سپریم کورٹ: آرٹیکل 62 ون ایف نا رد اٹ مچ زند نابودی کالعدم

اسلام آباد: سپریم کورٹ آرٹیکل 62 ون ایف نا تشریح نا فیصلہ ءِ بنفسا مچ زند نابودی ءِ چٹفے۔ چیف جسٹس قاضی فائز عیسیٰ فیصلہ ءِ بنفے‘ فیصلہ ٹی سپریم کورٹ مچ زند نابودی ءِ چٹفے‘ و دا فیصلہ ءِ 1-6 ناگیشتری سلاہ اٹ بنفنگا‘ عدالت سمیع اللہ بلوچ نابودی کیس انا فیصلہ ءِ چٹفے وپارے کہ سیاستدان آتا نابودی مچ زند اکن مفک‘ فیصلہ ٹی پاننگانے کہ الیکشن ایکٹ انا رد اٹ نابودی نا مُد 5 سال اسکان ءِ‘ نابودی نا مُد انا جاچ ءِ ہلنگ نا گرج اف‘ 62 ون ایف نا تشریح عدالتی ڈیکلریشن نا کمک اٹ آئین ءِ ریڈ ان کننگ ءِ‘ ڈیکلریشن تننگ نابابت کانود نا ہچ ءُ پراسس اس اف۔ فیصلہ ٹی پاننگانے کہ آرٹیکل 62 ون ایف اٹ نوشتہ اف کہ کورٹ آف لا انت اسے‘ آرٹیکل 62 ون ایف پیدوار کپک کہ ڈیکلریشن ءِ دیر ءِ تروئی ءِ‘ آرٹیکل 62 ون ایف اٹ نوشتہ اف کہ نابودی نا مُد اخس مریک‘ دن ءُ ہچ ءُ کانود اس اف ہرا پیدوار کے کہ آرٹیکل 62 ون ایف انا رد اٹ نابودی نا وڑوڈول انت مریک‘ فیصلہ نا متن نا رد اٹ دن ءُ ہچ ءُ کانود اس اف ہرا پیدوار کے کہ آرٹیکل 62 ون ایف انا رد اٹ نابودی نا مُد اخس مریک؟ دا ہم پیدوار اف کہ 62 ون ایف نا رد اٹ نابودی فیئر ٹرائل وکانود خواست آتا وڑ اٹ ارے یا آخا۔ ایلو کنڈآ جسٹس یحییٰ آفریدی فیصلہ تون اختلاف کرے و پارے کہ 62 ون ایف نا رد اٹ نابودی مچ زند ہم اف‘ نابودی عدالتی فیصلہ ساڑی مننگ اسکان ءِ‘ سمیع اللہ بلوچ فیصلہ درست ئس۔ چیف جسٹس پارے کہ گچین کاری شیڈول جاری مننگ آن پد ہم المی ئس کہ دا فیصلہ ءِ زوت بنفنگے‘ کل وکیل و اٹارنی جنرل نا بننگ نا منتوار اُٹ۔ یات سلے کہ چیف جسٹس قاضی فائز عیسیٰ نا کماشی ٹی 7 باسکی بینچ سماعت کرے و فیصلہ ءِ 5 جنوری آ ڈک کریسس۔