ہوغنگ پٹنگ اٹ بھرم دوئی کننگ نا جت پت

اینو مظلوم آ فلسطین آ بمب و راکٹ آتا ترونگڑ ءِ ہر مسلمان انڈیا نا فلم آتیانبار ہُننگ آن پد ہندن افسوز کیک دن کہ ناگمان جوجک اس نت تا کیرغ آن برے۔ فلم اٹ دا سوب آن مسلمان ملک آک است خواہی کپسہ کہ فلم اٹ ولن تو خنلگک، ولے ہیرو نا درک اف۔ ارٹمیکو دا ہمو فلم ءِ داڑکن گڑاس اتوئی تمک، دانا جند آن ہچ اس مفک۔ جمعہ نماز آ اسرائیل و امریکہ ءِ بددعا تننگ و جٹ اسے کن اسرائیل امریکہ مڑداباد کوک پاڑو ضرور مریک، ولدا ہرکس تسبیح خوانسا یلئی آ خراس آنبار اُرا غا راہی مریک۔ کشمیر نا شئیر تیانبار فلسطین کن ہم عربی ءُ شئیر خلنگ مریک۔ ولے خلیس دادے دن امریکہ مست آن سابت آ اِرغ ءِ چورک اس کرینے، دن نہ کہ یزید آنبار دیر ءِ ننا بند کپ۔ بینگنی ءِ سگنگ ان، دن نہ کہ ملاسی آن کہون۔ دین و دنیا ہڑتوم آک عمل خوارہ۔ پارہ کہ گڑاس ناجوڑی تا درمان دارو ٹی مریک، گڑا سے نا دعا ٹی۔ ولے مسلمانک ہم دیچہ اٹ وڑ انا ءُ، کس دعا ٹی خواہک، کس خیسن نا کچکول اٹ، داڑکن مندر نا چڑینگ آتے اسہ ایلو ٹی خلوئی تمے، یا خانہ کعبہ نا درگہ ءِ ملنگ نا وس دو برے۔ وزیر تا ٹولی دا کارِ خیر اکن تیار سلوک ءِ۔ انتئے کہ مسلمان تیٹی ہندن ءُ مسلمان ہم ارے، ہرا مذہب نا سرنہ ءِ پیسہ کن سیکولر آ دھول انا توار اٹ پٹرہ، وار اس خوشی نا چاپ خلیرہ۔ ہرا کہ ننا حاکم آتا عادت جوڑ مسنے۔ نزور آ ملی لیار کیک، زوراور آ تنگان کاہک، انتئے کہ ہڷ مُلا بسم اللہ، ایت ملا نعوذ باللہ غا ہیل کرینن۔

تاریخ نا پنہ غاک شاہد ءُ روشن خیال و سیکولر ازم نا دعویٰ کروک آ جنرل مشرف چندی وار کعبہ نا درگہ ءِ تینا دوٹی ملانے۔ امیر المومنین جنرل ضیاء الحق کعبہ نا گنبد آتیا جلہو کروک آتیا سم کاری کرے تو نواز شریف اخہ سال مکہ و مدینہ نا مش تیٹی خن تے سرمہ کرے۔ ہندن بھٹو عرب آتا خوارزادہ پاننگاکہ۔ عمران خان تو اینو ہم عمرہ نا فضائل آتیان بلد اف، جراب آتتون عمرہ کیک، وار اس مدینہ نا سڑک آتیا نت شپاد جرکوک آ ثواب نا رند اٹ نت دو خلنگ ءِ، تو ایلو پارہ غان اُرائی تے چرمٹ آ مون اتون عمرہ نا فرض آتیٹی ودکی اتنگ ءِ۔ سلطان صلاح الدین ایوبی حکومت نا معاملہ و صلیبی توپ آتا با ءِ بند کننگ اٹ ہنداخہ اختہ ئس کہ وخت اس نئے کعبہ نا دروشم ءِ خنا، نئے وخت اس مدینہ نا تہو انا چس ءِ ہلک۔

سلطان صلاح الدین کرد حاجی تیا جلہو کروک آ صلیبی تے چٹفنگ کن وخت کشا، ولے تینا است انا مراد ءِ پورو کننگ کن جنگ جھیڑہ غاتا دو آن مچ زند حاجی جوڑ مننگ کتو۔ حیرانی نا ہیت اس اف، انتئے کہ ایماندار آ دا مسلمان حکمران تے سما ئس کہ مسلمان تا اجتماعی معاملہ غاتا رکھ تینا جند انا عبادت آتیان ود المی ءِ۔ حکمران آتا است آتے پٹنگ نا آب دا اف کہ او منرل واٹر اٹ وضو کیک یا اخس تہجد خوانک، و پیشانی آتے عبادت نا اخس ءُ بھلو مون ءُ لپ اسے۔ کعبہ نا درگہ اٹ وار ملنگانے اکن تے، زم زم اٹ سہب شام بے شولانے یا اٹ وار شاہی محل اٹ شیخ آتا کوپہ غاتے زیتون و سنجد نا تیل اٹ چرپ کرینے۔ دانا آب و گچینی نا پیمانہ دا مرے کہ حکمران ءِ ہرا وخت بادشاہی نا زلف آتا سیخا دو برے، ہموتم انسانیت و اللہ نا دین انا بارو اٹ پٹ و پول کے، دین اخس انسانیت نا پڈ و پچ آتا خواری تے سگنگ کیک۔ مظلوم آتے آسودہی نا تہو اخس لگک، آہڑ نا ٹاک آن بے وس آتا کاٹم آ امر جمر تفے، بشام نا ہُورہ امر ٹکا کے، تیز انگا پر امر باسنی نا مستی ءِ پدین کے، زباد نا گند ہستین امر تالان مرے، انسانیت گواڑخ تا نیام اٹ مین ہلے، دن انگا خذمت ہزار اعتکاف آن زیات ءِ، ہزار حج و عمرہ غان گچین ءِ۔

اگہ حکمران انسانیت نا ویل آتے گیشتر کے، غم و ڈکھ آتا ڈاکی نا نہار ءِ سریلہ اِلے، دین ءِ تالان کے، صوم صلوٰۃ نا پابند کننگ نا پڑو کے، سودی وام تا باریم نا کیرغ آن ٹیکس آتا کنٹ انگا کتار نا کیرغ آن غریب آتا لخ ءِ خلے۔ زوراور آتا زوراکی ءِ توننگ کپ، فلسطین نا چیہانٹ آتیا خف تے اِرا دوٹی تورے، مظلوم آتا ٹھپی ٹوری ندارہ غاتیا دڑوک آ کپی تیا خن تے تینا تر کے، ہر سال حج و عمرہ کے، زم زم کلی آن کنفے، پیغمبر علیہ السلام نا مسیت اٹ قلعہ ٹی تولے، امام کعبہ نا دو آن بک ہلے، چا کے او خیر ءِ، نئے خواری نا گڑاس کٹیا کرے، نئے او تاریخ اٹ گچین ءُ حکمران اس پاننگو، خننگ اٹ صوفی بننگ اٹ مفتی و متقی خننگو ءِ، ولے تاریخ اٹ مدام نابود ءُ حکمران اسے نا پن اٹ نوشت نا گواچی مرو ءِ، ہندا حال عرب و ایلو مسلمان حکمران تا ءِ۔ اینو ننا حکمران آتا مثال منافق آ سنگت آتیانبار ءِ، روشنائی ٹی اوار تارمہ ٹی گم مریرہ۔ راست نوشتوک خن انا خڷ اکن دو بفک۔

مستنصر حسین تارڑ پاہک، ”دا قوم انا مورخ راست نوشتہ کننگ کن تولنگ ئس کہ اودے بحریہ ٹاؤن اٹ پلاٹ اس الاٹ مس۔“

ہفتئی تلار
تاک: 30
20-14 اگست 2021ء
پنہ: 06