چیدگی مہر انا علامت

شینگر قادر آباد ہرا ضلع واشک نا اسہ علاقہ اسے، شینگرنا بھلا مش، ہرا ایلو مش تیان بڑز و زیبا خننگک۔ چیدگی نا مش مہر و مریبت نا اسہ بھلو علامت اسے۔ چیدگی شینگر نا پجار و شناخت ءِ۔ چیدگی نا مش شینگر کن اسہ ڈرون اسے نا کڑدار ءِ ادا کیک۔ وخت اس بندغ چیدگی نا زی آ لگک تو اوکان مچ آ شینگر نا زیبائی و اونا باغ تا سرسوزی، دیر تا جوک، تلاپ آتا خوشنمائی و شار انا لچخ نا اُرا تا اسہ جوان ءُ وڑ اسے ٹی ندارہ ءِ کیک کہ ہر گڑا اسہ قطار اسیٹی خننگک۔ دا مش ءِ چیدگی دا سوب آن پارہ کہ مش انا کاٹم آ اسہ بھلو چیدہ اس جوڑ کروک ءِ، ہرا مچ آ شار آن خننگک، دا چیدہ ءِ دیر جوڑ کرینے؟ خاص وڑ اٹ چاہنگپک، انتئے کہ بھاز آ بندغ آتا خیال ءِ کہ دادے ایماندار ثناء اللہ محمد حسنی جوڑ کرینے، و بھاز آک دادے اوکان ہم مست انا چیدہ اس پارہ، و اوفتا خیال ءِ کہ دا مست مچے چنک مسنے، گڑا ایماندار ثناء اللہ محمد حسنی پین بھلو خل ایسنے و چیدہ ءِ بھلن کرینے۔ واللہ اعلم۔ ہرا وخت آ ای شینگر قادر آباد اٹ خواناٹہ تو ہمے زمانہ نا طالب آتا اسہ عادت اس پنی ئس کہ اوفک چار بجہ نا وخت آ تینا کاپی و کتاب آتے ہرفیرہ قطار مرسا چیدگی کن راہی ہلکرہ، چیدگی مش آ ہر اسہ طالب اسہ کنڈ اسے آ تولوک تینا سبخ ءِ یات کریکہ۔ دا چیدگی نا مہر ئس کہ تینا دامن اٹی طالب آتے جاگہ تسکہ، اوفتا سبخ آتے یات ترفیکہ۔ طالب آتیان بیدس ہم شار انا بھلاک وخت وخت تینا مونجائی تا پرغنگ کن چیدگی نا مش آ ہنارہ، و تینا دڑد آتے چیدگی تون بشخارہ۔ سہب آن شام اسکان خلق انا چنا بھلا تیان گڑاس ضرور چیدگی نا سیل اٹی ئسر۔ چیدگی تینا مہر و مریبت ءِ مچ آ شار اٹی تالان کریسس، ہرانا سوب آن شینگر نا ہر بندغ اسٹ ایلو تون مہر و مریبت نا مثال جوڑ ئس، اسٹ ایلو نا خیرخواہی، دڑد آتیٹی شریک مننگ، خوشی تیٹی اواری و یکجائی شینگر نا بندغ آتا علامت ئس۔ ولے بلوچستان نا حالیت آتا خرابی شینگر ءِ ہم پلویڑ کرے، ہرانا سوب آن ہر بندغ تینا اُرا ٹی بند مس ہر کس تینا کوٹھی تا چارما کنڈ بھلو بھلو دیوال تفے، وخت اناک پارینو کہ ہراتم علاقہ غاتیٹی چاردیوالیک بسر تو مہر و مریبت ایکان بال کیک، ہندن شینگر نا علاقہ نا ہرا مست انا مہر و مریبت ئس دیوال آتا نیام اٹی اوٹی ہم کمی بس۔ بھاز آ بندغ آک خراب انگا حالیت آتا دو آن بیوس مرسا شینگر تون اوار اوار چیدگی آن ہم موکل کریر، سفر نا رخت تفسا پین کسر تیا راہی مسر، اے دے آ چیدگی بھاز ہوغا انتئے کہ چیدگی ءِ ہم سما ئس کہ کن تون مہر کروک آ دا بندغ آک حالیت آتیان بیوس مرسا کنے آن جتا مننگ اٹی ءُ۔ اودے تینا بندغ آتا جتائی نا بھلو دڑد اس مس، ہرافتے او سبخ یات ترفیسس، ہرافتے تینا دامن اٹی جاگہ تسوسس، ہرافتے چنکی آن بھلنی اسکان مہر تسوسس، ہرافتتون گوازی کریسس، اینو اوفتا دن امپنگ و ہننگ آن چیدگی نا است لار کننگ اٹی ئس، ولے پدا ہم گڑاس بندغ بچاسر، ہرافک وخت وخت چیدگی آ ہنارہ، ہرافتا گند چیدگی نا خل خل اٹی ساڑی ئس۔ چیدگی دافتے جوان چاہسکہ، انتئے کہ دافتا چنکی ہنداڑے بھلن مسوسس۔ چیدگی ہندا بندغ آتیان تینا ایلو سیال و وارث آتا حال و حوال ءِ ہلککہ، ایفتے ہم چیدگی نا یات آک مجبور کریرہ، اوفک ہم چیدگی نا زیارت کن وخت وخت تینا خن تے شینگر آ ایسرہ، و تینا متکن آ یات آتے تازہ کریرہ۔ دے اس چیدگی ہُرا کہ لشکر اس چیدگی آ لگنگ اٹی ءِ، اوفک پین زبان اسیٹی ربڑنگ اٹی ئسر، ہرافتے چیدگی پہہ مننگ ٹی الو، ہمو بندغ آک چیدگی نا پیشانی آ اسہ چنکو کھڈی اس جوڑ کریر و ہموڑے توسر، اوفتا بننگ آن پد چیدگی تینا بندغ آتے کن بھاز زہیری مس، انتئے کہ ہمودے آن کہ ہندافک چیدگی نا زی ءِ ہلکنو ہمو دے آن چیدگی نا سیال و وارث آک چیدگی آن مرّ مسنو۔ چیدگی ہندن خیال کیک کہ دا پوسکن آ بروک آک کنا سیال و وارث آتے کنے آن مرّ کرینو۔ او بس دعا کننگ اٹی ءِ کہ اے خدا بلوچستان تون اوار شینگر نا حالیت آتے جوان کیس امن و امان ءِ بحال کیس کہ ای تینا سیال و وارث آتتون پدا مجلس و دیوان کیو۔

ہفتئی تلار
تاک: 40
17-23 Oct, 2020
پنہ: 03