُن ءُ دروشم اسے ٹی مونی ایسر، یا اونا توسیع ءِ کریر۔۔۔۔

ایٹم نا اولیکو تعریف آن نمن مننگ کپک، انتئے کہ ایٹم نا دریافت ہی اونا کل آن بھلا کٹیا ءِ، داسہ مون آ سائنس اونا پارٹیکل آتے ہم بشخ بانٹ کیک، ہندُن تھیوریک تینا اثر پزیری ءِ مدام برجا تخسا اسہ علمی وڑ پوسکُن ءُ کسر اس ملرہ، و نقاد آ بیس کیک کہ او ہرا کسر اٹ کاہے، روایت ءِ ہرفے یا جدید تون پوسکُن آ دور انا خواست آتتون ہمگام مرے، ہراڑے تنقیدی دبستان آتا ہیت مریک تو تھیوریک پین اونا علمی گُشاد ءِ ودفیرہ اوڑان پوسکُن ءُ معنہ کشرہ دا اسہ تسلسل اسے۔

ہندُن سنگت پارے کہ اگہ ادبی تھیوریک ادب آ اپلائی مریرہ تو ہرا ادب اٹ مسنو کہ نن اوفتا مثال ایتن۔

تو ای منہ مثال اردو ادب نا نقاد آتا اوفتا اسہ پیراگراف آن مُستی اتنگ نا کوشست کیوہ، تاکہ نقطہ نظر اسہ دلیل اسے تون مُستی برے۔

مارکسی تھیوری (Marxist Theory) نا مثال

نقاد: ”فیض احمد فیض کی شاعری میں ہمیں سرمایہ دارانہ استحصال اور مزدور طبقے کی جدوجہد کا بیانیہ نظر آتا ہے۔ وہ اشرافیہ کے ظلم اور سماجی نابرابری کے خلاف احتجاج کرتے ہیں۔ ان کی نظموں میں ہمیں بورژوازی (Bourgeoisie) اور پرولتاریہ (Proletariat) کی کشمکش ملتی ہے۔“

(سجاد ظہیر)

تھیوری نا شناخت:۔

داڑے نقاد تپہ جہد، سرمایہ دارانہ استحصال، مزورکار و اشرافیہ نا تفریق آ زور شاغانے، ہرا مارکسی تھیوری نا بنداوی ٹک آک ءُ۔ استحصال، اشرافیہ، تپہ ئی چک و تاڑ، نا لوز آک ننے دا اشارہ ایترہ کہ نقاد مارکسزم تھیوری آ تجزیہ کننگ ءِ۔

فیمنسٹ (Feminist)تھیوری نا مثال

نقاد: ”قرۃ العین حیدر کے ناول ’آگ کا دریا‘ میں خواتین کے کردار ثانوی حیثیت میں دکھائے گئے ہیں۔ اگرچہ وہ کہانی میں موجود ہیں، مگر ان کے فیصلے مردوں کے تابع نظر آتے ہیں۔ یہ نثری بیانیہ پدر شاہی سماج کی عکاسی کرتا ہے جہاں عورت کو مکمل آزادی نہیں دی گئی۔”

(نسرین انجم)

تھیوری نا شناخت:

داڑے نقاد ”پدر شاہی سماج”، ”نیاڑی نا ثانوی حیثیت”، ”مردانہ تسلط” کون آ لوز آتے کاریم اٹ اتنگ ءِ، ہراڑے نسائی تنقید (Feminist Criticism) نا بُنچخی تصور آک ءُ۔ داٹی ادب اٹ صنفی امتیاز (Gender Discrimination) ءِ پاش کننگ نا کوشست ءِ کننگانے، ہرا کہ فیمنسٹ تھیوری نا چاہنداری پاش کیک۔

ساختیاتی(Structuralist) تنقید نا مثال

نقاد: ”منٹو کے افسانے ایک خاص بیانیہ ڈھانچے (Narrative Structure) کے تحت تشکیل دیے گئے ہیں، جہاں کردار اور واقعات ایک مخصوص ترتیب کے مطابق آگے بڑھتے ہیں۔ ان کی کہانیوں میں علامتوں (Symbols) اور نشانوں (Signs) کا گہرا استعمال ہوتا ہے، جیسے کہ ‘ٹھنڈا گوشت’ میں جنسیت اور جرم کی علامتی حیثیت کو ظاہر کیا گیا ہے۔“

(ڈاکٹر گوپی چند نارنگ)

تھیوری نا شناخت:

نقاد داڑے بیانیہ، ڈھانچہ، علامات، نشانات، ترتیب، وڑ انا لوز آتے کاریم اٹ اتنگ ءِ، ہرا ساختیات (Structuralism) نا بنداوی ٹک آک ءُ، او دا ہننگ ءِ کہ امر نِمشت نا تہٹی لسانی و معنہ غاک تین پہ تین تون گنڈوک ءُ۔ داڑان دا پاش ءِ کہ او ہرا تھیوری نا رِد اٹ تنقید کرینے۔

مابعد ساختیاتی (Post-Structuralist) و ردتشکیلیت (Deconstruction) نا مثال کہ نقاد ہرا تھیوری مون آ تخانے:

نقاد: ”غالب کی شاعری میں معانی کی کوئی مقررہ حد نہیں۔ مثلاً، ان کا شعر ’ہزاروں خواہشیں ایسی کہ ہر خواہش پہ دم نکلے‘ بیک وقت امید اور ناامیدی دونوں کی عکاسی کرتا ہے۔ قاری پر منحصر ہے کہ وہ اسے کیسے سمجھتا ہے۔“

(ڈاکٹر ناصر عباس نئیر)

تھیوری نا شناخت:

داڑے نقاد پاننگ ءِ معنہ پک (Fixed) افک، بلکہ اوٹی بدلی برسا کاہک۔ مابعد ساختیات (Post-Structuralism) و ردتشکیلیت (Deconstruction) نا دا بنداوی تصور یا تھیوری ءِ، ہراڑے معنہ خوانوک نا تشریح آہری ءِ یا او ہرا وڑ اوڑان معنہ کشک، دا تھیوری نا کُنڈ آ کتی کیک کہ ہرا تھیوری ءِ نقاد کاریم اٹ ایسنے۔

میشل فوکو نا تھیوری (Discourse) تھیوری نا مثال:

نقاد: ”منٹو کے افسانے ’کالی شلوار‘ میں عورت کے جسم پر سماجی کنٹرول کو ظاہر کیا گیا ہے۔ کرداروں کی گفتگو میں ہمیں طاقت کے وہ عناصر دکھائی دیتے ہیں جو پدر شاہی نظام کے ذریعے عورت کی شناخت متعین کرتے ہیں۔

(ناصر عباس نیر)

تھیوری نا شناخت:

نقاد طاقت (Power)، و (Discourse)، راجی کنٹرول کون آ خیال آتیا زور شاغنگ ءِ۔ دا میشل فوکو نا تھیوری نا اسہ بنداوی ٹک اسے ہراڑے زبان و ڈسکورس ءِ طاقت نا نظام تون گنڈنگک۔

ای پاو دا وڑ نا ہزار آ مثال آک دو بریرہ اومیت ءِ کہ دا سرجم جاچ اٹ سرپند مرورے۔

ہندُن ننے چندی نقاد آتا نقطہ نظر آن اوفتا تنقید اٹ دوئی کروک آ تھیوری بِسند نظر بریک۔