او تینا خاہوت تینا چُنا، خلق، اُرا، شال، بلوچستان، سنگت، مہر ومریبت، شغل شغال، کاریم، لوز خُلنگ شاعری کننگ، تینا رسالہ ”کوکار“ نا شینکاری، یوٹیوب چینل ”بلوچستان رنگ“ نا پڑ آن زبان و ادب نا دیمروی کن کاریم کننگ خواہسکہ۔ او دا کل ءِ، ننے، تینے اِلنگ خواتوکہ، ولے مَرک مہتل مفک۔۔۔ و دیچہ انتئے دا وڑ انا حساس انگا، مہروان آ بندغ آک بھاز زو دا ڈرامہ باز آ، ادکار انگا دُنیا ءِ زو اس اِلرہ کارہ۔

احمد نعیم نا حساسیت تین کن تینا ذات اکن آخا ایلوفتے کن اسُل زیات ئس، او مدامی سنگت آتے اسہ ایلوڑتون ہم کَڑی، ہم گرنچ خواہسکہ۔ اگہ اودے سما مروسس کہ فلانی سنگت فلانی سنگت آن ناراض مسنے یا اسہ تنظیم اسے نا سنگت آک تنظیم ءِ اِلانو، تین کن پین تنظیم اس جوڑ کننگ ءُ، گڑا او بھاز فریشان مسکہ، گڑتی تے ٹی تماکہ کہ دُن امر مریک، ہمو سنگت آتیا ہناکہ حوال کریکہ جت پت اس کریکہ کہ دافک اسٹ مریر، او تینا کڑدار ءِ مثبت وڑ اَٹ ادا کریکہ۔

او تین کن آخا ایلوفتا ترقی، ایلوفتا مُراد اسے نا پورواری، ایلوفتا ناجوڑی اسے آن زو اس دراخی کن گڑتی کریکہ، ولدا دُراخی آتا سخت گل آن بال مسکہ۔۔۔۔

کنے یات ءِ ہراتم اونا مجموعہِ کلام ”الف، ب“ نا مون پاشی دود شون ادبی دیوان نا پارہ غان سریاب پائیٹ اٹی اڈ ہلوک ئس، تو او کل مچی ءِ گیرام درے، کہ نی مُر آن بروک اُس، بر دافتے اِلے، کان پیشن گپ خلین۔۔۔

اڑے یار نا کتاب نا مون پاشی ءِ۔۔ پارے دا خُدنمائی و فارمیلٹیک کنے وڑپسہ، سنگت آک پروگرام ءِ شون تسنو، داسکان شروع اف، نی کان ای نے تینا چینل کن انٹریو اس کیوہ۔

گڑا نن ہنان پیشن کرسی اس خلکُن، او کنے آن تینا چینل کن چنکو کلہو اس ریکارڈ کرفے۔ داسہ اُست نا جم مس؟

احمد نعیم ہندن ئس۔۔۔ مہر انا چلتن ئس۔۔۔ شال انا ہمو گہوش ہراکہ ہر اسہ بندغ ءِ تینا شیدائی کیک۔ بندغ اسُل کہ ہرا تنظیم ہرا علاقہ غان تعلق تخوسس، احمد نعیم نا سنگت ئسکہ، او تارپہ تاری تیٹ ہچ خوش اَلو۔

احمد نعیم ہندن ئس۔۔۔ مہر انا چلتن ئس۔۔۔ شال انا ہمو گہوش ہراکہ ہر اسہ بندغ ءِ تینا شیدائی کیک۔ بندغ اسُل کہ ہرا تنظیم ہرا علاقہ غان تعلق تخوسس، احمد نعیم نا سنگت ئسکہ، او تارپہ تاری تیٹ ہچ خوش اَلو۔

ہراتم نعیم رسالہ ”کوکار“ نا بناءِ کرے تو اودے دیچہ دیر پاریسُس کہ ”کوکار“ تلار نا مقابلہ ٹی ءِ۔ وخت اس او دا ہیت ءِ بِنگ گڑا پارے ”کنا ارادہ نیت دُن ہچ اف، انتئے کہ ای ”تلار“ آن اخبار نا شونکاری و شینکاری ءِ ہیل کرینُٹ، اگہ کس ہندا سرپد مریک کہ ای ”تلار“ نا مقابلہ ءِ کیوہ گڑا ”کوکار“ ءِ بند کیوہ۔۔۔۔۔۔ یعنی او ہچ ءُ تنازعہ اسے ٹی تمنگ خواتوکہ، بیرہ مہرو مریبت نا مثال اس مننگ خواہسکہ و مہر و مریبت نا مثال اس مس۔۔۔

شون ادبی دیوان اونا بنائی تنظیم ئس، ای احمد نعیم تون ہندا پڑآن سنگت مسٹ۔۔۔ ولدا او بھلو وخت اس ”تلار“ تون کاریم کریکہ، داڑے ہم ہر وخت اوڑدہی مسکہ، اوکان پد او ”تلار“ نا دفتر تون ہمسائے ”نیوچینل“ تون کیمرہ مین نا وڑ کاریم کریکہ، تو داڑے ہم کنا اونا ملاقات مسکہ۔۔۔

ولدا ناجوڑی نا سوب او دا کل ءِ اِلا تو سوشل میڈیا و وٹس ایپ آ وخت نا وخت حوال مسکہ و احمد نعیم نا کم و وَد ہر اسہ نوشتکار، یا ادب و ثقافت، راجی پڑ آ تعلقدار تون ہندا وڑ انا رابطہ و تعلق اس تخاسس، او ہر اسٹ ءِ یات کریکہ۔ داڑسکان کہ بھاز آ تنظیم آک اسہ ایلوڑتون بھاز آ حوالہ اٹ اختلاف نا گواچی مرسا مُر مریرہ، ولے احمد نعیم دا وڑ انا گڑاتے ہچ باک اَٹ اتتوکہ۔ ہرا تعلقداری اونا شون اتون ئس، ہمو تعلقداری راہشون تون ہم برجا سلیس۔ براہوئی ادبی سوسائٹی آ ہناکہ بسکہ، و براہوئی اکیڈمی نا سنگت آتے ہم حوال کریکہ۔ راسکوہ و اوتان ءِ ہم ماراکہ، ہرااسٹ کن اوڑتون مہر ئس، ہر شاعر، نا ہر نوشتکار نا سفت ءِ کریکہ، اودے واہ واہ پاریکہ۔

احمد نعیم، جانان ءُ بندغ، گچین ءُ انسان اس ئس، کہ اونا ہننگ آن پد ہر اسہ بندغ اوڑکن ارمانی ءِ، اوتینا گچین آ کڑدار نا سوب آن ہر کس نا اُست اَٹ تین کن جاگہ اس جوڑ کریسس۔ نعیم اسُل پین وڑ تہٹی (باطنی) زیبا ئس کہ نعیم نا وڑ ءُ انسان دا منافقت پسند و منافقت کروک آ دو رَغہ انگا دنیا ٹی داسہ بھاز کم ءِ، داڑے ہر اسٹ سنگتی نا پن اَٹ ہم ڈرامہ کیک، ریاکاری کیک، ہر اسٹ نا اِرا چہرہ ءُ، ہر اسٹ نرگسیت نا گواچی بیرہ سفت و ستا کن بندغ تون سلوک مریک، یا تینا غرض انا پورواری کن بندغ تون سنگتی و ایلمی کیک، او دُن اَلو۔ ای اودے کس آن غاوی خنتوٹ، حالانکہ نعیم بھاز بے روزگار ہم مس، ولے تینا مالی حالیت نا ہم غاو ءِ کن تون ہچ کتنے۔ اگہ او غاوی مسکہ تو ہندا غاو ءِ کریکہ ”یار سنگت آک بایدے اسٹ مریر، اسٹ ایلو تون مہر کیر۔ انتئے داوڑ کیرہ؟ انتئے دُن بدل مریرہ؟ یار ای تینے اسہ جاگہ اسے نا کننگ کپرہ۔ کل کنا سنگت آک ءُ۔ اؤ ای پارینُٹ تا نما مرضی ءِ، ای فلانی آ کاوہ آخر انتئے ہنپر؟ او ہم ننا ادیب اسے۔۔۔۔

نیام تیٹ گڑاس تنقیدی نوشت لکھا، ولدا داسلسلہ ءِ زو تورے، پارے رَد معلومداری تننگا، ننے اسہ ایلوتون ہمگرنچ مرسا زبان وادب کن خذمت کروئی ءِ۔۔۔۔۔

اونا اُست اَٹ کاریم نا بھلو ہُب اس ئس۔ فلم جوڑنگ، ایڈیٹنگ و کیمرہ مینی تون سخت شوق اس تے۔ اونا کمال دا ئس کہ بھاز ذہین و حاضر دماغ ئس، ہرا گڑا ٹی دو شاغوسس یکدم پہہ مسکہ تے، ولدا اودے آئیڈیا بھاز سُجاکہ، ہنداڑان ہمو کاریم ءِ اوکان پین زیات خَشنگ و شاندار کریکہ۔ ولے ناجوڑی اودے داکل آن ناگیگ کریسس۔

ہندا ناجوڑی آن پد اودے درک ئس کہ دا بیماری کن تون کسر اس دیک، گڑا تینا چُنا و خاہوت ءِ سوچسا نفسیاتی فریشان ہم مس، او تینا چناتتون کچ آن زیات مہرکریکہ و دا بیماری آن گڈ اونا حساسیت پین ودا، اونا شاعری ٹی پین دڑد و نکھار اس پَڑ کشا، او مزاحیہ شاعری کننگ ءِ اِلاسُس کہ اونا ہوش زندگی و مَخنگ تون اَلو۔۔۔ اونا فسیبک آئی ڈی آن پوسٹ کروک اونا ہیت آتتون اوار دا دڑدی آ شاعری 2012ء یا 13 غان پد اینو دماغ اٹ گڑاس چوٹ موٹ ءُ خیال اس او ہم مزاحیہ متو۔۔۔۔:

”مہربان آن پَد سَلِیسُٹ ای

کل جہان آن پَد سَلِیسُٹ ای

سنگت آتیان کس پَدی ہُرتَو

کاروان آن پَد سَلِیسُٹ ای

مرض وَدَّا تو زندگی آن ہم

ناگمان آن پَد سَلِیسُٹ ای

پیر مَننگ کن پین اَرے اَنت اس

ہر جَوان آن پَد سَلِیسُٹ ای

بِن، نِزُور آ دَا جان اَتو، دِیخَہ

ناگدان آن پَد سَلِیسُٹ ای

کُل ءِ خَسَّاس تو نِشان آتا

نا کَمانَ آن پَد سَلِیسُٹ ای

سَنگت آتا اے سَنگتی آن ہَم

”شُون“ شَان آن پَد سَلِیسُٹ ای“

16/05/2023

”ایہُن کیسہ گیشتر سزاٹی کن

مرض ہچ بفکک دوا ٹی کنا

جہان آن رَسخت کریٹہ ولے

منہ چُنکو پھل ءُ اُرا ٹی کنا

کنا جند بے کار اریٹ کل اَکن

کنا ساہ سَخت ءِ چُنا ٹی کنا“

ہنداڑان او تینا سنگت آتا حلقہ ءِ پین زیات ودفنگ اٹی تما، او بھاز آ کاریم تے ایسر کننگ خواہسکہ، کس پاہے اودے پروجیکٹ اس مِلانے، و دادے زو اس ایسر کروئی ءِ، اوڑتون کاریمک چَٹ بھاز ئسُر، وخت کم ئس، نعیم اِشتافی اَلو اوتینا چناتے مہرو وخت تننگ خواہسکہ ولے ایکان ملخموت اشتافی ئس۔۔۔۔:

”ای تو کل آن عذاب مننگ اُٹ

زندگی ٹی خراب مننگ اُٹ

کل اَکن ای سوال ئسٹ تو

کل اَکن ای جواب مننگ اُٹ

بھاز بھلو جہان اسے ٹی ای

بھاز چُنکو حساب مننگ اُٹ“

ہراتم ای اونا موکل نا حوال ءِ بنگُٹ تو کنے پین ہچ وس متو کہ نن زنداَٹ ہم اونا ناجوڑی ءِ مُر کننگ کن وس خنتونہ۔۔۔۔ اونا ہننگ آن پد کنے اونا چندی یات آک، گپ آک، اونا انداز، مخنگ گیر کیک، دُن کہ اسہ دے اوکنے پارے ”نی دا سہُب وختی کنے آ سُہب سلامتی راہی کیسہ، ای خوش مریوہ و کنا اِرا نمبر آ نا سہُب سلامتیک بریرہ، داسہ ارٹمی نمبر کنا اُرا والاتون مریک، ولے نی اونمبر آن ہم سُہب سلامتی ءِ بند کپہ۔۔۔“ دا ہم اونا اشارہ اس ئس کہ کنا نمبر ولدا آخبتی بند مریک۔۔۔

کن کن دا فیصلہ کننگ ہر اسہ سنگت نا دا کان ہننگ آن پد بھاز مشکل مسنے، و احمد نعیم نا وخت پین زیات مشکل مننگ ءِ کہ ای اونا نمبر ءِ ڈیلیٹ کیو یا نہ؟ ہرا اُرا والا نمبر تے ئس، اودے ای مہالو ہمو دے تیٹ ڈیلیٹ کرینُٹ۔۔۔ اونا فیس بُک آئی ڈی ءِ اَن فرائینڈ کیو؟ ای انتظار کیو؟ بلکہ اونا پوسکن ءُ آئیڈیا اس، پوسکن ءُ کلہو اس کنے آ برے۔۔۔۔۔ دُن کہ او پارے ”غمخوار نی نوشکے ٹی مریس نن پگہ برینہ، زنگی ناوڑ آ کانہ، اوڑے چنکو رپورٹ اس جوڑ کروئی ءِ، ظہور و رفیق، عثمان ءِ پاس، ای اوفتے ہم حوال کننگ خواوہ۔۔۔۔۔۔ یار نا پوسکن آ کتاب نا ٹائٹل کنے بھاز دوست بس، رحیم زام بھاز گچین ءُ سرپنہ جوڑ کیک۔۔۔“

ولے ای خڑینکی آ خن تتون ہُننگ اُٹ، دا اِرا دے نا ءِ احمد نعیم نا پارہ غان کنا سُہب سلامتی نا ورندیک بَننگ اَفس۔۔۔۔