قدرتی گیس اکن پنی ڈیرہ بگٹی نا سفر(05)

چیک پوسٹ تون اسُل اوار راستیکو پارہ غا اسہ ہوٹل اس ئس۔ و دانا پد آن اسہ باغ اس ئس۔ ہراڑے سیخا تیٹی تولنگ کن گڑاس بینچ و کرسی تخوک ئسر۔ نن نماز آتتون داڑے سر مسن۔ مولانا مجیب الرحمن بگٹی و خواجہ لال دین بگٹی (صدر الخدمت فاؤنڈیشن ڈیر ہ بگٹی) و خواجہ شیر بگٹی تون اوار ورنا تا اسہ کڑدہ اس ہندا ہوٹل آ ننا بخیر کننگ کن مُست آ ن ساڑی ئس۔ او ننے جم و جوش اٹ بخیر کریر۔ و ہوٹل نا پد آن باغ اٹی ننے تولفنگا۔ تولنگ کن دا بھاز گچین ءُ جاگہ اس ئس۔ دا پارک آنبار ئس۔ و ننے بھاز دوست بس۔ نن توسن تو کل انا مون آ دیر تخنگا۔ ننا دیر کننگ تون حال حوال مس۔

دا حال حوال ڈیرہ بگٹی نا ہر مسٹ آ تحصیل آتیٹی ہراڑے نن ہنان مرسا کرے۔ ای خواوہ کہ نما خدمت اٹی بلوچی حال حوال اٹی مروک آ ہیت و گپ نا بارواٹ نمے معلومدار کیو۔ اونا سرجم حوال انت ءِ۔ و دانا انت فائدہ غاک ءُ۔

حوال خاص وڑ اٹ پیشن آن بروک آ یا بھلو وخت اسے آن پد اسٹ ایلوڑتون ملنگ نا وخت آمریک۔ اول اٹ دیر یا شربت نا سلہ خلنگ یا کننگ آن پد مچٹ ءُ چپی اس مریک۔ ڈیرہ بگٹی شار اٹی دوست محمد بگٹی صاحب (ہراکہ ننا کڑدہ نا کماش ئس) و مولانا مجیب الرحمن بگٹی ہراکہ حوال ہلوک یعنی مہماندار ئس۔ اسٹ ایلوڑتون ہرا وڑ اٹ حوال کریر دن ئس:

مجیب الرحمن بگٹی …… حوال ایتبو خواجہ غاک۔

ایلو سنگت آتیان سلاہ ہلنگا، وکل جی پاریر۔ تو دوست محمد بگٹی حوال ترسا پارے کہ حوال خیر ءِ۔! جمیل احمد کُرد صاحب ڈیرہ بگٹی نا ہر مسٹ آ تحصیل آتا دورہ نا خواست کریسس۔ ہراڑا او بس۔ او کوئٹہ غان راہی مس۔ و کسر آن خاوند بخش مینگل صاحب ہراکہ جماعت اسلامی نصیر آباد نا امیر ءِ اودے ہرفے۔ او درو دیگر تون سوئی ٹی ننے آ بسر۔ اوڑے سوئی ٹی اینو سہب اتون وھیل چیئر بشخار۔ و پروگرام نا ردا ٹ ننے ڈیرہ بگٹی تحصیل آ ہم بروئی ئس۔ اونما خیال آداڑے بسن۔ پین حوال خیر ءِ۔

داکان پد مجیب الرحمن بگٹی حوال تس۔ او ہم حوال کن کل انا سلاہ ءِ ہلک۔ کل جی کریر…… او پارے ”اللہ نما بننگ ءِ بختاوری اس کے۔ نن جمیل احمد کرد انا بننگ نا بنگسن و دارد اٹ ای سنگت آتتون رابطہ کریٹ۔ و پروگرام جوڑ کرین و نما بخیر آ بسن۔ پین حوال خیر ءِ۔“

دا ڑان پد کل دوتے بڑزا کریر و اسٹ اسٹ آ ایلوفتا حال ءِ ارفیر کل تینا عافیت نا پاریر۔

و دا وڑ حوال ایسر مس۔ داڑے نمے پاو کہ حال حوال نا گڑاس شڑت مریرہ او داکہ اسٹ اس راجی حوالہ اٹ اخس بھلو بندغ اس مرے او اسہ نزور یا غریب اسے حوال ایتک و ہلیک۔ و دا حوال تفننگ نا صورت اٹی دا اسہ میار اس سمجھنگک۔ ارٹمیکو شڑت دادے کہ حوال تروک آ اخس حوال ءِ مرغن کے او انت اس پاہے اودے بنوئی مریک۔ او دا نیام اٹ جی…… جی پاہک۔ حوال نا ہرا بھلا فائدہ کنے ڈیرہ بگٹی ٹی نظر بس او دا کہ ہر بندغ ایلو نا بارواٹ پورو معلومدار مسکہ و ایلو بندغ کن آسانی مسکہ۔

حوال آن پد نن ہوٹل نا خڑک آ مسیت اٹی دیگر نانماز ءِ جماعت تون خوانان۔ و نماز آن پد ارا مسہ کلو میٹر اس پین شار اٹی مون آ ہنان۔ ای گاڈی آن پیشن ہراٹ تو کنے موٹر سائیکل آتا اسہ ریلی اس نظر بس۔ او موٹر سائیکل سوار آک الخدمت فاؤنڈیشن نا رضا کار آک ئسر۔ ہرافک ننا داڑے بننگ نا جشن ءِ اڈ تننگ اٹی ئسر۔ کنے دافتا مہر و مریبت ءِ ہرسا بھاز خوشی مس۔ و ای شرمندہ ہم مسٹ و دافتیان بچنگ نا کوشست ہم کریٹ ولے بے سہب مسٹ۔

ڈیرہ بگٹی شار:۔

ڈیرہ بگٹی شار تینا قدرتی ندارہ غاتا سوب آن بھاز زیبدار ءِ۔ مچ آ آبادی مسہ مش انا دامان اسے ٹی ءِ۔ نن ہراتم آ سر مسن تو موسم بھاز جوان ئس۔ ولدا پر کرے، ہراڑان موسم پین جوان مس۔ ڈیرہ بگٹی بھاز بھلا متبر آ بندغ، نواب اکبر خان بگٹی نا ہند و جاگہ مسنے۔ دا علاقہ بھاز آ شیفی و بڑزی تے خنانے۔ دا شار دا ہم خنا کہ نواب اکبر خان بگٹی نا منشا غان چَپ کس اس چنکو کاریم اس ہم کننگ کتوکہ۔ و وخت اس دن ءُ ہم بس کہ نواب صاحب شار انا زند ءِ اِلسا مش تیا ہنا۔ دا شار آن ہم گیس پیش تمک۔ ہرافتا بست و بند OGDCL تون ءِ۔ ڈیرہ بگٹی ٹی سرکاری محکمہ غاتا دفتر و ماڑیک ہم اریر۔ نوا ب اکبر بگٹی صاحب نا وخت اٹی او دافتا کماشی ءِ کریکہ۔ نن بازار ءِ ہم سیل کرین۔ منہ دکان و مارکیٹ آک ئسر۔ شاراٹی پولیس اسٹیشن ہم ئس و ایف سی نا کیمپ ہم۔ نوا ب صاحب نا قافلہ وخت اسیٹی داڑے بسکہ و ہناکہ۔ نواب صاحب نا اُرا ہم ہنداڑے کے۔

ننے اسہ وار الخدمت فاؤنڈیشن نا رد اٹ منہ بندغ تون ملوئی ئس۔ او محکمہ غاتیٹی ہنسا داکاریم ءِ کروئی ئس۔ دا بندغ آتیٹی راجی کارندہ، قبائلی میر و متبر، سیاسی کماش و لس بندغ آک اوار ئسر۔

الخدمت فاؤنڈیشن نا رد اٹ ضلع ڈیرہ بگٹی نا ارا تحصیل اٹی ایمبولینس سروس ہم ارے۔ ڈیرہ بگٹی شار اٹی ہرا بندغ تون ملان۔ تو اوفک دا ہیت ءِ منارہ کہ سخت آن سخت آ حالیت آتیٹی داڑے الخدمت فاؤنڈیشن جوان ءُ کاریم کرینے۔ و کنے ہم دا مشکل متو کہ الخدمت فاؤنڈیشن کن مچ آ ضلع ڈیرہ بگٹی ٹی اسہ جوان ءُ ہند و جاگہ اس و پن اس ودی کرینے۔ یقین اٹ داٹی دوست محمد بگٹی و اونا مچ آ ٹیم انا محنت و خواریک اوار ءُ۔

ڈیرہ بگٹی ٹی جتا جتا جاگہ غاتیا ننا 5 مجلس مسر۔ ولے سوئی و ڈیرہ بگٹی ءِ پہہ مننگ اٹی خواجہ لیاقت علی بگٹی، خواجہ ڈاکٹر محمد حسین بگٹی (مسکوہی ڈسٹرکٹ ہیلتھ آفیسر ڈیرہ بگٹی) تون ملاقات آن پد دا معلومداری ودا۔ و دا سنگت آک بھاز گچین ءُ بندغ ءُ۔

شام آن پد اخس کہ وخت بچاسس، اوٹی ننا خواجہ لیاقت علی بگٹی (مسکوہی ایم این اے میر ہمدان خان بگٹی نا مار) نا اُرا غا سر مسن۔ اونا گارڈ آک ننے آن بننگ نا سوب ءِ ارفیر اوکان پد ننے تہٹی ہننگ نا موکل ملا۔ و بھلو گیٹ (درگہ) اسے آن گدرینگ انگ آن پد تہٹی اسہ پین درگہ اس ئس۔ او وتاخ نا ئس۔ اوکان تہٹی ہنان تو اسہ کمرہ اسیٹی خواجہ لیاقت علی بگٹی تولوک ئس۔ کمرہ ٹی زیبدار و روایتی آ گڑاک ٹنگوک و تخوک ئسر۔ ننا بننگ آن مست منہ پین بندغ اوڑے تولوک ئسر۔ دا تو پاش ءُ ہیت اسے کہ دن آ سیاسی آ بندغ آتا وتاخ اٹی ہر وخت مخلوق تینا کاریم اٹ بریک۔ خیر نن خیر خواہی جوزہ اٹ بسوسن۔ و نن ہم ہمو بندغ آتتون اوار توسن۔ جٹ اسے آن پد ننے دیر تننگا و لیاقت علی بگٹی صاحب حوال کرے۔ و ہر وخت آنبار ہڑتوم آ پارہ غان حوال تننگا و حوال ہلنگا۔ اوکان پد چا نا بننگ اسکان گپ شپ مس۔ کنے لیاقت علی بگٹی صاحب علاقہ ٹی ساڑی سیاسی و انتظامی معاملہ غاتیان معلومدار کرے و ہندن لگا کہ او دا حالیت آتیان خوش اف۔ اونا گپ آتیٹی گلہ و غاو ئس۔ انتئے کہ گدرینگوک آ گچین کاری تیٹی او جماعت اسلامی نا اومیتدار ئس۔ ہندا سوب آن الخدمت فاؤنڈیشن ءِ جوانیکا پہہ مسکہ۔ و جئی آ سنگت آتتون اونا خڑکی ئس۔ ننا ہیت و گپ اٹی ہچ ءُ ہز اس الو۔ چا آن پد موکل خواہسن و ننے موکل کننگ کن وتاخ آن پیشن اسکان بس و ننے جوانی اٹ موکل کرے۔

نن کن نن نا اِرغ ڈاکٹر محمد حسین بگٹی کریسس۔ 20 منٹ اٹی نن لال دین بگٹی صاحب نا کماشی ٹی اسہ بھلو کلینک اسے نا مون آ سر مسن۔ و سر مننگ آ معلوم مس کہ شار انا نیام اٹی ہیلتھ کلینک ڈاکٹر محمد حسین بگٹی صاحب نا ءِ۔ ڈاکٹر صاحب نن تون ملنگ کن بس و ننے بھاز جم و جوش اٹ بخیر کرے۔ ہراڑے ہر آسراتی ئس۔ کمرہ ٹی واش روم ہم ئس۔ واے سی ہم لگوک ئس۔ ڈاکٹر محمد حسین بگٹی صاحب اسہ گچین ءُ بندغ اسے۔ ریش و پژہ غاک تے پیہن ءُ۔ اوڑتون ہیت و گپ اٹی خبر تما کہ او دا پژہ غاتے دے آ پیہن کتنے بلکن بھاز آ آزموندہ غاتیان پد بھلو پامدار اس جوڑ مسوسس۔ خوش تَب و مسخرہ کروک، و طبیعت اٹی عاجز آ دا بندغ ہرا گپ آتے کریکہ اوڑان معلوم مس کہ او نواب بگٹی صاحب نا بھاز خڑک ءُ بندغ اس مسنے۔ اونا ہیت آتیٹی ہراہیت خاص ئس او دا کہ شار اناحالیت ہمو وخت پین خراب مس ہراتم نواب بگٹی صاحب شار آن پیشن مش تیا ہنا۔ اونا پاننگ ئس کہ نواب صاحب نا ہننگ آن پد شار بندغ آتیکن سکاکہ۔ و بھاز بد امنی ئس۔ ارٹمیکو ہیت دا کہ ڈیرہ بگٹی ٹی جان سلامتی نا حالیت بھاز بے حال ئس۔ اونا پاننگ نا رد اٹ اگہ کس اسے ساہدار اس ڈلاکہ تو مچ آ شار اٹی رکھ والا سیلہ الو۔ اگہ سیلہ ملاکہ تو ناجوڑ ءِ اسہ جاگہ غان ایلو جاگہ غا دننگ کن ایمبولینس الو۔ داڑان بیدس چنا نیاڑی تیکن ہم دارو درمان نا ہچ ءُ آسراتی اس الو۔ و داڑے بندغ آتا کہنگ نا سوب ہم آسراتی تا مفننگ ءِ۔ ڈاکٹر محمد حسین بگٹی نا داہیت و گپ آن پد دا حالیت آتا بارو اٹ معلومداری آن پد کنا است خواہس کہ اونا دو آن بُک اس ہلیو کہ او دن انگا حالیت آتیٹی تینا شار انا باتی تا خذمت ءِ کننگ اٹی ءِ۔

دا ہیت و گپ برجا ئس کہ ارٹمیکو کمرہ ٹی اِرغ نا بست و بند کننگاسس، ننے ہمونگ ہننگ نا پاریر۔ اوڑے کندوری آ بھاز آ نول آک تخوک ئسر۔ او سجی ہم بسیسر۔ نن تینا دم درینگ انگ و بینگٹی ءِ مُر کننگ کن جوان سیر پڈ مرسا کنگن۔ و مہمانداری آ ڈاکٹر صاحب نا منت ءِ ہرفین۔ و اوکان نن شیر بگٹی نا اُرا غا ہنان۔ ہراڑے ننے نن ءِ گدریفوئی ئس۔ باسنی آن بچنگ کن کولر ہم خلوک ئس۔ و مچے ہیت و گپ آن پد نن سیر تغ مسن خاچان۔

بروک آ پروگرام نا رد اٹ ننے ہندا شار اٹی اسہ بھلو ہال اسیٹی مولانا مجیب الرحمن بگٹی صاحب نا ذاتی مدرسہ نا دورہ ءِ کروئی ئس، اوڑے سر مسن تو مسہ درزن آن زیات طالب مست آن تولوک ئسرہ۔ ہرا جتا جتا کورس آتے خوانارہ۔ اوفتتون ملان تو بھاز خوشی مس۔ مولانا مجیب الرحمن بگٹی صاحب ننے پارے کہ او تینا کوشست اٹ ڈیرہ بگٹی نا درزن آچنا تے پنجاب نا چندی جوان انگا تعلیمی ادارہ غاتیٹی مون تسنے۔اوڑے ہندا مچ آ چنا تا پن تے ہم نوشتہ خناٹ۔

ہفتئی تلار
تاک: 30
20-14 اگست 2021ء
پنہ: 04