ملک ناز نا گد                          1

اینو ولدا است انا کنا درکارہ ئس۔

ایہن تو حالیت آک امن ئسر، بمب تراک و راکٹ باری نا دور چٹاسس۔ وخت وخت اس سم کاری نا یکہ دُکہ ءُ واقعہ اس مسکہ۔ وطن اٹ مُر مُر وخت اس جنگ جھیڑہ غاتا حال بسکہ۔ ’شعبہ حادثات‘ آن کنا ڈیوٹی ءِ بدل کرسا مڑدہ خانہ ٹی خلنگاسس۔ ہراڑے بے وارث آ ٹھپی ٹوری آ مڑدہ غاتا خیالداری مسکہ۔ دفتر اٹ کنا کاریم کاریز، نالہ، دُپ و پٹ و بیوان تیان دو بروک آ جون تے رجسٹر اٹ نوشتہ کننگ ئس۔ اگہ دافتے وارث متوکہ تو اسہ خذمتگار و انسان دوست تنظیم اس دافتے بے سما ءُ قبرستان اسے ٹی جہہ و جاگہ کریکہ۔ ڈیوٹی بیگہ نا ئس، دفتر نا مون آ بھلا بھلا بلف آک دے آنبار لگارہ۔ دا گچین آ روشنائی ٹی ہم خلیس است اٹ پناسس۔ دن کہ بے گناہ ٹھپی ٹوری آ لاش تا ہروہ کنا زنچک اٹ ہلے۔

ایڑھ ایلم تیٹی ای چنکی آن خلیسٹہ، اُراٹی کل کنا خلیس آ ملنڈ کریرہ۔ ناگمان گڑاسے نا تمنگ آن ہُجم کریٹہ۔ دا وارڈ اٹ ڈیوٹی کننگ کن ای تیار اَلوٹہ، ولے ڈومیسائل ڈاکٹر آتیان ہم کس داڑے ڈیوٹی کتوکہ۔ مڑدہ خانہ نا تہہ آن دڑ دڑ انا توار کنا خف تیٹی پناکہ۔ ای بھاز خلیسٹہ، ولے اینو نا خلیس جتا ئس۔ ای کڑسی آ تولوک فکر اسے ٹی گم ئسٹ۔ ایہن ہم ہسپتال نا دا جاگہ خلیس نا چیدہ ئس۔ اسہ وار مون اٹ ہم ای ہندن سٹی بھاز خلیسوسٹ۔

اسہ دے ننکان بھاز طوفانی ءُ تہو اس چکاکہ، خلیس آن ہُرے آ تنگان ہناٹ۔ ہمو نن کنا فکر انا خنک اسہ بھاز خراب ءُ تغ خنار۔ نیم شف آ سما کریٹ، خید اٹ اسٹ ئسٹ۔ خلیس آن گٹ کنا پاٹ آنبار بارسوسس۔ دن کہ ڈکھ آتا باریم کنا کاٹم آٹے۔ تغ چک آنبار بال کرے۔ دا پہلو اے پہلو کننگ نا کوشست آن پد بش مسٹ، وضو کریٹ، استان آ لیٹوک یاسین شریف ءِ است اٹ خوانسا کریٹ۔ ہندن خواناٹ کہ جوڑک کنا ہم سرتوسہ۔ ہندن محسوس مسکہ کہ اسہ غیبی ءُ زوراور اس کنے خلیفیکہ۔ چپ انگا جوڑ تے سرفنگ کن کنے گٹو کریکہ۔ ہنداڑتون ملا سہب انا بانگ ءِ تس۔ خلیس اٹ است خواہسکہ چیہانٹ اس کیو، ولے پر انگا اُراٹی چیہانٹ خلنگ آن بے شرف مسٹہ۔ حیران ئسٹ امر کیو۔ خلیس است اٹ جاگہ کریسس۔

ناگمان شار اٹ خطرہ نا گوگو نا توار پنا۔ مسیت آتیان اعلان مننگ ئس کہ شار اٹ دفعہ 144 لگانے۔ خبڑدار اگہ سیاسی پارٹی یا تنظیم آک مچی اڈ تسر۔

نیم تہار آ چرک اٹ سہب تمنگ نا گمان ئسکہ۔ کمبل ءِ مُر چغل تسٹ، ہناٹ، لمہ جیجا نا لیپ اٹ تینے ڈکاٹ۔ خلیس نا لڑزہ غان کنا دنّان تا کڑکارہ ئس۔

جٹ اسے آن پد مُر مُر آن سم کاری نا توار بنا کرے۔ داسہ اُراٹی ہرکس نا است اٹ خلیس تما، ولے سما اف انتئے کنا است انا خلیس ایسر مس۔ دن کہ دا ناجوڑی آن کنا جان چٹا۔ است جم مسٹ۔ جٹ اسے آن پد نن کل حویلی ٹی بسن، مُر مُر آن جڑابڑا نا توار خڑک برسا کریکہ۔ ہندا سما تما کہ دن کہ گڑاس گرسا دیر۔ دہ بجہ غا سما تما کہ سرکار اسہ سیاسی پارٹی سے نا باسک و اونا سنگت آتے بغاوت و سرکار آن نمن مننگ نا ڈوہ اٹ خلکنے۔ سیاسی ورکر آک و کالج و یونیورسٹی نا خوانندہ غاک ہر شار اٹ سرکاری ماڑی و سرکاری آ گاڈی تے خاخر تننگ ءُ۔ ورناک تینا است انا لار ءِ کشنگ کن سڑک آتیا بھلو چنکو خل تالان کرینو۔ بجلی نا کمبہ غاتے سڑک آتیا مرغن بٹینو۔ہنوک بروک آتیا رکھ خلنگانے۔ چندی سیاسی پارٹیک و خوانندہ غاتا تنظیم آک مسہ دے انا پہیہ جام ہڑتال نا پڑو ءِ کرینو۔ منہ دے مست ہم سرکار پڑو کریسس کہ وطن اٹ ہر وڑ انا شرپسند آتے دزگیر کرینے، سرکار پنچ سد، ہزار بندغ دزگیر کرسا اوفتا برخلاف ہر وڑ انا مقدمہ جوڑ کریسس۔ ولے اینو اسہ وار ولدا ہمو جنگ جھیڑہ غاک کاٹم ہرفیر۔ ہفتہ دہ دے انا بدامنی آن پد خبر آتیٹی پاننگا کہ حالیت آک جوان مسنو۔ وطن اٹ پین ہچ ءُ ویل اس اف۔ دا نیام اٹ دہ دوانزدہ سال گدرینگاسس۔

اینو ای تینا ڈیوٹی آ ہسپتال آ بسٹ، ہسپتال اٹ دا ویل آتیان پد اسہ بھلو خلیس اس تالان ئس۔ دفتر ءِ ملنگ تون جان کنا لڑزا، خلیس آن دفتر نا درگہ و دریچہ غاتیا نظر بٹیٹ، کل بند ئسرہ۔ مڑدہ خانہ ٹی پترینگاٹ، گڑاس مڑدہ چر اٹ تخوک ئسرہ، ولے خننگ تون چیہانٹ اس خلکٹ، و چپ کریٹ۔ بھلو بلف اس لڑونج روشنائی تالان کننگ ئس۔ دیوال نا خڑک آ اسہ ٹیبل اس تخوک ئسکہ۔ دریچہ نا خڑک آ اسہ بینچ اس تخوک ئس۔ کنا خڑک آ اسہ دتری ءُ بلوچی کشیدہ کروک ءُ زیبا ءُ گد اس تماسس۔ شعبہ حادثات اٹ ناجوڑ آتا انت گڑاس کہ سلیسکہ تو ہمو کل مڑدہ خانہ ٹی اسہ اسٹور اسے ٹی تخنگارہ۔ ہرانا چارج کن تون ءِ۔ دا گد ءِ ہم ہموکان مون تسوسر، ای سوچ اٹ تماٹ کہ دا امر ءُ گودی اسے نا گد ءِ۔ انت ویل اسے ٹی دتر تیٹ لوڑنگانے۔ ہمو گودی امر گیرام کرینے تے۔ دفتر اٹ چپڑاسی آن سوج کریٹ، او پارے ”جٹ اس مست دادے شعبہ حادثات آن خناٹ۔“ دفتر نا گڑاک تینا جاگہ غا تخوک ئسر۔ ہستین چپ چپانی ئس۔ کنا سوچ اٹ قبرستان نا گمان مسکہ۔ مڑدہ غاتا ہروہ نا خیال است اٹ دڑنگاسس۔ خلیس نا اسہ جتا ءُ رنگ اس کنا ہروہ اٹ جاگہ کرے۔ تینا پیشانی ٹی خلسا ہندا خیال ءِ بدل کننگ نا کوشست کریٹ۔ است انا لڑزہ ءِ کرار کننگ کن میز آن سنگ مرمر نا خل ءِ ہرفیٹ، دوٹی کریٹ، جٹ اسے آن گڈ نیم روشنائی ٹی خشک خشک نا توار اس ودی مس۔

ای تینے کڑسی نا زی آ کجریفیٹ۔ سرنگ ہم کتوٹ۔ گوریچ و یخ اٹ اسہ پدین ءُ خل/ اس کنا ہَڈ آتیٹی ہلک۔ انتئے کہ ای مڑدہ خانہ ٹی توار توار آن خلیسٹ۔ داسہ کنا چنکا است بے صبری ٹی ارٹمیکو چرچر انا توار ءِ بننگ کن بے جارات ئس۔ جٹ اسے آن پد جائی اسُل سفا ہوغنگ نا توار بس۔ ای کرار آ خن تے ملاٹ، بیدس کاٹم ءِ سرفنگ آن چارماکنڈ دفتر نا ہر کنج انا جاچ ءِ بھاز خوڑت ہلکٹ، ہر گڑا تینا جاگہ غا بے سما تموک ئس۔ بے جان آ گڑا تیان اسٹ اسے نا ہم سرنگ نا گمان اَلوکہ۔ ای محسوس کریٹ کہ اسہ غیبی ءُ طاقت اس کنا پد آن کنے بے جارات کریکہ۔ درگہ غان پیشن اُراٹ، مچے مر بندغ آتا ہن بر برجا ئس۔ ولے کنے ٹی داخہ وس اَلو کہ ای کوک و پاڑو کیو یا کس آن کمک خواو۔

ناگمان دفتر اٹ اسہ بھلو توار اس پنا، ہرا کہ دفتر اٹ چپ انگا ندارہ ءِ اسہ خلوک ءُ توار اسے ٹی بدل کرے۔

ای ابو، یا حسین نا توار تون چیہانٹ کریٹ، بینچ انا زی آن جپاٹ۔ ای حیرانی اٹ سرمٹ نا ڈغار آ سنگ مرمر نا خل آ ہُراٹ، شیشہ نا ٹکر آتے خناٹ، تینا خالی آ دُو ءِ ہُراٹ، ہرافتیان کہ دا خل یلہ مسوسس۔ تینا خلوک آ است ءِ چپ ترسا شیشہ نا بورفتہ غاتے مچ کریٹ۔

کنا سرنگ آن کنا جان اٹ ساہ تما، کنا مزغ آن اسہ بھلو باریم اس شیف تما۔ ہندن داسہ ای دفتر اٹ دانگ اینگ لپوسنگ ءِ بنا کریٹ، دریچہ نا خڑک آ ہناٹ، روشندان تے ہُراٹ، سیل بند ئسر۔

درگہ نا جاچ ءِ ہلکٹ، ملوک ئس، اونا کاٹم اٹ اسہ بھلو بلف اس لگاکہ، رہی آ تے اسہ بھلو الماری اس تخوک ئس۔ اونا با ءِ ملاٹ، ہُراٹ، اونا تہٹی ہم ہچ اَلو۔ بنچ آ دو خلکٹ، ہُراٹ، او اسُل بے جان ئس۔ میز آ ہم دُو خلکٹ، ہُراٹ، او میز اس ئسکہ، کڑسی آ تولنگ آن مست انا ہمو دتری بلوچی کشیدہ کروک آ گد ءِ ہُراٹ۔ ہڑتوم آ دوتیٹی گد ءِ ہرفیٹ، اودے جوان چنڈاٹ، ڈغار آ تالان کریٹ، و تل تل آتے نظر شاغاٹ، داسہ کنا ایمان جاگہ غا بس۔

او اسہ گچین و زیبا ءُ گد اس ئسکہ۔ ہرانا رہیک رنگی آ دسک اٹ خوڑت کشیدہ کننگاسر۔ ولے دتر نا بھاز انگا لپ آک اونا ٹمکوک آ شیشہ غاتے بے نور کریسر۔ ہُرسا ہُرسا بے توار کنا با غان پیش تما۔ ”اے کنا مہربان آ خدا! ننا امر گچین ءُ کلچر اسے۔ دا امر ءُ گوادی اس مسنے، اخس است انا ہُب اٹ داڑا نن و دے خواری کرو ءِ، ولے ابو ءِ ابو ءِ قسمت داڑا ہم دتر نا لپ آک ءُ۔ اسہ وار اتون گد کنا دُو آن یلہ مس۔ دن کہ اسٹ اس دادے کنا دُو آن چکے۔ خلیس آن بے ساہ مسٹ، با کنا بارس، دُوک کنا چوٹ مننگ ئسر، کہ ای زُو زُو پرس و بلوچی آ گد ءِ ہرفیٹ مون چرمٹ کریٹ۔ دفتر آن پیش تماٹ۔ جوان ٹکر اس مر سلیسٹ۔

گھڑی آ تینا ہُراٹ، تینا ایلم نا بننگ نا انتظار ءِ شروع کریٹ۔ ہراتم آن کہ کنا ڈیوٹی داڑے لگانے، کنا اسہ سوشل ءُ ایلم اس کنے دیک اتیک۔ کنا ڈیوٹی وخت اس سہب اتون وخت اس بیگہ تون لگاکہ،و لے اینو خدا نا شکر ءِ کشاٹ جوان ءِ کہ اینو کنا ڈیوتی ننکان اَلوکہ، نہ تو کسکٹہ۔

ڈیوٹی نا بنا ٹی ای چندی وارڈ آتیٹی ناجوڑ آتا ارّفنگ کن ہناٹہ، اوفتتون حال حوال کریٹہ۔ دا کنا زند انا ویل و ڈکھ آتے ایسر کننگ نا اسہ سوب اس ئسکہ۔ منہ وخت آن پد ہسپتال اٹ چندی نرس و ڈاکٹر آتا چھٹی نا سوب آن کنا ڈیوٹی وارڈ آتیٹی ہم دے اِرا دے اکن لگاکہ۔

اسہ دے مڑدہ خانہ ٹی بے وارث آ لاش تیان اخس کہ لیپ و کمبل ٹھپی ٹوری جون نا پچ چوٹ سدری کوٹ انت اس کہ مچ کننگاسس، ہمو کل ءِ خلق اٹ مسہ دے ئی آ فری میڈیکل کیمپ آ راہی کریٹ۔ دیچہ انتئے ہمو دتری آ بلوچی گد ہموڑے سلیسوسس۔ داسہ بیدس دلیل آن کنا است شاہدی تسکہ کہ خلیس ہندا بلوچی آ گد انا سوب آن ءِ۔ داسہ ای است اٹ تینے تینٹ پاریٹ کہ مڑدہ خانہ نا ہمو اسٹور اٹ ہچ ءُ وڑ اسے ٹی ہنوئی اف۔ ہراڑے کہ دتری آ بلوچی گد تخوک ءِ۔

ایلم نا موٹر نا پمپ انا توار مس، ای خلیس نا سوب آن سوچ آتیٹی مین ہناسٹ، ددینگاٹ، گاڈی نا درگہ ءِ ملاٹ، توسٹ، تولنگ تون رنگ کنا پوشکن ہڑسینگا۔ دم کنا بند مس۔ کن کن بروک آ ایلم سوج کرے، ”خیر ءِ، ایڑھ! نی خلوک خننگسہ؟ اگہ ویل اس ارے کنے پا۔“ ہیت ءِ دانگ اینگ ول تسٹ۔ اِرغ آتے شاغار، اِرا باخو کنگٹ، خاچنگ نا وخت آ تینے آ تینا گد ءِ شاغاٹ، آسراتی اس خناٹ۔

پگہ غا ڈیوٹی آ بسٹ، ایم ایس سختی اٹ ننے وخت انا قدر ءِ کننگ نا پاریسس، بننگ تون خذمتِ خلق اٹ گٹ مسن۔ اینو نازل قول کریسس کہ او ہم خذمتِ خلق اٹ تینا پن ءِ نوشتہ کیک۔ نازل ہم کن تون اوار میڈیکل نا خوانندہ مسڑ اس ئسکہ۔ اونا لمہ باوہ ناجوڑ ئسرہ۔ تینے آن اسٹ اس ئسکہ۔ وطن اٹ ہڑدے نا جنگ و جھیڑہ، قوم انا ورنا تا بے گوائی، خلنگ پلنگ نا سوب آن میڈیکل کالج ءِ اِلا۔ اودے انسانیت نا خذمت کننگ نا چنکی آن شوق ئسکہ۔ ولے او اینو اسکان فری میڈیکل کیمپ آتیٹی دن ءُ خذمت کتویسس۔ داسہ اونا لمہ باوہ نا طب مچے بھاز جوان ئس، او اینو بننگ نا قول کریسس۔

ای دفتر آ بسٹ، نازل بتو، ای کڑسی آن بش مسٹ، مڑدہ خانہ نا تہٹی پترینگاٹ، ہمو جاگہ غا ہناٹ، ہراڑے کہ دتری آ بلوچی گد تخوک ئس، ای گد ءِ خننگ تون ولدا خلیسٹ۔ ہندن خلیس آن وار اس دفتر اٹ وار اس مڑدہ خانہ ٹی پترینگاٹہ۔ ہراڑان خلوک آ است ءِ مچے بھاز کرار رسینگاکہ۔

پیشن ہننگ بننگ نا وخت آ اسہ پیر ءُ بلہ اس خناٹ، ہرا کہ کنا دفتر نا درگہ غا جوکہ ئس، ارّفیٹ:

”بلی نی داڑے انت کننگ اُس؟“

”ہچ کپرہ کنا مسڑ! بس دم کشوہ۔“

”گڑا نی وارڈ، دفتر یا ایلو بینچ آتیا انتئے تولپیسہ؟“

بلی پارے ”ہال، کوٹھو آتیٹی ناجوڑ، ٹھپی آبندغ آک ءُ، است خراب مریک۔“

ہسپتال نا تہٹی گڑاس ہندن ءُ کیمپ جوڑ کننگاسس، ہرافتیٹی ہمو بندغ آک رہینگارہ۔

بلہ نا پارہ غا ہُراٹ، خڑینک آتے تینا سفا کرسا کنے پارے:

”او کنا مسڑ! ہال و وارڈ آتیٹی اسہ ایلوڑان ود ڈکھیا ءُ بندغ تمانے، اوفتا ڈکھ آتے خننگ آن کنا است خوڑت مس، ای تنیا مننگ خواوہ۔“

ہفتئی تلار،

تاک26

04 July 2020

پنہ، 5