فیڈل کاسترو (10)

ڈاکٹر شاہ محمد مری براہوئی بدل: جیلانی الفت

0

Get real time updates directly on you device, subscribe now.

Fidel Castro 

اولیکو سیشن اٹی کنے شاہد نا وڑ اٹ بٹنگ اِنگا۔ اِرا کلاک اسکان پراسیکیوٹر و 20 وکیل کنے آن سوج کرسا ہِنار۔ ای سہی وڑ اٹ حساب کتاب تون اوار دا شاہدی تننگ اٹی سرسہب مَسٹ کہ داڑا اخہ در پیسہ خڑچ کننگا، و انت انت سلہہ نن مُچ کننگ کرین۔ کنے ہچ اس ڈکوئی الو انتئے کہ راستکی تو ہندادے۔ دا کل ہمو قربانی تا سوب آن مسُّر ہرانا درور ننا ملک انا تاریخ اٹی ملپک۔ ای ہمو ہدف آتا ہیت ءِ کریٹ۔ ہرا کہ ننے دا جہدو کوشست اٹی انسپائر کریر۔ و ہمو انسانی و سخی گری نا بارو اٹ پاریٹ ہرادے کہ نن ہمو وخت آ تینا مخالف آتا برخلاف تالان کننگ کرین۔ اگہ ای اوفتے دا پاننگ اٹی سرسہب مسُّٹ کہ ہرا بندغ آتے دا مقدمہ ٹی غلط وڑ اٹ اوار کننگا او نئے بالواسطہ و نئے بلا واسطہ داٹی اوار ئسُّر، تو کنے تینا بہادر انگا کامریڈ آتا مُخ تفی و کمک دوئی ارے۔ نن ہرا وخت اسکان جیل اٹی رہینگان کنے اسہ وار ہم تینا کامریڈ آتتون ملنگ نا موکل تننگتو۔ ولدا ہم نن اسل ہنداوڑ کننگ نا ڈٹ ڈَول سجفین۔ راستکی دادے کہ ہرا وخت آ بندغ آک تینا است آتیٹی اسہ وڑ انا گمان اس تخرہ، تو ہچ ءُ واکداری اس اوفتے تنیا کننگ کپک۔ نئے جیل انا دیوال آک و نئے گورستان نا بئے، (افریقی متل اسے) ہندا سوب آن کہ اسٹ انگا جوزہ، اسٹ انگا گمان و فکر، اسٹ انگا ضمیر، اسٹ انگا شرفداری دا کل گڑا تے سنبھالک تخک۔

ہموتم مونکیڈا بیرک نا واقعہ غاتیان تعلقداری تخوک آ رجیم نا کنڈ آن چست کروک آ دروغ آتا مڈول آک تاش انا جوڑ کروک آ اُراتیانبار تمنگ بنا کریر۔ پد تے دا مس کہ پراسیکیوٹر پہہ مس کہ ہشکا تروک آک پندار مروک آ ہمو کل بندغ آتے جیل اٹی تخنگ اسُل سَٹی ءُ گڑاس مرو۔ او اوفتا گڈل وڑ اٹ یلہ کننگ ناخواست ءِ کرے۔ 

و اولیکو سیشن اٹی کنا بیان نا گُڈ سراٹ، ای عدالت آن موکل خواہسٹ کہ کنے کٹہرا ءِ اِلنگ و رکھ اکن وکیل آتا بنچ آ تولنگ کن النگے۔ دا موکل تننگاسُس دا وخت آ کنا ہمو مشن بنا کرے، ہرادے کہ ای دا مقدمہ ٹی تینا خاص وڑ انا مشن پاوہ۔ ہمو لغوری آ ڈکھیائیک و چم بازی آ دروغ آتے سرجم وڑ اٹ بے پت کننگ ہرافتے کہ رجیم ننا جنگ کروک آتا برخلاف کریسُس۔ ہمو بد بیسئی و گڑیفوک آ ڈوہ تا نمن مننگ کپروک شاہدی تے بے پڑدہ کننگ، ہرافتے کہ اوفک بندی تیا بیٹ کریسر۔ و قوم و دنیا ءِ کیوبائی مخلوق نا بے مٹ آ بدبختی ءِ نشان تننگ ہرافتے کہ او تینا تاریخ نا کل آن زیات ناتڑسی و کل آن زیات غیر انسانی ظلم و تادی تا دو آن سگنگ ءُ۔ 

ارٹمیکو سیشن 22 ستمبر آ سَے شنبے نا دے مس۔ او وخت اسکان بیرہ 10 شاہد تا پیش مسر۔ و اوفک مہالو آن فنزالینو علاقہ ٹی مروک آ کشت و خون ءِ پیدوار کریر۔ خاص وڑ اٹ اوفک ہمو پوسٹ ءِ کمان کروک آ کیپٹن آ رُوآن راست زمواری تا ریکارڈ ءِ ایسر۔ سَے سد شاہد نا پیشی داسکان مروئی ءِ۔ انت مسکہ اگہ ای شاہد و راستکی تا اسہ گڑیفوک ءُ کوڑی سے تون اوار آرمی نا ہمو بندغ آتیان سوج ورندی کروسٹ۔ ہرا کہ ہمو ڈوہ تا بلا واسطہ زموار ئسرہ۔ گڑا رجیم کنے مقدمہ ءِ بننگ کن ساڑی دا بھلو مچی نا مون آ دا وڑ کننگ نا موکل ایتک تفک؟ ای کل جزیرہ نا حوالکار و کانود چاہوک آتا مون آ کیس ءِ اتنگ خواوہ؟ و اپوزیشن نا پارٹی کماش آتا مون آ ہرافتے کہ او ہبلہ مرسا بندی تا کوٹھو اٹی تولفینو۔ ہراکان او ہر ہیت ءِ جوان وڑ اٹ بننگ کیرہ؟ او تو دانا موکل ءِ تننگ نا جاگہ غا کمرہ عدالت ءِ کل جج آتتون اوار بمب اٹی بھس کرور۔

و ہندن ءُ اسہ ڈٹ ڈَول اس سجفیر، ہرانا رد اٹ او کنے مقدمہ نا کمک اٹ چٹفنگ کریرہ۔ و اوفک ہندن کرسا کاریم ءِ بنا کریر۔ Manu Militari 25 ستمبر جمعہ نا نن مقدمہ نا مسٹمیکو سیشن نا وخت آ جیل انا اِرا ڈاکٹر کنا سیل اٹی بسُّر۔ اوفتا شکی گری پاش خننگاکہ۔ ”نن نا چیک اپ کن بسنُن۔“ اوفک پاریر۔ ای اوفتیان ارفیٹ ”دیر کنا جانجوڑی کن داخہ در فریشان ءِ؟“ اصل اٹ ہراتم ای اوفتے ہُراٹ تو کنے سما تما کہ او انت اکن بسنو۔ او تینے کنا مون آ بھاز شرفمند پیش کننگ کتوس۔ ہندا سوب آن اوفک تینا ڈکھیائی حالیت آن پاش مسر۔ ”اینو دیگر تون کرنل شاویانو جیل اٹی بس و ننے پارے کہ نی دا مقدمہ ٹی حکومت ءِ گڑیفوک ءُ بھلو نسخان اس تننگ اٹی اُس۔“ کرنل اوفتے پارے کہ نی اسہ سرٹیفکیٹ اسے آ دستخط کر۔ ہراٹی دا پڑو مرو کہ نی ناجوڑ اُس۔ و عدالت اٹی پیش مننگ کپیسہ۔ ڈاکٹر آک کنے پاریر کہ او تینا کنڈ آن استیفہ تننگ کن تیار ءُ۔ او تینے آ مقدمہ چلیفنگ نا رسک ءِ ہرفنگ کن تیار ءُ۔ او معاملہ ءِ کنے آ اِلّا۔ کہ ای انت کہ خواو ہندن فیصلہ کیو۔ کن کن دا بندغ آتے تینٹ بے سجفنگ آن بھس کننگ بھاز سخت ئس۔ ولے ای اسہ وڑ اٹ ہم ہمو پرمان تے امنا کننگ کتوٹہ۔ ہیت ءِ داسہ اوفتا ضمیر آ السا ای بیرہ دا پاریٹ ”نمے تینا زمواری تا تینٹ سما مرو ءِ یخین اٹ ای تینا زمواری تے چاوہ۔“

ہفتئی تلار
تاک: 41
23-30 Oct, 2020
پنہ: 03

Get real time updates directly on you device, subscribe now.

Leave A Reply

Your email address will not be published.