تاریخ صحافت (20) صحافت بناوردوم
حفیظ ساحل
Get real time updates directly on you device, subscribe now.
ہفت روزہ ”پیسہ اخبار“ لاہور:۔
منشی محبوب عالم ”پیسہ اخبار“ءِ مون مستی پین پنی کننگ کن بیرہ 2 سال آن پد 1889ء اٹی گوجرانولہ غان لاہور آ ہننگ نا فیصلہ کرے، لاہور آن ”پیسہ اخبار“ءِ پوسکن ءُ زیبائی و رنگ اسیٹی بنا کرے۔ 16 مارچ 1897ء اٹی ”پیسہ اخبار“نا ہڑدیئی پرچہ نا ہم بنا مس۔ ولے دا ہفتئی آ پرچہ غانبار تینے پن کننگ کتو۔ ہندا سوب آن کم و وَد ارا سال آن پد مئی 1899ء اٹی بند کننگا۔ منشی محبوب عالم نا پوسکن آ سوچ آک و گچین آ طب انا سوب آن اسہ وار ولدا 1904 اٹی ہڑدے ئی ”پیسہ اخبار“ نا بنا مس۔ اوکان گڈ دا بیست سال اسکان گچین وڑ اٹ چھاپ مرسا ہنا۔ دانا نہاد اسہ پیسہ اس ئسکہ۔ ہرا گلی ٹی اخبار نا دفتر و پریس ئس او ”پیسہ اخبار“اسٹریٹ نا پن اٹ پنی مس۔ و اونا ہندا پن مدامی کن مس۔ ”پیسہ اخبار“الس نا است خواہی نا وڑ اٹ مواد شینک کریکہ ہندا سوب آن دا بے کچ پنی مس۔
ہفت روزہ ”امپریل پیپر“ لاہور:۔
سید رجب علی لاہور آن ”امپیریل“ نا پن اٹ ہفت روزہ اخبار اسے نا بنا ءِ کرے۔ دانا ایڈیٹر سید رحمت علی شاہ ئس۔ دا مارچ 1886ء اٹی الس نا مون آ بس۔ و زو اس تینے مخلوق نا است اٹ جاگہی کرے۔ دادے بھاز گچینی اٹ شینک کننگاکہ۔ 16 پنہ غاتیا تالان دا پرچہ ٹی ملکی و درملکی خبرک بھاز گچینی اٹ شینک مسرہ۔ تینا مضمون تیان بیدس انگریزی ناول آتا قسط وار چرجوئی اس ہم برجا تخاکہ۔ ہرادے الس است انا ہب اٹ خواناکہ۔
ہفت روزہ ”سرمورگزٹ“ ناہن:۔
ناہن علاقہ غان قاضی سراج الدین احمد اردو بولی ٹی سر مور گزٹ نا پن اٹ ہفتہ وار اخبار اس 1889ء اٹ بنا کرے۔ اخبار نا کیرغ آن دا لوز آک نوشتہ مسرہ۔
”خدا تعالیٰ ہچ ءُ قوم اسے نا حالیت ءِ بدل کپک تانکہ او تینا حالیت ءِ تینٹ بدل کتنے۔“
علی گڑھ نا تعلیمی تحریک اٹ اونا پبی ءُ کڑد اس ئسکہ۔ داٹی سر سید احمد خان نا مخ تفی ٹی نوشتانک شینک کننگاکہ۔ سر سید احمد خان نا جند انا نوشت آک ہم داٹی وخت وخت شینک مسرہ۔ علی گڑھ کالج نا حالیت و مسلمان تا دینی و دنیاوی تعلیم نا وڑ اٹ ہم مضمون تے کن خاص ءُ جاگہ اس ئسکہ۔ قسط وار سلسلہ غاک ہم ئسرہ۔ علمی و ادبی خبرک و اسہ اشتہار اس ہم پرچہ ٹی ساڑی مسکہ۔ قاضی سراج الدین احمد سر سید خان تون براہ راست علمی معلومداری کن منہ وخت اکن علی گڑھ آ ہنا ہرانا سوب آن پرچہ بند مس۔ و ولدا ہندا وخت و پاس اٹ سرمور گزٹ نا دفتر و پریس نا کل گڑاک خاخر نا مون اٹ بسر و ہشنگار دانا پوسکن آ گڑا تا ہلنگ کن منہ وخت لگا و منہ وخت آن پد 9 فروری 1891ء اٹی دوارہ اخبار نا بنا مس اخبار اٹ محمڈن ایجوکیشن کانفرنس نا سرجز آتے بھاز گچین وڑ اٹ شینک کننگاکہ۔
یفت روزہ ”سرمہ روزگار“ آگرہ:۔
1887ء اٹی ہفت روزہ ”سرمہ روزگار“ ءِ سید اشرت حسین آگرہ غان بنا کرے، اخبار نا شونکاری و شینک کننگ نا زمواری مرزا خادم حسین آ ئس۔ گڈ سر اٹ دا شعر لکھوک مسکہ۔
”خاکساری سے عجب رتبہ اعلیٰ پایا
دیدہ اہل جہاں میں رہا سرمہ ہو کر“
ہشت پنہ نا تالان دا اخبار اٹ ملکی و درملکی حوال آتیان بیدس مضمون ہم شینک کننگاکہ۔
ہفتئی تلار
15-21 August 2020
تاک: 32
پنہ : 3