مکران کوسٹل ہائی وے، مسافر بس و باؤزر اس ڈوک لگار، 11 بندغ زوال
است ہسون آ شکست سہب انا دہ بجہ نا وخت آ پیش بس، کوچ تربت آن کراچی کن ہناکہ، مرک 1122
گوادر، مکران کوسٹل ہائی وے آ ماکولا نا ہند آ مسافر بس و ایل پی جی باؤزر نا ڈوک لگنگ آن خاخر لگا، 11 بندغ زوال و 33 ٹھپی مسر۔ حوال نارد اٹ مکران کوسٹل ہائی وے N-10 آ اورماڑہ نا علاقہ بسول نا خڑک آ مسافر کوچ و ایل پی جی گیس باؤزر نا نیام اٹی شکست نا سوب آن ہڑتوم آ گاڈی تیٹی خاخر لگا ہراڑان 11 بندغ زوال و 33 مسافر ٹھپی مسر۔ مرک 1122 نا رپورٹ نا رِد اٹ است ہسون شکست سہب انا 10 بجہ غا ہمو وخت پیش بس ہراتم تربت آن کراچی آہنوک آ مسافر بس (آزاد دشت کوچ) ہراٹی نرینہ، زالبول و چناتے تتون اوار 40 آن زیات مسافر سوار ئسر، مون آن بروک ایل پی جی باؤزر تون ڈوک لگا۔ ڈوک لگنگ آن دمدستی پد ہڑتوم آ گاڈی تیٹی خاخر لگا ہراڑان انسانی جان تا زیان اٹی ودکی مس۔ شکست نا حوال رسینگ تون مرک 1122 اورماڑہ و مرک 1122 پسنی نا ٹیمک 35 منٹ نا رسپانس ٹائم اٹی واقعہ نا جاگہ آ سر مسر، ہراڑے ریسکیو دستہ‘ فائر فائٹرز، ایدھی فاؤنڈیشن و ایلو فلاحی ادارہ غاک اسیجائی ریسکیو و کمکی آپریشن نا بناءِ کریر۔ پاک نیوی نا ہسپتال پی این ایس درمان جاہ نا انتظامیہ ہم دمدستی وڑ اٹ ایمبولینس و طبی کارندہ غاتے جاگہ غا راہی کرے۔ اسیجائی کمکی کارروائی تے ٹی خاخر ءِ کسفنگا و کل زہمی تے ہسپتال آتیا گدریفنگا‘ شکست اٹی ٹھپی مروک 33 مسافر آتیان 27 ٹھپی ءِ پی این ایس درمان جاہ ہسپتال اورماڑہ وخت اس کہ 6 ٹھپی ءِ پسنی ہسپتال آ گدیفنگانے ہراڑے ڈاکٹر و طبی کارندہ غاک اوفتے ہلہلہ ئی طبی کمک فراوان کریر۔ ہندا وڑ شکست اٹی زوال مروک 11 بندغ آن 8 میت ءِ اورماڑہ ہسپتال وخت اس کہ 3 لاش ءِ مرک ایمبولینس آتا کمک اٹ گدریفنگا‘ مرک 1122، پاکستان نیوی، ایدھی فاؤنڈیشن و ہندی فلاحی ادارہ غاتا گچین کوشست اٹ ریسکیو آپریشن نیمروچ نا 3 بجہ و 20 منٹ آ پورو کننگا ہراٹی وخت آ کارروائی کرسا چندی نہادی انسانی جان تے بچفنگا۔