ادب وسیاست نا پڑ۔۔۔۔نظریاتی آ انسان

یونس عزیز مینگل

0

Get real time updates directly on you device, subscribe now.

ادب و سیاست اسٹ ایلو تون ہمگرنچ اریر، ہندن دا ہم ارے کہ زندگی تون اوار اوار دا ہڑتوم آتا سیالی بھاز ارے، انتئے کہ ادب ہم انسان تون ہمراہ ءِ، ہندن سیاست ہم انسانی زند و بود، آسانی کن جوان ءُ کسر کشنگ نا پن ءِ، یا کاریم ءِ۔۔۔۔۔ اسہ ادیب اس جوان ءُ سیاستدان اس جوڑ مننگ کیک، ہندن اسہ سیاستدان اس جوان ءُ ادیب اس جوڑ مننگ کپک۔۔۔۔ پاننگ نا مسخت دادے ادب بھاز بھلو شابیت ءُ پڑ اس ارے، ہندن ادب نا پڑ اٹی درو نا بھاز کم گنجائشت مریک۔۔۔۔ یا دا ہم پاننگ کینہ کہ اسہ حقی ادیب اس درو تروک اس مفک۔ انتئے کہ ادیب نا فطرت اٹی درو کننگ اسل مفک یا ادیب نا طب درو کروک و فراڈی آ بندغ آن بھاز مر مریک۔۔۔۔۔ ہندن سیاستدان اٹی درو نا گنجائشت ارے۔ خاص وڑ اٹ داڑے ای تینا چاگڑد نا سیاستدان آتا ہیت ءِ کیوہ۔ کہ جلسہ و چوک آ سیاستدان آک سادہ غا انسان تا مون آ بھاز بھلو بھاز جوان ءُ تران کیرہ، ولے اوکان پد اوفتا عمل اوفتا اسٹیج آ کروک آ ہیت آتیان اسل چپ خننگرہ۔ با پاہک انت۔۔۔ ہیت آک انت۔۔ ولے عمل انت مریک۔۔۔ تو پاننگ نا مسخت دا کہ ادب اٹی درو نا گنجائشت کم مریک، ہندن سیاست اٹی زیات ءِ، ولے واہم دا ہڑتوم آک اسٹ ایلو تون ہمگرنچ و ہم کوپہ پاننگرہ۔۔۔۔ دن کہ اسہ نظریاتی ءُ انسان اس تینا قول و فعل اٹی اسہ ڈول مریک ہندن ادب اٹی ہم کل آک آخا گڑاس ادیب نظریاتی آ انسان آتیانبار قول وفعل انا پابند پاننگرہ۔۔۔۔۔ دا جاگہ غا اسہ پین ہیت اس ہم ارے کہ دافتے ہرا پیمانہ ٹی ہُننگے، کہ ادب اٹی لچ و درو کروک ءِ امر پہہ مننگ کیک، تو دانا بارو اٹی دا آزموندہ ہم مسنے کہ ہرا ادیب گیشتری اسٹیج آتیا خننگک یا ہر گڑاٹی اوار خننگک، تو دا دز و مالک ہڑتوم آتتون ہمراہ مس تو چاس کہ دا ادب اٹی ادیب نا پن آ کردوغلو نا کڑدار ءِ ادا کننگ اٹی ءِ۔۔۔۔ انتئے کہ اسٹیج مدام فنکار نا جاگہ مریک۔۔۔ کہ ہرانا زی آ فنکاری کرسا فنکار تینا کرتب آتے نشان ایتک۔۔۔۔ اونا مسخت دا اف کہ آخبتی ءُ گڑاس نشان تروک آتے نشان تننگ کے بلکن گڑاس پیسہ کن وخت انا زی آ اوفتا مشغولی نا سامان جوڑ کیک، ہندن گڑاس ساہت آن پد ہموکان مر مریک۔۔۔۔ تو اسٹیج آ نظریاتی آ انسان مدام کم خننگک۔۔۔ انتئے کہ اسٹیج آ راست کم دروغ زیات پاننگک، یا کہ کس انا زبان چرپ و زیات دانگ اینگ جپ خلیک تو دا اسٹیج آ جوان وڑ اٹ کرتب نشان ترسا مخلوق ءِ زرس وخت اکن مشغول کرسا تینا کاریم تا پوروی ءِ کیرہ۔۔۔۔۔ دن کہ اینو پگہ بھاز آ علاقہ غاتے ٹی دا خننگک کہ سیاست، قبائلیت، ادب، و الیکشن، میڑھ و مرکہ، غمی و خوشی، جلسہ جلوس و پین راجی مچی تے ٹی گڑاس مخصوص بندغ اریر، ہرافتے میڈیا ہم و مخلوق ہم میر متبر، ٹکری قبائلی و سیاسی یا راجی راہشون و سما اف انت انت تکنگ اٹی ءِ؟ ہندن ہر پڑ آ ہندا مخصوص آ بندغ آتا کوزہ ارے۔۔۔۔ ہراڑے پین نظریاتی آ یا سیدھا غا انسان ءِ رسینگ نا گیگ مفک، تو ہندا خاطر آن راج و ادب یا کہ سیاست ہندن زند انا ہر پڑ اٹی جوان انگا کسر آ ہننگ نا جاگہ غا خراب ءُ نیمہ اسے آ کاہک۔۔۔۔ پدا شومی قسمت کہ اگہ ہندا تپہ اگہ پین سیدھا ءُ انسان اس تین تون ہمراہ اگہ اسٹیج اسے آ خنے تو بس اسل بھاز ضدی مریرہ، ہندن دا ہم سگنگ کپسہ، کہ دا پوسکن آ بندغ انتئے داڑے بسنے پدا ہندن است خرینی نا ہیت بنفسا بنفسا ہندا انسان آ بلواسطہ یا بلا واسطہ سٹی تنقید کرسا مایوس کرسا اونا جوزہ غاتے شیف خلسا کیرہ۔ ہندن ہندا انسان ہرا جوان انگا جوزہ غاتتون ہندا پروگرام اٹی بسوسس اوکان بھاز مایوس مرسا پیش تمک۔ دوارہ اونا است ہم ہمونگ خواپک کہ کاو۔۔۔۔ ہندن دا بارو اٹی حضرت محمدؐ نا ہم ارشاد ارے کہ ہرا مجلس اٹی اگہ کس انا بے قدری کننگا تو ہمو مجلس ءِ زوت یلہ کر ہموکان پیشن مر۔۔۔۔ تو پاننگ نا مسخت دا کہ دا زمانہ ٹی ہر پڑ اٹی مافیا و گروپ آک جوڑ مرسا بسنو۔۔۔۔ ہرافتا کاریم تینے آن مونی کس ءِ النگ اف۔۔۔۔ ہندن ہندا سوچ دا تپہ ءِ ہم بھاز پد کرسا کیک اگہ دافتے پد کتو تو راج ءِ ضرور پد بٹسا کیک۔۔۔۔۔ ولے راج بے حس آ دن انگا بندغ آتیا نظر ہم تخپک کہ دافتا قول و فعل اٹ اخس تضاد مریک ہندن دافک عوام نا پارسا تینا دکانداری ءِ کرسا کیرہ۔

پاننگ نا مسخت دا کہ ادب و سیاست نا پڑ اٹی ہروڑ انا نظریہ و بے نظریہ غا انسان تا کچ ساڑی ارے ولے ڈاکٹر چی گویرا نا قول اسے کہ نظریاتی آ انسان جاگہ اس ہم درو کپک، و دروغ تڑپک، ہندن بے نظریہ غا انسان اسُل وفادار مفک۔۔۔۔۔ تو دا ہیت آتیا کڑمبی اٹ سجفنگے، تو ننا ایب و کیب اٹ ہم دن ءُ بندغ بھاز رسینگک، ہندن نظریاتی آ انسان آک ہم اریر ہرافک تینا نظریہ نا سوب آن اسکرین آن پیشن خننگرہ، ولے بھاز تینا قول و فعل نا پابند مریرہ اسُل کہ دا ادب نا پڑ اٹی مریر یا کہ سیاست، ہندن سیاست آن پیشن قبائلی، راجی پڑ آتے ٹی مریر۔۔۔۔۔ ولے اگہ دا گڑانا ہموفتے سما تمک ہرافک کہ نظریہ نا پیمانہ ءِ بھاز جوان پہہ مریرہ، آخا تو بے نظریہ غا انسان کن بیش و ہُلی نا فرق ہم مفک۔۔۔۔

ہفتئی تلار
تاک: 45
21-27 November, 2020
پنہ: 06

Get real time updates directly on you device, subscribe now.

Leave A Reply

Your email address will not be published.