بشیر احمد شاد

خدا تعالیٰ نا فضل و کرم اٹ ایلو زبان تیانبار ننا لمئی بولی براہوئی ٹی ہم گچین و بے مٹ ءُ شاعر ادیب ودی مسنے، ہرافک کہ تینالمئی بولی براہوئی ءِ ایلو زبان تیانبار شون تننگ و تینا زبان و ادب ءِ ایلو شون ہلوک آ زبان تا ہم سر جوڑ کننگ اٹی گچین ءُ کڑد ادا کننگ ءُ۔

ننا زیبل آ ڈغار مستونگ آن تعلقداری تخوک آ پنی آ شاعر آتا چر اٹی اسہ گچین ءُ پن اس بشیر شاد نا ہم ارے کہ او اسہ بھلو وخت اسے آن براہوئی زبان و ادب نا پڑ آ تینا شاعری و قلم نا کمک اٹ براہوئی زبان و ادب ءِ مستی دننگ ءِ و داڑتون اوار راج انا راہشونی کن ہم بے مٹ ءُ ادبی کڑد ادا کننگ ءِ۔

بشیر احمد شاد دہ جون 1972ء نا دے خلق محمد شہی مستونگ اٹی ودی مس، اونا باوہ عزت دار نا پن خواجہ کریم بخش، قبیلہ محمد شہی، ساکن خلق محمد شہی، تحصیل وضلع مستونگ ءِ۔ او تینا بنائی تعلیم ءِ خلق انا مسیت آن کرے و میٹرک ہندی اسکول آن کرے۔ اونا تینا تعلیم تون اوار لمئی زبان براہوئی تون است خواہی چنکی آن ئسکہ۔ ہندا سوب آن او شانزدہ سال نا وئی اٹی دا شوق ءِ مون آ تخسا صابر ندیم و فتح محمد شاد انا شاگڑدی ءِ بنا کرے۔ او شاعری نا پڑ آ 1988ء ٹی گام تخا۔

بشیر احمد تینا پن اتون شاد انا تخلص ءِ گچین کرسا شاعری نا پڑ آ گام تخا، و اینو اسکان براہوئی زبان ءِ تینا گچین آ شاعری ٹی ٹل و پھل کننگ ءِ۔

او شاعری آن بیدس نثر نگاری ہم کیک۔و ہندن ادبی رسالہ غاتیٹی رپورٹر ہم ارے۔

بشیر شاد نا دا وخت اسکان چار کتاب شینک مرسا ادب نا دا باغ ءِ زیات زیبائی بشخانو۔ اوفتیٹی ”نے آن پد“ (براہوئی شاعری، -2”ملاس آ خنک“ (شاعری)، -3”کسر نا روشنائی“ (مرتب)، -4”گلزار یک پاسی“ (مرتب) شینک مسنو۔ اونا دا شینک مروک آ ادبی کتاب آک ادب نا پڑ آ زیات پذیرائی ہم دوئی کرینو۔ ہر اسہ شاعر و ادیب و مستونگ آن تعلقدار آ خواجہ غاک دا کتاب آتے بھاز شوق اٹ خوانرہ۔ اونا دا کتاب آک براہوئی ادب نا پڑ آ بے مٹ ءُ مڈی تکنگرہ۔

بشیر احمد شاد انا شاعری ٹی روانی، وزن نا خیالداری، دین دوستی، گچین ءُ لوز کاریم اٹ اتنگ، ہندن راج انا راہشونی نا جوزہ غاک ہم مُر آن خننگرہ۔ او اسہ استاد شاعر اسے نا حیثیت اٹ دا وخت اسکان چندی شاگڑد ہم جوڑ کرینے، ہرا علم وادب نا پڑ آ جوان ءُ ادبی کڑد سر تننگ ءُ۔

اونا شخصیت اٹی سادہی،سچائی،ادب تون محبت، زبان دوستی، مہر و سیوت، دین دوستی، ادبی چاگڑدنا سوگوی نا ہم گچین ءُ جوزہ خننگک۔ او دا وخت آ پنی آ ادارہ شاشان انجمن شعراء مستونگ لڑ انا صدر نا حیثیت اٹ کاریم کننگ ءِ۔ اونا ادب کن کروک آ کاریمک ستا کڑزرہ۔ او تینا ادبی ادارہ نا پلیٹ فارم آن زبان و ادب نا شونداری تون اوار راج انا راہشونی، ورنا شاعر ادیب آتا است بڈی، و ہندن ادب نا پڑ ءِ زیات زیبائی رسیفنگ کن بے مٹ ءُ خذمت سر تننگ اٹی ءِ۔ او تینا ادارہ غان بیدس ایلو ادبی ادارہ غاتا کنڈ آن اڈ تروک آ ادبی کچاری تیٹی ہم اوار مرسا ادب نا شونداری کن تینا بشخ ءِ شاغنگ ءِ۔

بشیر احمد شاد نا پاننگ ءِ کہ کنا نظر اٹی زبان و ادب کن خذمت کروک آ کل شاعر ادیب خواجہ غاک شرف کڑزرہ، ولے ای ایماندار خواجہ اسلم پروانہ، حاجی حسن غمخوار، استاد صابر ندیم، اسحاق سوز، حاجی شاہ بیگ شیدا، محمد رحیم ناز، حمید عزیز آبادی نا ہم شاعری و ادبی کڑد آن زیات متاثر اریٹ۔ انتئے کہ دا خواجہ غاتا ادبی خذمت آتیان براہوئی زبان و ادب ءِ شونداری و فائدہ دو بسنے۔

بشیر شاد تینا شاعری ٹی پاہک کہ:

مفیرے گٹو مفاد اسے کن مجال ءِ دن کیو

نی بے ضمیر اس ننا مریسہ مثال ءِ دن کیو

اسہ پین جاگہ اس پاہک:

اگہ نی خواسہ ای کاو مستی تخک نی جوان ءُ گمان سنگت

نی اِلے اودے امر کہ اودے تفہ نی کس ءِ شغان سنگت

کہ شار انا با تفنگ مرو ءِ تفینے دے پا کہ جل تا با ءِ

نا راز ءِ ڈکو کرو ءِ پڑدہ ہراڑے نی پا جہان سنگت

بشیر احمد شاد نا شاعری ٹی زبان و ادب و راج انا راہشونی نا ہرا دڑد ڈکوک ءِ او اونا لوز آتیٹی پاش خننگک۔ او تینا خیال و فکر انا دنگ ءِ زیات کشادہ ہم کرینے،ہنداکان اونا شاعری خیال اٹی اسہ جتا ءُ ہنینی و فکر اس خننگک۔

دعاکینہ کہ خدا تعالیٰ بشیر احمد شاد ءِ اسہ بھلو عمر اس عطاء کے، کہ او ہند اوڑ اٹ براہوئی زبان و ادب نا شونداری تون اوار تینا راج انا راہشون کن ہم گچین ءُ کڑد ادا کرسا کے۔

ہفتئی تلار
تاک: 30
20-14 اگست 2021ء
پنہ: 03