پاکستان ڈیہہ اٹی امن کن پدریسہ کوشست آتے برجا تخانے،وزیر اعظم شہباز شریف
امن نا بحالی آن ملک شونداری نا پوسکن آ مزل آتسکان سر مننگ کیک، سیاسی و عسکری سرکڑدہ غاتا شریداری زرگزرانی شونداری کن اہم ءِ
اسلام آباد، وزیراعظم شہباز شریف پارینے کہ پاکستان ڈیہہ اٹی امن کن پدریسہ کوشست آتے برجا تخانے، ڈیہہ اٹی امن نا بحالی آن ملک شونداری نا پوسکن آ مزل آتسکان سر مننگ کیک‘ سیاسی و عسکری سرکڑدہ غاتا شریداری زرگزرانی شونداری کن اہم ءِ۔ زرکار آتا ویل آتا دمدستی ایسری کن بھرمی نظام اس اڈ تننگک۔ دا خیال آتا درشانی ءِ او امریکن بزنس کونسل آن تران کرسا کرے۔ او پارے کہ پاکستان نا زرگزرانی فائدہ غاتے ٹی امریکی زرکار آتا کڑد اہم ءِ، امریکی زرکار آک صنعت، کشت وکشار و آئی ٹی نا بشخ آتیٹی پاکستان نا کمک ءِ کرینو۔ پاکستان آ پت کننگ و زرکاری ءِ برجا تخنگ آ امریکی زرکار آتا منت وار اُن۔ او درملکی زرکار آتے ملک اٹی زرکاری نا پارسا پارے کہ زرکار آتا ویل آتا دمدستی ایسری کن بھرمی نظام اس اڈ تننگک۔ کنے دا ہیت انا جوان سماءِ کہ دفتری ول ویچڑیک زرکار آتے نااومیت کننگ ناسوب مریرہ‘ زرکار آتا روا انگا غاو تے چٹفنگ حکومت نا اولیکو اولیت ءِ، کل بشخ آتیٹی شفافیت ءِ پک کننگ کن سنبرینگوک اُن۔ ملکی زرگزرانی حالیت آ گپ و تران کرسا وزیراعظم پارے کہ 2023ء اٹی پاکستان ءِ دیوالیہ مننگ نا بھلو خطرہ اس مون تروک ئس‘ ولے خواری، ارادگی و جہد اتون ملک ءِ زرگزرانی تنکی آن کشان۔ زرگزرانی سوگوی کن لس بندغ بھلو قربانی تسنے، زرگزرانی سرسہبی کن مچ آ ٹیم انا اسیجائی کوشست آک ستاکڑزرہ‘ او ڈیہہ اٹی ساڑی بے چیٹی نا ذکر ءِ کرسا پارے کہ جہانی و خلیجی تنکی آن پد ہم پاکستان زرگزرانی سوگوی ءِ برجا تخنگ کن سنبرینگوک ءِ۔ پاکستان ڈیہہ اٹی امن کن پدریسہ کوشست آتے برجا تخانے، ڈیہہ اٹی امن آن پاکستان شونداری نا پوسکن آ مزل آ سر مننگ کیک۔ او پارے کہ ساڑی تنکی نا حالیت آتے ٹی حکومت راج نا نزور تپہ غاتے ریلیف تننگ کن سبسڈی پروگرام اڈ تسنے، لکھ آ جنوزان و چوریک حکومتی چکار نا حقدار ءُ۔ وزیراعظم حکومتی اصلاحات و گام گیج آتا رد اٹ پارے کہ بجٹ اٹی برآمد، مینوفیکچرنگ و کارپوریٹ سیکٹر نا شون اکن 400 ارب روپئی نا ٹیکس رعایت تننگانے، وخت اس کہ تنخواہ دار تپہ ءِ ہم ریلیف فراوان کننگانے۔ برآمد کروک آتے رعایتی فنانسنگ کن ایگزم بینک ءِ 4 ارب روپئی فراوان کننگانے و سمیڈا ءِ پورو وڑ اٹ بدل کرسا اسہ سوگو ءُ ادارہ اس جوڑ کننگا۔ وزیراعظم پارے کہ وڈی خوری نا سوب آن پاکستان ورکس ڈیپارٹمنٹ ءِ چٹفنگانے ہراڑان ارب آ روپئی تا بچت مننگ اٹی ءِ۔ ہندا وڑ یوٹیلیٹی اسٹورز نا کمک اٹ سبسڈی نا متکن آ نظام ءِ چٹفسا حقدار بندغ آتیکن ڈیجیٹل زرتس نا نظام درستی راستی کرفنگا ہرانا رد اٹ برجا سال 27 ارب روپئی حقدار آتسکان سر کننگا۔