قدرتی گیس اکن پنی ڈیرہ بگٹی نا سفر (سیل و چکر)

انجینئر جمیل احمد کرد

0

Get real time updates directly on you device, subscribe now.

۔۔۔۔اولیکو بشخ

ڈیرہ بگٹی و بارکھان ارا ہندن ءُ ضلع ءُ کہ ہراڑے ہِننگ نا وخت متنے۔ دانا سوب دا ہم مننگ کیک کہ دا ضلع غاک بھاز مُر ءُ، یا وخت اس ڈیرہ بگٹی نا جئی آ حالیت آک دانا سوب مننگ کیرہ۔

دن تو ڈیرہ بگٹی ٹی جماعت اسلامی نا بھاز وخت آ ن کاریم ارے۔ و الخدمت نا تینا بھاز آ محنتی و پختہ ءُ ٹیم اس داڑے سال آتیان کاریم کننگ اٹی ءِ۔ تینا محنت و خواری و تحریک نا سوب آن ”الخدمت ڈیرہ بگٹی“ مچ آ بلوچستان اٹی بلکن مرکزی دفتر اٹی ہم اسہ جوان ءُ پن اسے تون یات کننگک۔ دانا سوب دوست محمد بگٹی صاحب نا داڑے الخدمت ریجن اٹی نائب صدر نا گچین مننگ ہم ارے۔ و ڈیرہ بگٹی آن بیدس پین شش ضلع ٹی اونا زمواری تے ودفنگا۔ ہراڑے الخدمت نا کاریم تیٹی گیشتری، مخلوق تون رابطہ و وخت آ سرجمی و الخدمت نا کارندہ غاتا گچین آ ہیل کاری کون آ معاملہ غاک اوار ءُ۔

منہ وخت مست ڈیرہ بگٹی نا سنگت آتا کوئٹہ غا بننگ نا وخت آ اسہ اوار ءُ خواست اسے نا رد اٹ دا فیصلہ مس کہ ڈیرہ بگٹی نا سرجمی اٹ دورہ ءِ کننگے۔ و ضلع نا سنگت آتا پاننگ آ دا ہیت آ ہم امنائی مسوسس کہ ہچ مف ڈیرہ بگٹی ٹی ارا دے اڈ کروئی ءِ۔

دا رد اٹ ای سنگت محمد بھائی آن ڈیرہ بگٹی آ ہنوک آ گاڈی تا بارو اٹ معلومداری ہلکٹ۔ گاڈی نا بست و بند کننگا۔ ای منہ وخت آن دا دورہ غاتے کننگ اٹی اُٹ۔ ہندا سوب آن سفر نا مچ آ بست و بند آتے کرینٹ۔ کُننگ، بیننگ، سفری خڑچ، چناتیکن گڑاس وخت، و خاص وڑ اٹ ڈیرہ بگٹی نا خاص آ بندغ آتے کن خواننگ و ٹیکی تا بندوبست کننگ۔ دا کُل اکن سفر آن پدی بننگ آ نن نا وخت بچاسس۔

ننکان اُرا غا سر مننگ تون سنگت محمد بھائی تون ایلو معاملہ غاتیاہیت و گپ اٹی اودے دا پاریٹ کہ ایلم کنا پژہ غاک بھاز بھلن مسنو و ریش انا ہم ہندا حال ءِ۔ و کوئٹہ ٹی لاک ڈاؤن نا سوب آن کل دکانک بند ءُ، ٹاکو اس خلسا پارے کہ داکاریمک نا ڈیرہ بگٹی ٹی مننگ کیرہ۔

خیر …… اونا دا ہیت ءِ منوئی تما ولے اودے پنت و شون کریٹ کہ کنے ڈیرہ بگٹی ٹی اڈ ہلنگ نا وخت آ لس تنظیمی کاریم تیان بیدس علاقہ نا کل آن بھلا عالم دین، جماعت نا بندوبستی، نواب صاحب ناخاہوت نا ہمو بندغ ہراڑتون ڈیرہ بگٹی نا بست و بند آک مریر۔ داڑان بیدس علاقہ نا سیاست دان، ضلع نا اختیاردار و الخدمت نا رضاکار آتتو ن خاص وڑ اٹ ملاقات کرفس۔

ہر ہمو سفر نا بارواٹ اُراٹی پاپرہ کہ ہراکان کنے ننکان پدی بروئی مرے۔ و اُرا والا تے دا خیال ہم مفک کہ ای کوئٹہ غان پیشن ہنانٹ۔ اؤ…… ہمو مچ آ سفر تا معلومداری مریک کہ ہراکان ای نن اسکان اُرا غا بفر۔ و سفر نا خبر اُرا والا تے ہموتم تمک ہراتم ای تینا سفر نا بیگ انا بارواٹ ارفوہ۔ درو ننکان دوانزدہ بجہ غا تینا اُرائی ءِ سفر نا گڑا تا بست و بند نا پاریٹ۔ و اونا چندی سوج آتا ورندی ءِ ہم ترسا کریٹ۔کُل آن بھلا سوج دا کہ داخہ دے ہراڑے مریسہ۔ دا سوج انا ورندی ءِ ای دن تسٹ کہ:

”نی اسہ دلیر ءُ کُرد اسے اُس و کنا ارا دلیر و زموار آ مارک (ہشت، و دونیم سال انا) نے تون ءُ۔ نے دا چنکا ہیت آتیا چرت خلنگ نا ضرورت اف۔ اؤ دا پاو کہ نے تون مسہ کسر ءُ ہرانے جوان لگے اودے ہرف۔

1۔چناتتون اوار کنا لمہ نا اُرا غا ہن۔

2۔تینا لمہ نا اُرا غاہِن۔

3۔یا ہنداڑے مر گڑا کنا یا تینا لمہ ءِ داڑے بٹنگ۔

دا وخت آ نن انا 1 بجہ ءِ کنے سہب انا نماز ءِ خوانوئی ءِ۔ اُرائی نا بست و بند آتے کننگ آ منت ءِ ہرفیٹ و سہب انا نہاری آن اودے آجو کریٹ۔ و تینٹ نماز نا تیاری ٹی لگاٹ۔

سفر نا بست وبند انتئے کہ ننکان مسوسس۔ سہب اتون بش مرسا مون دو کروئی اس و دیر ہم ہنداخس ئس کہ بیرہ مون دو کننگ مسکہ۔

8بجہ غا تیار مرسا ڈیور ءِ بننگ کن فون کریٹ۔ فرج آن گڑاس الار کشاٹ کنگٹ۔ الار کننگ کنے بھاز دوست ءِ و سہب و شام کنیوہ۔ ہچ مف ارا الار تو ضرور کنیوہ۔ ای نمے دا آزموندہ نا ہیت اس پاوکہ سہب اتون ارا الار کننگ آن پد اگہ نہاری و دے انا اِرغ ءِ کنپر ہم توای بینگن مفرہ۔

ڈیور نا انتظاری ئسٹ کہ احمد کارزان بش مس و کنے پٹنگ اٹی لگا۔ ٹی وی والا کمرہ اٹی برسا کنے خنا و کن تون بننگ کن تیار مس۔ ای اوڑان بُک اس ہلکٹ و پاریٹ تے کہ اگہ ڈیرہ بگٹی ٹی باسنی متوکہ تو ای تینا مار ءِ ضرور تین تون دریٹہ۔

اُرا نا خڑچ و چنا تا جیب خڑچی ءِ استو اُرائی ءِ تسوسٹ۔ ولے احمد کارزان ءِ سد روپئی پین ترسا پاریٹ کہ دا سد روپئی ناءُ، دا سوب آن کہ نی کنا بھلا مار اُس۔ و کنا داڑے مفننگ نا وخت آ اُرا نا سنبھالنگ نا زمواری ءِ۔ اودے پاریٹ کنا سفر نا کتاب و اینو نا اخبار ءِ اتہ گاڈی ٹی تخ۔ و نن مار باوہ پیش تمان۔ گاڈی ٹی گڑا تے تخان و لٹریچر والا کاٹن ہراٹی ارا پورو ءُ تفہیم القران، محمد عربیؐ، شش شش دانہ خطبات دینیات و دینیات نا انگریزی مٹ و بدل Towards understanding Isalm ءِ ای ہرفنگ کتوٹہ، اودے ہرفنگ کن گاڈی نا ڈیور ءِ کمک کن پاریٹ، احمد کارزان ءِ اللہ نگہبان پاریٹ و 8:30 بجہ غا نن ڈیرہ بگٹی کن راہی مسن۔ و ای دا دعا ءِ خوانسا کریٹ ”بسم اللہ و توکلت …… علی اللہ۔“

علی بخش پنی آ گاڈی نا ڈیور ہم بگٹی اس ئس۔ اوڑتون سلاہ غان پد فیصلہ مس کہ نہاری نن سبی نا بابا ہوٹل اٹی کینہ۔ ہرا مچے جوان ءُ ہوٹل اسے۔ کوئٹہ غان سفر نا بنا کننگ آن پد نن دشت آن گدرینگ انگ اٹی ئسن۔ ہرا وخت اسیٹی پٹ و بیابان اس ئس۔ ولے اینو پگہ آباتی زیات مننگ نا سوب آن شونداری کاریم و چندی ہاؤسنگ اسکیم آک دشت اٹی خننگرہ۔

و داڑتون اوار قومی سڑک نا ہڑتوم آ پارغا سوف، زڈدلو و شفتالو نا بھلو بھلو باغ ءُ۔ ہرا بھاز زیبداری کرینو۔ بلوچستان اٹی ہراڑے باغ ارے، ہموڑے جئی آ بندغ آک میوہ غاتا مُد و موسم اٹی قومی سڑک آ میوہ سودا کیرہ۔ کنا ہم ہراتم نظر دافتیا تما تو گاڈی ءِ سلفیٹ و ڈیرہ بگٹی نا سنگت آتیکن ارا کریٹ ہلکٹ گاڈی ٹی تخفیٹ۔ کوئٹہ غان مونی ہندا سڑک آ 50کلومیٹر اسکان موسم جوان ئس۔ ولے داکان مستی کرار کرار آ باسنی زیات مرسا ہنا۔

دشت آن گدرینگ انگ وخت آ یخ ءُ تہو اس چکنگ ئس۔ کولپور آن مستی زبیدار آ بولان…… دا جاگہ نا بڑز انگا مشک ریل انا 18 ٹنڈیل بولان نا دامان ءِ، ہرا ایشیا ٹی انگریز آتیکن عجوبہ اسے۔

مش تا نیام آن کرن آتیان سفا و تازہ دیر انا چکل وہرہ، مش تا کولانا کانڑک…… دا کل قدرت نا زیبداریک ئسر کہ ننے خاچنگ کن اسل الیتوس۔ و نئے اخبار و کتاب خواننگ کرین کہ دا زیبائی تے سیل کننگ ولدا خبر اف ہرا وخت نصیب اٹی مرے۔ دا ندارہ غاک طبیعت اٹی عجب ءُ بدلی اس اتیرہ۔ و رب انا شکر ءِ ادا کننگ نا گیگ فراوان کیرہ۔ و دا جاگہ نا کنج و کونہ۔ سبحان اللہ و بحمدہٖ، سبحان اللہ العظیم۔

مچھ کوئٹہ غان 60کلومیٹر ءِ۔ ہنداکان موسم بدل مریک۔ دا باسنی ٹی ننا سفر برجا ئس۔ و 11بجہ غا سبی ٹی باباہوٹل آ سر مسن۔ دا سڑک آ نمے ارغ کننگ کن پہلوان ہوٹل، و چا و نہاری کن امداد و باباہوٹل ملک۔ داسہ نما منشا کہ ہراڑے کارے۔ پہلوان ہوٹل اسہ روایتی و مست انا ہوٹل اسے۔ داڑے چنکا چنکا ساہدار تے تڑسا روسٹ کننگک۔ اوفتے کُننگ کن مُر مُر آن مخلوق بریک۔ دانا مون اٹی امداد و بابا ہوٹل ہندن ءُ ہوٹل ءُ ہرا داسہ پوسکن جوڑ مروک ءُ۔ پاٹ اٹ بھاز زیبدار جوڑ کننگانو۔

داڑے اِرغ تو ملک ولے مزہ دار افس۔ اؤ…… نہاری تا جوان ءِ۔ و ای سلاہ ایتوہ کہ داڑے نہاری کبو۔ منہ سال مست ننا اسہ جماعتی سنگت اس، ڈاکٹر مشتاق مانگھٹ صاحب، ہرا اینو پگہ الخدمت فاؤنڈیشن اٹی مرکزی سیکرٹری جنرل ئس۔ سبی نا دورہ نا وخت آ ہندا ہوٹل اٹی ننے نہاری کرفے۔ ہرا مخلوق ءِ بھاز دوست بس۔ دا جار نن ہم ہنداڑے جوان ءُ نہاری اس کرین۔ و ولدا راہی مسن۔ ڈیرہ بگٹی کن کنے اسہ ہم سفر اسے نا ضرورت ئس۔ الخدمت ریجنل منیجر بلوچستان عبداللہ جان کاکڑ صاحب و ڈائریکٹر مواخات پروگرام غلام جیلانی نن تون اوار مننگ نا پاریر۔ ولے اسہ دے اس مست ہڑتوم آک بشخنداری خواہسر۔ راہی مننگ آن مست ننکان یک بجہ غا فیس بک مییسنجر آ ایلم خاوند بخش مینگل صاحب (امیر ضلع نصیرآباد جماعت اسلامی) ءِ آن لائن خناٹ تو دم دستی اودے تین تون سفر نا پاریٹ تو او اؤ کرے۔ و ہندن دا مرغن آ سفر کن کوئٹہ غان تو آخا، 300 کلومیٹر نا مُری آن اسہ ہم سفر اس دو تما۔

خاوند بھائی اسہ گچین ءُ بندغ اسے۔ الخدمت اٹی صدر نا منصب آ مسنے۔ مالی وڑ اٹ نیامیکو تپہ غان تعلقداری تخک ولے است انا سخی اسے۔ تب اٹ مسخرہ کروک و عاجز اسے۔ کل آن بھلا جوانی تے دادے کہ انسان نا بھاز قدر ءِ کیک۔ سبی آن راہی مسن تو اودے فون کریٹ و تیار مننگ نا پاریٹ تے۔

سبی آن ڈیرہ مراد جمالی کساس ارا گھنٹہ نا سفر ءِ۔ دا جاگہ نا قومی و صوبائی اسمبلی نا سیٹ آتیا ہر وخت جمالی خاہوت کٹسا بسنے۔ پنی آ بند غ آتیٹی خواجہ میر ظفر اللہ جمالی ہرا وزیراعظم پاکستان ہم مس۔ ولے بلوچستان نا کِسہ نمے ہر جاگہ ہر ضلع ٹی اسہ وڑ نظربرو۔ ڈیرہ مرادجمالی ٹی بھلا سڑک آن گدرینگسا نم اندازہ خلنگ کیرے کہ گدرینگوک آ چندی وخت آتیان حکومت اٹی مروک آ خاہوت آتا جئی آ آبادی نا ویل آتتون اخس خڑکی مسنے۔

چندی وخت آن بازار نا نیام آن گدرینگوک آ سڑک جاگہ جاگہ غان پنوک ءِ۔ نم گاڈی اسیٹی سفر کننگ اُرے یا بیش گاڈو سیٹی ہیت اسٹ ءِ۔ ہڑتوم آ سواری تیٹی جمپ و جھول ہنداخس کنیرے۔ داسڑک آ سر مننگ تون ای خاوندبخش مینگل ءِ فون کریٹ و بھلا سڑک آ بننگ نا پاریٹ۔ ہراڑے او نیم کلاک اسینا وخت خواہس۔ دا وخت آن ای فائدہ ہرفسا ڈیرہ مراد جمالی ٹی تینا ریش ءِ جوڑ کننگ نا فیصلہ ءِ کریٹ۔ و حجام نا سیٹ آتولوک تنگان ہناٹ، و سماکریٹ تو ریش جوڑ مسوسس۔ و ہندا نیام اٹی خاوند ایلم ہم سر مسوسس۔ ڈیرہ مرادجمالی آن 20-25 کلومیٹر نا مُری آ ضلع جعفر آباد و داکان مچے مُری آ ضلع صحبت پور ءِ۔ و دا ہمو ضلع ءِ ہرانا سیم آک ڈیرہ بگٹی تون لگرہ۔ ہرا ضلع غاتا ای ہیت ءِ کریٹ دا بلوچستان ناکشاری ضلع غاک ءُ۔ دادے ”گرین بیلٹ“ ہم پارہ۔ و دا علاقہ غاتے پٹ فیڈر نہر آن دیر رسینگک۔ پٹ فیڈر نہر گڈو بیراج آن پیش تمک۔ اسہ اندازہ اسیٹ پٹ فیڈر نہر آن 85000 ایکڑ ڈغار سیردیر مریک۔ اسہ ایکڑ 2.47 جریب مریک۔ دا وڑ اٹ 456000 جریب آن زیات ڈغار دیر خنک۔

ہفتئی تلار
تاک: 26
16-10 جولائی 2021ء
پنہ: 04

Get real time updates directly on you device, subscribe now.

Leave A Reply

Your email address will not be published.