بنجائی و صوبائی حکومت نا سیندک معاہدہ ءِ ودفنگ آ امنا، اپوزیشن نمن

کوئٹہ( آن لائن ) بنجائی حکومت بلوچستان نا علاقہ سیندک اٹ خیسن و مِس پٹنگ نا ڈٹ ءِ پین 15 سال کن چینی کمپنی نا حوالہ کننگ نا تیاری تے بنا کریر ہراڑا صوبائی حکومت ہم راضی ءِ، ولدا ہم اپوزیشن اعتراض کرینو۔ ضلع چاغی نا علاقہ سیندک اٹ خیسن و مِس نا مڈی 1960 ٹی پاش مسوسُس و دا ڈٹ آ باقاعدہ وڑ اٹ کاریم نا بنا 1989 ٹی مس وخت اس کہ سیندک آن پیداوار نا عمل 1995 ٹی بنا مس۔ میڈیا رپورٹ آتا رداٹ سیندک کاپر اینڈ گولڈ پراجیکٹ کن سیندک میٹل لمیٹڈ و چینی کمپنی ایم سی سی نا نیام اٹ مروک آ معاہدہ نا وخت 31 اکتوبر 2022 ٹی مننگ اٹی ءِ، او دا معاہدہ ٹی 15 سال ودکی کن صوبائی حکومت تو امنائی ظاہر کرینے ولے بلوچستان اسمبلی ٹی اپوزیشن جماعت آک دا ویل آ برانز کننگ اٹی ءُ۔ بلوچستان اسمبلی ٹی اپوزیشن جماعت آک پارینو کہ صوبائی حکومت ہاوس ءِ اعتماد اٹ ہلنگ آن بیدس 15 سال نا معاہدہ سائن کننگا، سیندک ءِ ہڑتوم آ دو تیٹی آخا وخت اس کہ ہڑتوم آ نت تے ٹی پُلنگ انگ ءِ، ضلع چاغی نا پد تمنگ انتئے مُر مننگ اٹی اف، شونداری کاریمک انتئے مننگ اٹی افس۔ بلوچستان حکومت پارینے کہ سیندک پروجیکٹ نا مائننگ لیز نا معاہدہ مالو آن 2025 اسکان ءِ، و حکومت دا بابت اٹ ہچءُ معاہدہ اس کتنے۔ ایلو کنڈآ سیندک کاپر اینڈ گولڈ پراجیکٹ حکومت پاکستان نا کمپنی سیندک میٹل لمیٹڈ و چینی کمپنی ایم سی سی نا نیام اٹ مروک آ معاہدہ نا رداٹ چلینگ انگ اٹی ءِ۔ چینی کمپنی پارینے کہ 1995 آن دا وخت اسکان ضلع چاغی نا شونداری کن 55 لکھ ڈالر یعنی کم از کم 92 کروڑ روپئی کننگانے۔