براہوئی ادبی حوال (8)

٭ چیئرمین اکادمی ادبیات ڈاکٹر محمد یوسف خشک نا کوئٹہ نا دوڑہ

٭ کوئٹہ نا دفتر نا بنائی آ دود

٭ بلوچی، براہوئی، پشتو اکیڈمی و ایلو ادارہ غاتا دورہ

28 ستمبر نا دے اکادمی ادبیات پاکستان نا چیئرمین ڈاکٹر محمدیوسف خشک اِرا دے ئی آ دورہ غا کوئٹہ غا بس، او داڑے اکادمی ادبیات نا کوئٹہ برانچ نا دفتر نا بناءِ کرے۔ دا وخت آ ریجنل ڈائریکٹر افضل مرادؔ آن بیدس کوئٹہ نا ادیب، شاعر و دانشور آتا بھلّو کچ اس ساڑی ئس۔ ایکان پد نوری نصیر خان کلچرل کمپلیکس نا ہال اٹی سیکرٹری ثقافت نا پارہ غان کوئٹہ نا ادیب، شاعر و دانشور آتا درستی راستی نا دود اڈ تننگا۔ تلاوت قرآن پاک نا شرف ءِ براہوئی زبان نا پنی آ شاعر مولانا عبدالرشید ہمدم ؔدوئی کرے۔ و دا وخت آ مولانا عبدالرشید ہمدم چیئرمین ءِ بخیر کرسا فی البدیہہ شئیر بنفے، ہرا سنگت آتے دوست بس۔ دا کچاری ٹی کل آن مست چیئرمین اکادمی ادبیات تینا درستی راستی ءِ کرفسا پارے کہ اسہ اُستاد اسے نا وڑ اٹ ملک وملک آن پیشن چندی یونیورسٹی تیٹی خوانفیٹ و جرمنی آن ڈاکٹریٹ کریٹ و داسہ کنے دا منصب کن گچین کننگا، اومیت کیوہ کہ نم کن تون کمک کرورے۔ تاکہ نن پاکستانی زبان آتا ادب کن تینا گچین آ کڑد ءِ ادا کین۔ اونا درستی راستی آن پد ادیب و شاعر آک تینا درستی راستی ءِ چیئرمین تون کریر۔ دا وخت آ چیئرمین ڈاکٹر یوسف خشک پارے، ”بلوچستان پاکستانی زبان تا اسہ گچین ءُ گلدستہ اسے۔ داڑے براہوئی، بلوچی، سندھی، سرائیکی، کھیترانی، لاسی، دہواری زبانک پاننگرہ، و داڑے (صوبائی دارالحکومت کوئٹہ ٹی پاننگوک) ہزارگی، فارسی، پنجابی و کشمیری زبانک ہم اریر، وخت اس کہ اردو کل انا رابطہ نا زبان نا وڑ اٹ ہم ساڑی ارے۔ و دا جاگہ نا مسہ زبان براہوئی، بلوچی و پشتو ءِ اکادمی ادبیات نا نیمہ غان کُمک ہم رسینگک، و دا زبان تا اکیڈمیک و ادبی ادارہ غاک بھاز گچین وڑ اٹ تینا زبان و ادب کن کاریم کننگ اٹی ءُ۔ او پارے کہ اکادمی ادبیات نا دا کوشست ءِ کہ دا زبان تا ادب جہانی مرے۔ داڑکن دا زبان تا ادب ءِ اردو، انگریزی و ایلو زبان تیٹی ترجمہ کننگے و ایلوجہانی زبان تا ترجمہ (مٹ و بدل) دا زبان تیٹی مرے۔ تاکہ دا زبانک تالان مریر و شون ہلیر۔ دا رد اٹ اکادمی ادبیات نا کنڈ آن دا زبان تا کتاب آتا شینکاری و اوفتے ڈیجیٹل آسراتی تا بابت کاریمک سر کننگ انگ ءُ۔

چیئرمین ڈاکٹر محمد یوسف خشک پارے کہ داوخت آپاکستان اٹی 72 زبان ءُ۔ دا زبا ن تیٹی بھاز آک تینا عمر انا گڈیکو ساہت اٹی ءُ۔ دا زبان تے بچفنگ کن اکیڈمی تینا کڑد ءِ ادا کننگ اٹی ءِ۔ داڑکن دا زبان نا فوک ادب و زبان تے ریکارڈ کرسا اوفتے بچفنگ و دا زبان تے اسکول آتیٹی خوانفنگ نا بست و بند مننگ اٹی ءِ۔ تاکہ اوفتا پاروک آک ودر۔ او پارے کہ پوسکن ءُ رپورٹ اسے نا رد اٹ بلوچستان نا چندی زبان تا بارو اٹ ہم دا پاننگانے کہ اوفک ختمی آن خُڑک ءُ۔ ولے ای اومیت کیوہ کہ دا جاگہ نا ادیب و شاعر آک تینا زبان تے بچفنگ نا کوشست ءِ کرور۔ اکادمی ادبیات پاکستان اوفتتون ہر وڑ انا کمک کننگ اٹی ءِ۔ و دا کاریم صوبہ بلوچستان نا حکومت نا ہم کاریم ءِ کہ او زبان تا تدریسی یعنی خوانفنگ کن گام گیج کے۔

دا وخت آ سیکرٹری کلچر اصغر حریفال پارے کہ نن بلوچستان نا رسم و دود آتا نشان تننگ کن ثقافتی پروگرام کننگ اٹی اُن۔ و داسہ نن دا زبان تا ادبی مڈی یعنی کتاب آتے ہم بلوچستان لائبریری تے کن ہلنگ کن گام ہرفون۔

دا مچی ٹی ڈاکٹر نعمت اللہ گچکی، ڈاکٹر عبدالرؤف رفیقی، ڈاکٹر بیرم غوری، ڈاکٹر لیاقت سنیؔ، عبدالقیوم بیدارؔ، نور خان محمد حسنی، وحید زہیرؔ، عبدالرازق ابابکی، عبدالغفور ساسولی، محسن شکیل، بلوچی اکیڈمی نا چیئرمین ممتا زیوسف، امان اللہ ناصر، سرور جاوید، مولانا عبدالرشید ہمدمؔ، حسن ناصر، عارف ضیاءؔ، افضل مرادؔ، اے ڈی بلوچ، جہاں آرا تبسم، ڈاکٹر زینت ثناء، تسنیم صنم، پناہ بلوچ و ایلو ادیب و شاعر آک اوار ئسر۔

ارٹمیکو دے اکادمی ادبیات پاکستان نا چیئرمین ڈاکٹر محمد یوسف خشک و افضل مرادؔ گورنر بلوچستان جسٹس (ر) امان اللہ خان یاسین زئی تون اوڑدہی کریر۔ و اوفتے پاکستانی زبان تا ادب نابارو اٹ معلومداری تسر۔ ایکان پد ڈاکٹر محمد یوسف خشک بلوچی اکیڈمی، براہوئی اکیڈمی، پشتو اکیڈمی نا دورہ ءِ ہم کرے و بلوچستانی زبان تا ادبی کاریم تا بارو اٹ اوفتے معلومداری تننگا۔ ہندا دورہ ٹی اوفک سنگت اکیڈمی آف سائنسز نا باسک آتتون ڈاکٹر شاہ محمد مری نا کماشی ٹی ملاقات کریر۔ و ہندن براہوئی ادبی سوسائٹی نا باسک آک ہم چیئرمین اکادمی ادبیات پاکستان ڈاکٹر محمد یوسف خشک تون ملار و اودے تینا ویل آتیان معلومدار کریر۔ براہوئی ادبی سوسائٹی نا چیئرمین عبدالقیوم بیدارؔ اودے ٹیکی ترسا اونا کوپہ غا بلوچ ربیدگی خیری اس شاغا، و وائس چیئرمین وحید زہیرؔ اودے ٹوپ اس ٹیکی تِس۔

ہفتئی تلار 

تاک: 38

03-09 Oct, 2020

پنہ: 04