کس زند آن خوش اف

ڈاکٹر سعید تبسم

زندگی نا سہب ئِ شام، شام ئِ سہب کننگ نا پن زند ئِ گدریفنگ ئِ۔ ٹائم پاس کننگ نا پن ئِ ہم گڑاس زند ئِ گدریفنگ پارہ۔ کس انا سہب شام مس تو اللہ نا شکر ئِ ادا کیک۔ دا زمانہ ٹی ہمو نصیب والو سے۔ مطلب سہب آن شام مننگ ننا راج اٹی اسہ چیلنج اسے۔ کس ئِ سما اف اونا سہب امر شام مریک۔ ہر بندغ ئِ ہندا وہم ئِ کہ گڑاس کن تون ضرور مریک۔ دیہاڑی والا ئِ ہندا غم ئِ کہ دیچہ روزگار مریک یا مفک؟ اینو نا دے امر کاہک؟ وامدار ئِ ہندا غم ئِ کہ اینو دن مف کس مون اٹی سلے؟ بیمار ئِ ہندا وہم ئِ کہ اسہ وار ولدا کبین ئُ دے اس گدریفوئی ئِ۔ غم تا خلوک آ بندغ ئِ اسہ وار ولدا قیامت اسے تون مون تروئی ئِ۔ سیاستدان تے اسہ دے ولدا تین پہ تین نا سُو تے کشکوئی ئِ۔ تین پہ تین نا پچ آتے کشوئی ئِ۔ ننا راج ہندن جوڑ مسنے کہ اسٹ نا دے ہم گچین گدرینگپک۔ زند کل اکن زند اس اف۔ اسہ بھیم و خلیس اسے۔

ہتم نا شوخ آ موسم کرار کرار خڑک بسنے۔ گواڑخ نا خیسن آ پھل آک مش و دامان تیٹی بشخندہ نا تیاری ٹی ئُ۔ چلتن نا بالاد آ پیہن آ برف آک امن ایمنی خوشحالی نا نشانی ئُ۔ زیبل آ وطن اٹی بلبل آتا توار، ککو آتا گڑگڑ دیوان، بس زُو اس شروع مننگ ئِ۔ اسہ وار ولدا شاعر و اِستار تا دیوان مریک۔ یات آتا دریچہ غاک ملنگرہ۔ نئے دافتا کچ ئِ نئے دافتا حساب ئِ۔ زیبل آ نن چنک مریک۔ استار تا سفر زُو اس ہنین ئُ سہب اسے آ ایسر مریک۔ یات آتا سفر چٹک۔

سہب اتون سما تمک کہ ماش انا دال 250 روپئی ئِ سر مسنے۔ سُو ہزار روپئی سیر مسنے، برنج نا اسہ سیر دوسد روپئی ئِ سر مسنے۔ شاعر نا عشق انا خمار استار تتون اوار گم مریک۔ سیاستدان، خونی، قصاب، دیہاڑی دار، دکاندار، پنڈوک، تین پہ تین ئِ بدرد کروک، کل تینا تینا کاریم تیا راہی مریرہ۔ کس تینا زند آن خوش اف۔