فیڈل کاسترو                                            1

”سوشلسٹ حکومت اٹی ہچ ءُ شار دار اسے تینا آخبت نا رد اٹ تنیا النگپک۔“

کاسترو

نی لکھ کوشست کرسا پا کہ اونا پن ”فیڈل کاسترو“ ءِ، ولے اسہ نہ اسہ محفل اسیٹی بنورے کہ او پن ءِ ولدا ”فیڈل“ آن ”فیڈرل“ جوڑ کننگک۔

ہندا وڑ انا اسہ چَس ہلوک ءُ ہیت اس دادے کہ کیوبا نا جند انا باتیک تینا کیوبا ءِ کیویا پاپسہ بلکن ”کوبا“ پارہ…… ببو نن ”کوبا“ نا ”فیڈل“ نا بارو اٹ گڑاس ہیت و گپ کین۔

کیوبا و فیڈل نا تاریخ بھاز گچین، رنگ رنگی، بھاز شیفی بڑزی تیان گدرینگوک و بھاز گچین مسنے۔ کیوبا (میکار) بھاز عجب ئس۔ دا بش و ریگن والا ریاست ہائے متحدہ امریکہ نا درگہ غاٹے۔ دادے 1492ء ٹی اسپین نا کرسٹوفر کولمبس دریافت کریسُس۔ او داڑا اسہ وار اتون اسپین نا دعویِٰ ءِ کرے۔ ہندن دنکہ چناک اسہ گڑاس خنر و اودے تینا کیر۔

1492ء ٹی کولمبس دا سرزمین آ گام تخا۔ تو اودے جزیرہ سے نا جاگہ غا مُچّ آ برصغیر تکسا تینا شہنشاہ غان اسہ مرغُن ءُ بھلو مملکت اسے نا مستائی ہلنگ کن پدی بس۔ منہ سال آن گڈ ہسپانیہ نا ”عیسائی“ فوج کیوبا ٹی دڑنگا۔

دا اسہ پورو ءُ ملک اس ئسکہ۔ دا جزیرہ غا ہزار آ سال آتیان آبادی ئس۔ ہرا کہ کِشت و کِشار و شکار آ گزران کریرہ۔ ولے سامراجیت بھلو ظالم ءُ گڑاسے، اسہ پورو ءُ ملک اس خنا و چنا تیانبار پارے ”دا ننا مَس“۔ ایہن ہم اسہ سُپرپاور و اسہ ضِدی ءُ چُنا سیٹی فرق مفک۔ طاقت انسان ءِ چنا جوڑ کیک۔ ”دا ننا مس“۔ ”بیرہ غا کیوبا“ کولمبس خان نا مَس، اسپین نا مس۔

لوز کیوبا نا مطلب ءِ ”نیامیکو جاگہ“۔ بیرہ اسپین نا براعظم امریکہ ٹی تینا کل نوآبادی تیانبار دا بنجائی آ جاگہ، کیوبا ءِ ہم ”تینا“ جوڑ کرے۔ (دا ’تینا کننگ‘ تو انسانی زبان اٹی بھاز مقدس معنہ ایتک۔ ولے سامراجی لغت اٹی دانا مطلب ءِ ”کنا غلام“۔ ”کنا گوازی گری آ گڑا“۔ ”کنا پوسکن آ آبادی؟“) ………… و سامراج اسپین ہمو بچوک آ نو آبادی تیانبار دا ملک آ ہم نا تڑسی تا مَش تے بٹے۔ او ہَندی انسان تے مے جوڑ کرے، و مُچّ آ آبادی ءِ ظلم، ناترسی، زوراکی و کسفنگ نا وڑ تیان برباد کرے۔

ایلو سال داڑے ہمو سادہ غا بندغ آتے مزہ کاٹم آک گچین کرسا خلکر، و جہی جاگہی مسُّر۔ پدا دا شرف دار آ دیندار انگا فرنگیک افریقہ غان بے حساب مے ہلکُر ایسُر۔ ہنداخس ءُ کچ اسے ٹی کہ او اصل آبادی نا بھلو بشخ اس جوڑ مسُّر۔ بلوچستان انگریز نا بیرہ 80 سال مے مسنے۔ ولے کیوبا 388 سال اسکان اسپین نا نوآبادی رہینگا۔ داڑان جوان وڑ اٹ کساس کننگ مریک کہ اسپینی نژاد آک نوآبادکار آک اسہ زمیندار ٹولی سینا راجی و زرگزرانی دروشم اٹ ہمو جاگہ نا مقتدرہ رہینگاسُر۔ ہراسٹ نا قدرت اٹ چنکا کشارگر، خواری کش و مے تا خواری و جفا کشی مدام برجا ئسکہ۔ ہمو افریقی غلام آتا دتر و خید ءِ اسٹ کرسا اوفتیان بھلا بھلا جنگل آتے گڈفیر۔ ڈغار تے لنگار کرفیر۔ و شار تے آباد کریر۔ بھاز آ آقاک مے تا نیاڑی تے ہم تینا اُراتیٹی دریر۔ و ہموفتیان کیوبن قوم ودی مَس۔ بیرہ مسٹ و نیم سد سال اسکان اوفتیا حکمرانی و راج کننگ کِن گورنر و افسرآک پدریسہ ہسپانیہ غان برسا کریر۔

کم و وَد چار سد سال آن گُڈ 1868ء اٹی آزادی نا باقاعدہ وڑ اٹ جنگ بنا کرے، و 10سال آن پد اسپین کیوبا ءِ زرس وتواجہی تننگ نا قول کرے…… ولے سامراج نا انت قول اس مرو و اونا پوروی انت؟ مڑوئی داڑے 1886ء اٹی کچ اس اسکان مے مولدی ءِ ایسر کننگا۔

ہفتئی تلار

15-21 August 2020

تاک: 32

پنہ : 8