صوبہ نا الس نا احساسِ محرومی ءِ چٹفنگ نا کوشست کننگ انگ ءِ، عمران خان

اسلام آباد (آن لائن ) وزیرِ اعظم عمران خان پارینے کہ صوبہ بلوچستان اٹ مکمل امن و ایمنی ءِ پک کننگ و راجی و اقتصادی شونداری ءِ حکومت اولیت ایتک، بلوچستان نا اُلس نا احساسِ محرومی تا ہروڑ اٹ سما ءِ ننے۔ ہرافتے مُر کننگ کن ہر وڑ نا کوشست کننگ انگ ءِ۔ وزیر اعظم نا کماشی ٹی تدوک آ نیشنل ڈویلپمنٹ کونسل (قومی شونداری کونسل) نا ارٹمیکو دیوان اڈ ہلک۔ دیوان اٹ بنجائی وزیر تیان شاہ محمود قریشی، اسد عمر، محمد حماد اظہر، علی حیدر زیدی، عمر ایوب خان، سلاہکار آتیان ڈاکٹر عبدالحفیظ شیخ، عبدالرزاق داود، وزیرِ اعلیٰ بلوچستان جام کمال خان بشخ ہلکر۔ چیف آف آرمی سٹاف جنرل قمر جاوید باجوہ و ڈی جی آئی ایس آئی لیفٹنٹ جنرل فیض حمید، خصوصی کمکار لیفٹنٹ جنرل (ر) عاصم سلیم باجوہ، و ایلو بڑزکو کمامدار آک بشخ ہلکر۔ دیوان اٹ قومی شونداری ایجنڈہ خاص کر بلوچستان نا پد تمنگ و مُر انگا علاقہ غاتیٹی ہننگ بننگ، دِیر انا وسیلہ غاتا جوان وڑ اٹ کاریم اٹ اتنگ، کشت وکشار، توانائی، بارڈر مارکیٹ آتا جوڑ کننگ و گوادر پورٹ آن ہر وڑ اٹ فائدہ ہرفنگ کن جتا جتا ڈٹ آتیا سجفنگ انگ ءِ، بلوچستان نا پد تموک آ علاقہ غاتا شونداری نا بابت اٹ وزیرِ اعظم ہیت کرسا پارینے کہ صوبہ بلوچستان اٹ پورو وڑ اٹ امن و ایمنی ءِ پک کننگ و راجی و اقتصادی شونداری ءِ حکومت اولیت ایتک۔ او پارینے کہ مالو بلوچستان ءِ تو مالی وسیلہ تو تننگانے ولے اُلس نا آسراتی و آسودگی ءِ جوان وڑ اٹ کاریم اٹ اتنگ آن گوجالنگانے۔ ہراڑان نہ بیرہ صوبہ نا بھلو بشخ اس پد تمنگ نا گواچی مس وخت اس کہ اُلس اٹ احساس محرومی اس ہم ودی مس۔ وزیرِ اعظم پارینے کہ ننے بلوچستان نا اُلس نا احساسِ محرومی تا جوان سما ءِ ہرافتے مُر کننگ کن ہر وڑ نا کوشست کننگ انگ ءِ