
درملکی تے پاکستان آن ہننگ کن یکم نومبر اسکان نا ڈیڈ لائن
۔1 نومبر 2023 آن بنجائی وصوبائی کانود نافذ کروک ادارہ غاک کانود آن چَپ ہندی کل درملکی تا دزگیری و زور اٹ ملک آن کشنگ کن کل گمانی گام گیج آتے کیرہ‘
اسلام آباد: نگران وزیراعظم ناکماشی ٹی ایپکس کمیٹی نا دیوان اڈہلک‘ دیوان اٹ بنجائی وزیر‘ صوبائی وزیراعلاک‘ آرمی چیف جنرل عاصم منیر، کانود نافذ کروک سول و عسکری ادارہ غاتا سروک آک ساڑی ئسر‘ اعلامیہ نارد اٹ دیوان اٹ ملک انا تہہ انا سکیورٹی حالیت آتا جم جاچ ءِ ہلنگا و عزم درشان کننگا کن الس نا استخواہی تا وڑ اٹ آئین وکانود نا عملداری ءِ پک کننگک۔ دیوان اٹ اہم انگا فیصلہ غاتا منظوری تننگانے‘ فیصلہ غاتا رد اٹ پاکستان اٹ کانود آن چَپ ہندی کل درملکی شاری تے 31 اکتوبر 2023 اسکان پاکستان آن پیش تمنگ نا پاننگانے‘1 نومبر 2023 آن بنجائی وصوبائی کانود نافذ کروک ادارہ غاک کانود آن چَپ ہندی کل درملکی تا دزگیری و زور اٹ ملک آن کشنگ کن کل گمانی گام گیج آتے کیرہ‘ 10 اکتوبر 2023 آن پاکستان اوغانستان سیم آن ہن وبر کمپیوٹرائزڈ شناختی کارڈ (E-Tazkira) غا مریک وخت اس کہ یکم نومبر 2023 آن ہن وبر نا موکل بیرہ پاسپورٹ و ویزا غا تننگک‘ ایلو کل ہر وڑ انا کاغد سیم آن ایپار سفر کننگ کن غیرموثر وکانود آن چَپ مریک‘ 1 نومبر 2023 آن کانود آن چَپ ہندی درملکی تا کاروبار و میرات آتے ضبط کننگک وکانود آن چَپ کاروبار کروک و اوفتا کمکار آتا برخلاف سخت کارروائی کننگک۔یکم نومبر 2023 آن پد پاکستان اٹ کانود آن چَپ ہندی درملکی تے رہینگ کن جاگہ تروک یا کمک کروک پاکستانی شاری وکمپنی نا برخلاف سخت کانودی کارروائی کننگک۔وزارت داخلہ ناچاروکی ٹی اسہ ٹاسک فورس اس ٹہیفنگانے ہراٹی کانود نافذ کروک و انٹیلی جنس ادارہ غاتا کارندہ غاک اوار مریرہ“ دا ٹاسک فورس انا مسخت جعلی شناختی کارڈ جوڑ کروک بندغ و اوفتا جعلی کاغد آتیا ساڑی کانود آن چَپ میرات آتے ضبط کننگ مریک‘ نادرا ءِ پرمان کننگانے کہ او کل جعلی شناختی کارڈآتا منسوخی ءِ دمدستی پک کے و اگہ کس آ شک مس تو اونا پک کننگ کن ڈی این اے ٹیسٹ کرفنگے‘ ویب پورٹل و یو اے این ہیلپ لائن آ پاکستان اٹ ہندی درملکی بندغ آتا کانود آن چَپ رہینگ یا کاروبار کننگ نابارو اٹ معلومداری فراوان کننگ مریک‘ دا رد اٹ ہرا شاری حکومت تون کمک کرے اودے انعام تننگک و اونا پن ءِ پاش کننگپک‘ کانود آن چَپ سرجز‘ کوڑی کننگ گڑا یا کرنسی نا اسمگلنگ، حوالہ/ ہنڈی و بجلی دزی نابرخلاف مہالو آن سخت کارروائی کننگ انگ ءِ‘ دا ڈوہ تا زموار آتتون ہچ رعایت کننگپک۔ جوائنٹ چیک پوسٹ جوڑ کننگانے‘ ہرافتے کسٹم پاور تننگانے‘ ٹیکنالوجی ءِ کاریم اٹ اتسا بنداوی کنوئی آ گڑاتا ہن وبر ءِ چیک کننگ انگ ءِ ہراڑان اسمگلنگ اٹ کمتی بریک و ہرا حکومتی کارندہ کرپشن نازموار مسنے اونا برخلاف سخت کارروائی کننگ انگ ءِ۔واکداری ءِ بیرہ ریاست کاریم اٹ اتنگ کیک داکان بیدس کس ءِ واک ءِ کاریم اٹ اتنگ نا موکل تننگپک‘ پاکستان اٹ ہچ ءُ سلہہ بند پڑک‘ ٹولی یا تنظیم اسے نا موکل اف و دا وڑ ءِ تینائی کروک آتا برخلاف سخت کارروائی کننگک‘ اسلام امن نا دین ءِ و ریاست کس ءِ مذہب نا است پسند تشریح کرسا سیاسی مسخت دوئی کننگ نا موکل تفک‘ اقلیت آتا حق و مذہبی آجوئی اسلام و پاکستان نا آئین نا بشخ ءِ و دانا خلاف ورزی کروک آتا برخلاف ریاست کانود نارد اٹ واک ءِ کاریم اٹ اتیک‘ ملک اٹ جوڑ تنظیمک پرامن و مہذب وڑ اٹ تینا روا انگا خواست آتے ریاست نا مون آتخنگ کیرہ ہرافتے بننگ و کانودی وڑ اٹ ایسر کننگک ولے اگہ تنظیم اس واک و بیدادی نا کسر ءِ تینائی کیک تو اونا برخلاف سخت کارروائی کننگک۔ غوغا و غلط معلومداری نا مہم چلیفوک آتا برخلاف سائبر کانود نارد اٹ کارروائی کننگک۔کل کانود نافذ کروک ادارہ غاتے پرمان کننگانے کہ او نظم و ضبط ءِ برجا تخنگ کن کانود نا بالادستی ءِ پک کیر‘ نظم و ضبط ءِ تینائی کرسا نن تینا ہدف ءِ دوئی کننگ کینہ۔
(آن لائن)