براہوئی زبان نا تاریخ 13

نیاڑی تا تعلیم:۔

ہراڑسکان براہوئی پاروک آتا نیاڑی تا تعلیم نا ہیت ءِ، تو کنا خیال ءِ کہ اوڑکن اینو آن 105 سال مُست یعنی 1915ء نا سال اٹی ودی مروک آ نیاڑی ”گودی تاج بانو“ نا مثال گنج اسے۔ اگہ براہوئی پاروک آتے ٹی پٹی آتا تعلم آ بندی یا رکھ اس مسکہ تو راج انا دا گودی او زمانہ ٹی دن ءُ بھلو کارنامہ کننگ کتوکہ۔

اثیر عبدالقادر شاہوانی ”الس“ اٹ شینک مروک تینا نوشت اٹی پاہک کہ براہوئی زبان تون اوار اوار گودی تاج بانو فارسی، بلوچی، سرائیکی، سندھی و اردو ٹی نوشتہ کرینے، و اونا کتاب آتا کچ پنجا و پنچ اسکان ارے۔ دا زبان آتیان بیدس گودی عربی زبان ءِ ہم گچینی اٹ چاہوک اس مسنے۔ 

گودی نا بے مٹ آ نوشت آتے ٹی اسہ دُعائیہ و پنی ءُ شئیر اس ارے، ہندا دُعائیہ شئیر آن، اونا فہم، لائخی وتینا لمئی آ زبان براہوئی کن کاریم کروک آ، فرد آتتون مہر پاش مریک۔ اوفتا سفت و ستا ءِ کرسا گودی پاہک کہ: 

اولیکواوفتا بابو تراب ءِ

ایتس اودے قیامت نا ثوابءِ

ایلم ایلم کنا مس نور محمد 

رحم کیس قیامت اٹی اوڑا بے حد

مسٹمی کو اونا انت کیو ای بیان ءِ

پن ءِ تے پاو ڈاکٹر عبدا لرحمانءِ

چارم اوفتا زمرد حسین مس

کنا احوال پُرسی کن او تینٹ بس

اسٹ اوفتے ٹی نادر قمبرانی

مرے رب نا ہموڑا مہربانی

صلا ح ا لدین صالح ء ِخدا نا

مرے نور آن پُر ہر دم اُرانا

عبدالقادر کہ ایلم نیک بخت آ

مدتی مس کنا دا وخت آسخت آ

اسٹ پین ارے صابر پنی آ 

سرپرہ سے کردگاپ اٹی جہی آ

اینو آن سی چل سال مُست اسکان، ہر دیار نا چناتے ہمو دیار نا اسہ نیاڑی اس تینا اُرا ٹی مُچ کریکہ او وخت انا حساب اٹ قاعدہ، قرآن شریف و پنچ کتاب ءِ خوانفیکہ۔ البتہ اسکول خوانوک ءُ الو، سوب دا ئس کہ او زمانہ ٹی تیوی آ قلات یعنی ساراوان و جھالاوان اٹی مسن تا بیرہ اسہ اسکول اس ئس، ہرادے کہ خان قلات خان احمد یار خان جوڑ کریسس۔ مُر مُر انا مَسِنک کہ وخت انا حسا ب اٹ، او اسکول اٹی بننگ و خواننگ کتوسہ۔ ہندا وڑ مدرسہ ہم الو۔ دا زمانہ ٹی اسکول و مدرسہ یعنی تعلیم نا آسراتیک مچٹ و بھاز ساڑی اریر تو اوفتیان سال انا بھلو کچ اسیٹ مارکو تتون اوار اوار مسِنک ہم فارغ مرسا عالمہ، حافظہ،ٹیچر و ایلو محکمہ غاتے ٹی نوکر مننگ اٹی ءُ۔ مطلب دا کہ براہوئی پاروک آتے ٹی نیاڑی نا تعلیم آ، نئے مُست رکھ مسنے نئے داسہ رکھ اس ارے۔ مڑوئی مُست تعلیم نا آسراتیک متنو، ہندا سوب آن تعلیم نا چاگڑد مفننگ آن نیاڑی تو نیاڑی ءِ نرینہ غاک ہم تعلیم دوئی کننگ کتنو۔

ہفتئی تلار 

تاک: 38

03-09 Oct, 2020

پنہ: 02