زالبول تا آزاتی

8 مارچ ءِ مچ آ دنیا ٹی نیاڑی تا آزاتی نا دے انا رد اٹ اڈ ایترہ، و پاکستان اٹ ہم دادے ”عورت آزادی مارچ“ انا پن اٹ چارہ، و اڈ ایترہ، ولے ہر بندغ نا مزغ اٹ سوج ودی مننگ ءِ کہ اخر دا نیاڑی تا آزاتی پارہ انت ءِ؟ دا سوچ ہراکان ودی مس و دانا اصل مسخت انت ءِ؟ 

نیاڑی تا حق اکن ہیت کننگ و دا توار ءِ چست کننگ اینو نا ہیت اس اف بلکن دا ہژدہ می کرن (18th century) و اوکان مُست انا ہیت اسے کہ نیاڑی تے کن چندی بندغ آک بریبری و آزاتی نا توار چست کرسا اسلام تون اوار کیہی پین مذہب آتا نظریہ ءِ منتوس، و غلط پاریر۔ امریکہ غان ہلیس انڈیا اسکان، مچ آ دنیا ٹی دا ہیت تالان مس و دن کہ انڈیا ٹی گڑاس نیاڑی اولیکو جنگ عظیم آن پد نیاڑی تا آزاتی کن ہیت کریر اوفتیٹی رانی لکشمی، سورنجی نائیڈو، کمالہ نہرو و پین چندی بندغ آک ئسُر۔ ہندا وڑ اٹ منہ وخت اٹی دا ہیت پاکستان اٹی ہم سر مس، و نیاڑی تا بھلو کچ اس داڑان خوش مرسا داٹی اوار تما، پاکستان اٹ رعنا لیاقت علی نا 1949ء اٹی آل پاکستان وومن ایسوسی ایشن ءِ جوڑ کننگ نا مسخت یا جنرل ضیاء نا دور اٹی (WAF) نا جوڑ مننگ نا مسخت اینو نا ”عورت مارچ“ نا وڑ اٹ اَلوس، بلکن او بیرہ نیاڑی تا زی آ ظلم و بیداد ءِ تورِنگ کن جوڑ مسر، 2008ء آن ہرا آزادی مارچ نا پن آ نظام جوڑ مسنے یا 2010ء آن پد گڑاس تحریک دن کہ (Girls at dhaba) یا (WDF, WC) نا جوڑ مننگ نا مسخت ننا سمجھ آن پیشن ءُ گڑا ءُ، سوج ودی مریک کہ آیا دا تحریک آک نیاڑی نا آزاتی انت ءِ پارہ؟ نیاڑی نا زی آ ایلو نرینہ غاتا غلط انگا خن سختی؟ یا نیاڑی تے اِلنگ کن او تینا منشا اٹ والی و وارث آتے منِّپ و تینا وڑ اٹ امر کہ کے کے، اودے یلہ النگ؟ یا نیاڑی نا عزت ءِ نیلام کننگ؟ نیاڑی ءِ آزات تو کرور، پیشن تینا منشا غا اِلور و اوڑا بھروسہ ہم کرور۔

ہندا سوچ انا خواجہ و گودیک اسلام نا پاروک آ ہیت آتیا اعتراض کننگ ءُ کہ اسلام تو نیاڑی ءِ مے جوڑ کرینے، اسلام تو نیاڑی تے نکاح نا پن آ اُرا تا تہٹی بندی کرینے کہ او چار دیواری ٹی مچ زند بند، کَر و کور مریر۔ دا ہم ہندا فیمینسٹ آتا ودی کروک ءُ ہیت ءُ کہ اسلام نکاح نا پن آ ننا جنسی حق تلفی ءِ کننگ ءِ۔ ہر بندغ نا مزغ ءِ ہڑسانو کہ نرینہ چار برام کیک و نیاڑی تون انتئے دا ظلم ءِ کہ او اسٹ ہم تینا منشا اٹ کپ! ولے دا ہیت ہم ارے کہ اسلام نیاڑی ءِ حیا نا چاگڑد اٹ مننگ نا پرمان کرینے ولے اوفتا زی آ ظلم کَتنے۔ خدا عقل ایتے ہمو بندغ آتے کہ اسلام و اسلام نا حکمت آتے پہہ مریر کہ اسلا ہمو دین ءِ ہرا نیاڑی ءِ کل آن بھاز عزت و قدر تس، زندہ کھڈ مروک آ نیاڑی تیان ارف کہ اسلام نا اخس ءُ گرج اسے اوفتا زند اٹ، فیمینزم یا عورت آزاتی مارچ والاک نیاڑی ءِ اسہ ٹشو پیپر اسے نا وڑ اٹ استعمال کننگ خوارہ کہ استعمال کر و بِٹ ولے اسلام اودے نکاح نا کمک اٹ عزت بشخا، اودے نرینہ نا ملکیت جوڑ کرے تاکہ نرینہ اونا رکھ ءِ تینا زمواری تکے، گُڑا سوچنگے کہ او دیر مرو کہ تینا گِڑا نا قدر، عزت و سنبھال ءِ کپرو؟ او ہرا عقل مند انگا نیاڑی مرو کہ بیدس نکاح غان ٹشو آنبار کاریم اٹ اتنگ انگ ءِ دوست تخو؟ نکاح نا خلاف و نیاڑی تے آزات کروک آ بندغ آتے اسہ وار قرآن نا کلہو ءِ سمجھنگ نا گرج ءِ کہ نکاح یا نیاڑی تا اسہ جاگہ غا بندش یا تو نیاڑی تا زی آ نرینہ نا حاکمیت اٹی ہرا حکمت و سکون اس خدا تعالیٰ تخانے، دا حکمت آتا ننا مزغ اٹ بننگ ننا وس آن پیشن ءِ، ولے علم تخوک آتے کن آخا، کل آن ودیک، ہر راج، مذہب و دین آن بڑزا اسلام نیاڑی نا حق آتا خیال ءِ تخانے و نیاڑی ءِ عزت و شرف بشخانے۔

نن یورپ نا ہیت ءِ کینہ، او جاگہ نا نیاڑی تا آزاتی، تینا مون مننگ نا حوال ءِ بننہ ولے ارفنگے ہموفتیان کہ او ہمو آزاتی ٹی انت عزت خنانو؟ اخس سکون ہلکنو؟ اخس خوش ءُ؟ یا بیزاری ءُ؟ ہمو زند اٹی۔ سوج ودی مفک کہ دن انگا جاگہ ٹی ہراڑے انسان ءِ عزت و شرف مف و اودے جارات برے۔

ہندا سوب ءِ کہ اسلام ءِ پورو ضابطہ حیات پارہ کہ داٹی زند انا ہر رنگ اٹ اسہ سبخ اس و حکمت اس ڈکوک ءِ۔ انسان و ساہدار اٹی فرق ہم یخین اٹ ننے اسلام ہیل تسنے کہ بیدس رسم و نکاح غان میل ملاپ ساہدار تا کاریم ءِ نہ کہ انسان تا، انسان اگہ ساہدار تا وڑ کننگ خواہک تو او انسان پاننگ کڑزپک۔ دن انگا بندغ اشرف المخلوقات پاننگ کڑزپک ہرا کہ انسان تیٹی ساہدار تیانبار آ وڑ تے پتریفنگ نا کوشست کیک۔

ہفتئی تلار
تاک: 40
17-23 Oct, 2020
پنہ: 05