نواز شریف نا وطن آ پدی بننگ آ ڈیل و مسلم لیگ (ن) نا کنڈ ہلنگ نا تاثر درست اف، نگران حکومت ڈیل اسے نا انتئے اوار مرو؟ زرگزران نا گچینی کن گام گیج آتا بھرم ہُرے اسکان چکک، نگران وزیر اعظم

اسلام آباد(اے پی پی) نگران وزیراعظم انوارالحق کاکڑ مسکوہی وزیراعظم نواز شریف نا وطن آ پدی بننگ اٹ ڈیل انا تاثر ءِ اسُل مسترد کرسا پارینے کہ نگران حکومت ڈیل اسے نا انتئے اوار مرو؟ نواز شریف عدالتی فیصلہ نا رداٹ ملک آن پیشن ہنا و اودے وطن آ پدی بننگ آ گڑاس کانودی سوج آتتون مون تروئی مریک، نگران حکومت مسلم لیگ (ن) نا کنڈ ءِ ہلپک۔ داخیال آتا درشانی ءِ او ڈیجیٹل پلیٹ فارم ”وی نیوز“ ءِ تروک آ انٹرویوٹی کرے۔ ہراتم وزیر اعظم نا سوج کننگاکہ نواز شریف ڈل اسے نا رداٹ پدی بننگ ءِ؟ تو وزیراعظم ورندی تس کہ اسہ نگران حکومت اس داوڑنا ڈیل اسے نا انت بشخ مریک و انت اکن مریک۔ نواز شریف ہراتم اسہ عدالتی فیصلہ سے نا رداٹ ملک آن پیشن ہناتو ہمووخت آ عمران خان نا حکومت ئس، داوخت آ نئے تو اونگران سیٹ اپ و نئے پی ڈی ایم جماعت آتا حکومت ئس۔ اوپارے کہ نواز شریف ءِ وطن آ پدی بننگ آ گڑاس کانودی سوج آتون مون تروئی مریک و دا سوج آتا ورندی ہم کانودی ءِ۔ انوارالحق کاکڑ مسلم لیگ نوز نا کنڈ ہلنگ ناتاثر ءِ ہم پورو وڑاٹ مسترد کرے۔ اوپارے کہ نگران وزیراعظم جوڑ مننگ آن مست کنا مریم نواز، بلاول بھٹو، مولانا فضل الرحمان، آصف علی زرداری و 9 مئی نا واقعہ غاتیان مست عمرا ن خان تون ہم اوڑدہی مس۔ اوپاریکہ ای بیوروکریٹ اس آخابلکن اسہ پارلیمنٹ نا باسک اس ئسٹ و ہموکان استیفہ ترسا ای دا منصب ءِ سنبھالانٹ۔ کانود آن چَپ مہاجر تا بابت اسہ سوج اسے نا ورندی ٹی نگران وزیراعظم کاکڑ پارے کہ نن ہچ ءُ وڑ اسے مہاجر تے کشپننگ اُن بلکن بیرہ کانود آن چَپ رہینگوک درملکی تے کشنگ اُن۔ پاک بھارت تعلقداری نا بابت سوج انا ورندی ٹی نگران وزیراعظم پارے کہ پاکستان و ہندوستان نا تعلقداری ٹی آر ایس ایس نا سوچ وکشمیر نا ویل اڑاند ءِ،

بلوچستان اٹ گھوسٹ اسکول و بی ایچ کیو پیدوار کننگانو، الس ءِ نسخان مسنے،اسرائیل ءِ منپنہ، فلسطینی تا مخ تفی ءِ برجا تخنگک، ہندوستان سویلی ایشیا ٹی تینا بادشاہی جوڑ کننگ خواہک، ڈیجیٹل پلیٹ فارم ءِ انٹرویو

ای تکیوہ کہ ہڑتوم آ ملک آتا تعلقداری ٹی گچینی بایدے برے ولے حقیقت پسندانہ وڑاٹ ہُننگے تو فی الحال دانا ہچ ءُ گمان اس نظر بفننگ ءِ۔ اوپاریکہ ہندوستان سویلی ایشیاٹی اجارہ داری اس جوڑ کننگ خواہک، بھارت اٹ مسلمان، سکھ و ایلو اقلیت آتیکن زند ءِ ژند کننگانے۔ اسرائیل ءِ امنا کننگ نا گمان نا بارواٹی سوج انا ورندی ٹی وزیراعظم پارے کہ دابارواٹی ہچ ءُ سوچ بچار اس مفننگ ءِ، اسرائیل اسہ غاصب ریاست اس ئس و ارے و نن فلسطینی تا حق و فلسطینی باہوٹ آتا اوفتا ڈغار آتیا پدی بننگ نا مخ تف اُن۔ زرگزران نا بابت اسہ سوج اسے نا ورندی ٹی وزیراعظم پارے کہ زرگزران نا گچینی کن کروک آ گام گیج آتا بھرم ہُرے اسکان چکک، خصوصی سرمایہ کاری سہولت کونسل نا جوڑ کننگ کانود سازی نا نتیجہ ٹی عمل اٹ بسنے و بھلا زرگزرانی فیصلہ ہندا پلیٹ فارم آن مننگ ءِ۔ اوپاریکہ ڈالر ناریٹ انا شیف ہِننگ مہالو ہم مسنے ولے ڈالر نا ریٹ اٹی 40 یا45 روپئی نا یک دم آن کمتی اولیکو وار مسنے و چونکہ لس مخلوق، میڈیا و کاروباری تپہ خصوصی زرکاری سہولت کونسل نا فائدہ غاتے خنانے ہندا سوب آن دانا برجاسلنگ المی ءِ۔ بلوچستان نا ویل آتا بابت ہیت کرسا وزیراعظم پارے کہ بلوچستان نا اسہ ویل سیکورٹی ءِ و ایلو فتیٹی وسیلہ غاتا کمتی و گڑاس انتظامی خامیک اوار ءُ۔ وزیراعظم پاریکہ تدوک آ دے کوئٹہ ٹی ایپکس کمیٹی نا دیوان اٹی پاننگاکہ صوبہ ٹی گھوسٹ اسکول و بنداوی جان جوڑی ہند آتے پیدوار کننگا۔ اوفتیان گڑاس مالی فائدہ ہرفیر ولے بلوچستان نا الس زہمی مس۔