اگہ پہہ مرین

داخہ نزور ہم مفہ کہ زوراور آن پنجہ کنیس، و داخہ زوراک ہم مفہ کہ ایلوفتے پنجہ ایتس۔

…………

دشمن، نا ڈغار نا پن ءِ بدل کننگ خواہک، گڑا بایدے نا ڈغار نا پن ءِ ہرکس زندہ تخے، اونا پن ءِ دوی نا وظیفہ جوڑ کے۔

…………

ایلو نا کاروبار و ترقی ءِ یات کننگ آن نئے نا کاروبار مریک، نئے شونداری اودے پات کپہ، تین کن کسر مل۔

…………

درونا مقابلہ ٹی اینو سیاست زوراوری خواپک۔ سیاست ءِ سیاست خلیک۔

…………

خوشی نا خڑینک ءِ ہمو پہہ مریک، ہرا خوشی نا سوب آتے پہہ مننگ نا لائخی تخک۔

…………

گاڈی نا بیلٹ اڈگڈ مننگ آن بچفک، تو علم ہم بندغ ءِ اڈگڈ کن الیپک۔

…………

براہوئی ادب ءِ پہہ مننگ کن اودے خواننگ و جوان خوانفنگ المی ءِ۔

…………

قوم مننگ نا نشانی بیرہ زبان مفک۔ اسہ ڈغار نا خواجہ مننگ، اسہ وڑ انا قربانی تننگ، فائدہ غاتا اسٹ مننگ قوم انا بھلا نشانیک ءُ۔

…………

تینا راست ءِ پہہ مننگ و پہہ کرفنگ کن ایلو نا راست ءِ پہہ مننگ اوڑان تینے پہہ کرفنگ باید ءِ۔

…………

ہچ ءُ بندغ اس پورو ءُ بندغ اس مفک، تینے بڑز کننگ کن ایلو نا پَوڑی ءِ امنا کروئی تمک۔

…………

نئے کل خراب مریرہ، نئے کل جوان، بس خرابی و جوانی نا معلومداری المی ءِ۔ خرابی آن نرنگ و نرّفنگ اسٹ آ زمواری ءِ۔

…………

گواڑخ نا بے بج آن ترکّنگ، خپا نا پاش کننگ، قدرت نا لائخی تے پاش کیک۔

…………

قدرت ءِ پہہ مننگ کن قدرتی آ گڑا تا چَس ءِ ہرفنگ اونا منتواری ءِ درشان کننگ باید ءِ۔

…………

اول قدرت نا فیصلہ غاتے قبول کننگے، پدا تینا فیصلہ غاتے قبول کرفنگے۔

…………

دوی پارفک، بولی منفک، است مہر کرفک۔

…………

خن تا حیاءاست انا حال ءِ پاش کیک۔

…………

نن و دے انا ساہت آک کل اکن اسٹ مریرہ۔ دیر اوفتیان امر فائدہ ہرفک، دا اونا کاریم ءِ۔

…………

بدی ءِ راستی خلیک۔ راستی نابودی تا سوب آن تینا جاگہ غا سلپک۔

…………

نی تین تون جوان مسس، ایلوفک نے تون جوان مرور۔

…………

نی تنیا مسس، ایلوفک نا مرور۔

…………

نشہ تکبر نا مرے یا اختیار نا، بندغ تینے ہم پہہ مفک۔

…………

نزور آ بندغ آ وار کننگ، زوراور نا نزوری تے پاش کیک۔

…………

سہب ءِ نیمرچ، نیمروچ ءِ شام، شام ءِ نن کنیک۔ ہندن چنکی ءِ ورنائی، ورنائی ءِ پیری کنیک۔ وخت انا شرفمندی و بندغ نا لائخی آن نئے وخت انا ساہت آک کٹرہ۔ نئے مرک آن پد بندغ گم گار مریک۔

…………

غریبی عیب اس اف۔ غریبی ءِ آہری گری نا کسر آ دننگ عیب اسے۔

…………

مسکین ءِ مڑپہ کہ نے آ مسکینی بف۔

…………

تینا دامون ایمون ءِ پہہ مننگ لائخی اس اف۔ تینا دامون ایمون اٹی تینا زمواری تا کچ ءِ پہہ مننگ لائخی ءِ۔

…………

بے باور آ بندغ ایلوفتے ہم بے باور خیال کیک۔

…………

نابود آ بندغ ایلوفتے نابود تکک۔

…………

ناملند آخا، نا حوصلہ ایلو ءِ ملنڈ اس مننگ آن تورک۔

 

ہفتئی تلار کوئٹہ

28 March – 04 April 2020