صحافت نا بناوردوم 19
حفیظ ساحل
Get real time updates directly on you device, subscribe now.
ہفت روزہ ”الپینچ“ بانکی پور:۔
مولوی رحیم الدین فروری 1885ء اٹی بانکی پور آن ہفت روزہ ”الپینچ“ نا بنا ء ِ کرے، اخبار ”اودھ پنچ“ نا ڈول و بھاز انگا اخبار تا بنا مس، ولے دا ڈول انا اخبار بانکی پور اٹ اَلو۔ ”الپینچ“ بھلو پن اس کٹا۔ بوگ شوگی نوشت آتیان بیدس ملک انا حالیت نا ہم بھاز انگا نوشت آک داٹی شینک مسرہ۔ دا پرچہ ٹی نظم و نثر ہڑتوم آ بشخ آک شینک کننگارہ۔
توئی ”تکمیل الحکمت“ لاہور:۔
میوہسپتال لاہور نا سرجن ڈاکٹر سید امیر شاہ ابو عبید اللہ غلام نبی و حکیم احمد علی اواری اٹ لاہور آن توئی ”تکمیل الحکمت“ نا بنا ء ِ کریر، دا پرچہ ٹی مسلمان تا نقطہ نظر اٹ فن طب انا بابت متکن قدیم و جدید علم انا بارو اٹ شینکاری آ زور شاغنگاکہ۔ بھازآ ناجوڑی تا پیدواری کننگاکہ و اوفتا درمان ء ِ ہم پاننگاکہ۔ الس کن جان دراخی نا باور اٹ آسان ء ُ نسخہ شینک کننگاکہ۔
توئی ”زمیندار“ گوجرانوالہ:۔
جنوری 1886ء اٹی منشی محبوب عالم گوجرانوالہ غان توئی ”زمیندار“ نا بنا ء ِ کرے، دا نا پورو پن ”زمیندار و باغبان و بیطار“ ئس۔ 24 پنہ غاتیا تالان دا تینا وڑ انا اولیکو اخبار ئس، ہراٹی کشت و کشار، صنعت و حرفت ساہدار تا درمان باغبانی و گچین وڑ اٹ بج آتا تیاری نا معلومداری شینک کننگاکہ زمیندار و کشارگر تے کن دا اسہ بھاز گچین ء ُ رسالہ اس ئسکہ۔
ہفت روزہ ”پیسہ اخبار“ گوجرانوالہ:۔
1886ء اٹی منشی محبوب عالم گوجرانوالہ غان ہفت روزہ ”پیسہ اخبار“ نا بنا ء ِ کرے، دانا پیشانی آ دا لوز آک لکھوک مسرہ۔
”مچ آ ہندوستان نا اردو اخبار تیان اڑزان انگا پرچہ شار گوجرانوالہ نا پیسہ اخبار تینا بنائی دے تیٹی تین کن پن اس کٹانے۔“ دانا شاہدی پیسہ اخبار گوجرانوالہ نا شمارہ 10 فروری 1888ء اٹی وڑ ڈول اٹ ملک۔
”خواجہ غاک
منتواری ہرفسا لکھنہ کہ ہر اُرا اسکان خبر و نوٹ آتے پیسہ اخبار آن ہرفرے ہموڑے تینا اخبار تیٹی دا پرچہ نا پن ء ِ ہم شاغرے ہرا داڑکن گمر نا ہیت اس مرو۔ بھاز انگاک پن لکھارہ و ہم عصر ایلم اسے نا خواری نا کٹیا ٹی بشخ ہلکرہ۔ است ہسونی تو دادے کہ ”نصت دہلی“ تینا پنہ نا مسٹمیکو کالم نا اخیر اٹ نیمہ خبر آتے تو پیسہ اخبار آن نقل کرسا خلکوسس ولے پن ء ِ ”اخبار عام“ نا تسوسس و دا شین تروک آنا ردینک اس خننگک، ننا خڑک آ دا حق تلفی ٹی بریک کہ نن پین خواجہ اسے نا لکھوک آ نوشتانک ء ِ تینا مزغ آن شیف ظاہر کین۔“
ہفت روزہ پیسہ اخبار گوجرانوالہ تینا ہفتہ وار شینکاری تون اوار کاروباری ادارہ غاتا اشتہار تے کن ”مناد“ نا پن اٹ اسہ جتا ء ُ ضمیمہ اس شینک کریکہ۔ ضمیمہ غا دا لوز آک لکھوک مسرہ۔
“The Weekly ADVERTISER Supplement the PAISA AKHBAR Gujranwala”
مناد نا پیشانی آ مدام دا لوز آک لکھوک مسرہ۔
مناد اٹی ہر وڑ ڈول انا کاروباری اشتہارک اڑزان زرّ اٹ شینک مسرہ، و دا اخبار بھلو کچ اسیٹی ہندوستان نا کل اردو پاروک آ علاقہ غاتیٹی ہفتہ ٹی اسہ وار خوانوک آتے مفت تننگاکہ۔
برجاء ِ