فیڈل کاسترو 7
ڈاکٹر شاہ محمد مری (براہوئی بدل: جیلانی الفت)
Get real time updates directly on you device, subscribe now.
25 جولائی 1953ء نا دے فیڈل کاسترو 18 سال آن ہلیس 25 سال نا ورنا غا نرینہ و نیاڑی تا اسہ پڑک اس تین تون اوار کرے۔ اوفتے فوج انا یونیفارم بیرفے۔ او نیم نن آن گڈ 5 بجہ غا کیوبا نا ایلو بھلا شار ”سنتیا گوڈی کیوبا“ نا فوجی قلعہ ”موکیڈا چھاؤنی“ آ جلہو کرے۔ ولے افسوز کہ دا مسڑ و مار تے دا شار انا کسرک سما الوسہ۔ کاسترو نا عمر او وخت آ 26 سال ئس۔ اوفتتون او وخت انا سلہہ ئس نئے آزموندہ۔ اوفتتون بیرہ اسہ مشین گن اس ئسکہ۔ و منہ متکن ءُ ریفل ئسرہ۔ دا بندغ آتے تینے و تینا کاز آ بھروسہ ئس۔ اوفتے یقین ئس کہ ہچ ءُ گڑاس دن مفک کہ مننگ کپ۔ و ہچ ءُ کسر اس دا خہ در کبین اف کہ ایسر اسکان سر کننگ کن اِلیپ۔
او مُسہ مسخت کن دا ماڑی آ جلہو کریر۔
اسٹ تو دا کہ اوڑا کوزہ کننگے۔
ارٹمیکو دا کہ دا قلعہ ماڑی ٹی ساڑی بھلا سلہہ غاتیا کوزہ کننگے۔ ہرافتا کہ اوفتے اوفتا انقلابی فوج ءِ گُرج ئس۔ دا سلہہ غاتے ہمو مخلوق اٹی بشخ و بانٹ کننگو ہرا کہ تینا آزاتی کن جنگ انا عظیم انگا روایت آتے مڑوئی زندہ تخنگ خوارہ۔
دا جلہو نا مسٹمیکو مسخت دا ئس کہ امریکہ نا پارہ غان کیوبا غا تالان کروک آ جنرل بتستا نا برخلاف اسہ لَس بغاوت اسے نا بِنا ءِ کننگے۔
دا انقلابی آ کمانڈر آک ہرا وخت آ مونکیڈا غا جلہو کریر۔ اوفتتون سرسہبی نا وڑ اٹ اسہ انقلابی پروگرام اس نوشتئی وڑ اٹ ساڑی ئس۔ او اسہ پنچ ٹکی ءُ انقلابی کانود اس جاری کننگ نا فیصلہ ءِ کریر۔ پروگرام دا ئس کہ دا چھاونی (مونکیڈا) غا کوزہ کننگ آن گڈ دا انقلابی آ کانود ءِ تالان کننگک و اودے ریڈیو آ نشر کننگک۔
دا انقلابی کانود نا اولیکو ٹِک دا ئس کہ اقتدار ءِ فوجی زوراک آن پلسا مخلوق نا دوٹی تننگک۔ و 1940ء نا آئین ءِ برجا کننگک۔ ہمو وخت اسکان مخلوق داٹی ہچ ءُ کمبوتی یا گیشتری اس کننگ کپک۔ دن کہ فوجی زوراور کل ادارہ غاتے تباہ و برباد کرینے۔ پدا ہچ ءُ گچین کاری ادارہ اس ساڑی سلتنے۔ ہندا سوب آن انقلابی تحریک نا جند اقتدار ءِ دوئی کیک۔ و آئین نا بدلی نا واکداری تون اوار ایلو کل واکداری تے دوئی کیک۔
ارٹمیکو ٹک دا ئس کہ مُچ آ ڈغار تے کشت کشار کروک آتیٹی بشخ و بانٹ کننگک۔
انقلابی کانود نا مسٹمیکو ٹک دا ئس کہ کل بھلا صنعت، واپار و معدنیات نا کٹ انا 30 درسَد مزورکار آتا مریک۔
چارمیکو کانود نا رد اٹ کمند نا کشار ءِ کروک آتے بورہ غان ملوک آ 55 درسد بشخ ءِ تننگو۔
پنچمیکو کانود ءِ دا وڑ اڈ تننگو کہ مست انا حکومت آتیان ہرا بندغ آک فائدہ ہلکسُر او کل ءِ خوندی کرسا تینا دوٹی ہلنگک۔
دا ارادہ ہم ئس کہ شیفکو ٹک آتا ایسری کن چسپانی اٹ گام ہرفنگک۔
…………صنعتکار آتا ویل، ہاؤسنگ نا ویل، بے روزگاری نا ویل، تعلیم نا ویل و مخلوق نا جانجوڑی نا ویل آتے کن گام ہرفنگک۔
…………نوشتوک وڑ اٹ ضمانت تروئی ئس کہ حکومت ءِ سنبھالنگ تون شاردار تے آزاتی، سیاسی و جمہوری رویہ غاتے برجا تخنگک۔
ہفتئی تلار
تاک: 38
03-09 Oct, 2020
پنہ: 03