اِرا باسن ءُ خڑینک

 کرم خان تینے تینا وخت آن مہالو پیر کریسس…… اونا دُوک بھاز انگا خواری تیان ہَڈہ ئسرہ…… ہرا وخت کہ او تینا دُو تے دعا کن بڑزا کریکہ تو تینا قسمت نا لکیر ءِ خن تا تاک اٹ تخسا واردم آ اودے ہُرسا است انا ہُب اٹ دعا کریکہ……

یا اللہ کنا مڷ مہراب ءِ کنا وڑ خوار ءُ دے نشان تفیس۔ اودے جوڑ دراخ آسودہ کیس…… کنا عمر انا بچوک آ دے تے ہم اونا عمر اٹ شاغس……

مہراب خلق اٹ دہ جماعت ءِ پاس کریسس…… داسہ شار اٹ خواناکہ…… بھاز وخت انا سے او اُرا غا بتویسس…… لمہ ارمان آن اسٹ انگا مار اکن منشت اِلاسس…… کہ اللہ اودے ڈاکٹر اس کے…… ولدا داڑے خلق اٹ انسانیت کن مسیحا جوڑ مرسا خلق خدا نا خذمت ءِ کے…… واہ ہندن چرت خلککہ دیر ءِ سما ءِ مہراب جان نا بس تینا خواننگ اٹ بھاز اختہ ءِ کہ دانگ اُرا غا بفک۔ اونا لمئی آ جوزہ غاک ہندا وڑ اودے تسلی تسرہ۔ لمہ ہزار ارمان تے تینا است اٹ جاگہ ترسا مہراب کن بھاز زہیر کریسس…… کس مہراب نا پن ءِ ہلوسس تو خن تیان تے خڑینک آک وہارہ…… او ہر وخت اس مہراب ءِ تغ اٹ خناکہ تو سہب اتون پنچ پاولی نا شکر خیرات کریکہ…… و ارمان آن بانگو اس ہم غور کریسس…… کہ ہرا وخت مہراب خان بس تو دا بانگو ءِ اونا دارہ ایرہ غان ہڑسسا اوڑکن تڑوہ کہ او سیرپڈ ءُ ارغ نا باخو اس کنے…… سما اف ایڑے پردیس اٹ سیر ءُ باخو اس خنک آخا……

باوہ نا اومیت آک داسہ اودے جواب تسر کہ اٹکل سال اس مننگ ءِ…… مہراب اُرا غا بننگ اف۔ داسہ او تینا اُرائی ماہ گنج ءِ پارے کہ پگہ ای شار آ کاوہ تینا خن تا دیدہ مہراب جان آ تینے سر کیوہ۔

ماہ گنج دے دیگر تون اشتافی اٹ مار اکن خریش اٹ ڈھکو بسسا درزن اس خوائے ہم دیر اٹ لار تس۔ تینا گد انا پلو آن سرسائے اٹ تروک آ پیسہ غاتے ملا…… کرم خان ءِ تس کہ دافتے کنا جغر نا ٹکر ءِ ایتس……  و کنا پن اٹ اونا تیدار آن دروت اس ہم ہلیس……

کرم خان خلق اٹ پاٹ گڈاکہ ولدا اوفتے بہا کریکہ……  او تینا ورنائی ءِ مار اکن ندر کریسس…… کہ او خوانے پگہ نا دے آسرات و آسودہ مرے……

سہب انا نماز آن پد کرم خان شار اکن لاری ٹی راہی مس۔ خلق انا بھاز متکن آ و ہندا اسٹ انگا لاری چار گھنٹہ نا سفر آن پد شار ءِ سر مس…… اسٹ تو دا کہ داڑے شار اٹ لاری تا غار و غیر شار انا دا بھلا بھلا ماڑیک اودے سفا حیران کریر…… ارٹمیکو اسہ بھلو تکلیفی اسے آن پد متا ماری خلسا کالج نا ہاسٹل آ سر مس۔

پین اسٹ آن مہراب نا ارّفسا او مہراب نا کمرہ غا سر مس۔ مہراب باوہ ءِ خنسا شرمندئی آن پارے ”باوہ نی امر داڑے بسس رسینگاس۔“ باوہ نیم پورو ءُ آڑسندہ اس تین تون چپ چپ کشا۔ ”امر کیو باوہ! ای و لمہ نا ہُران ہُران کہ اینو بریسہ پگہ بریسہ۔ ولے نی تو ننے سفا است آن دریس۔ سال ہنا کی ہلینگا ولے نی بتویس۔ و بیوس مسٹ تینٹ نے آ بسٹ۔ بس اللہ پاک کنے و نا لمہ ءِ نا دڑد ءِ نشان تف۔ لمہ نا دا پیسہ غاتے و دا لار تروک آ خوائے و ڈھکو تے نے کن راہی کرینے۔ و ہندا ہم پارت کرینے کہ مہراب جان نا تیدار آن کنا پن اٹ دروت اس ہم ہلیس۔“

مہراب تینا نا صالح ئی ءِ نشان ترسا باوہ ءِ پارے ”باوہ اسہ ہیت اس پاو نے، است اٹ کپیس۔“

”ندر مرے باوہ نے کن۔ پا کنا مڷو۔“

”باوہ داڑے ہاسٹل اٹ پیشن آن بروک آ بندغ ءِ اڈ کننگ نا مولک اف۔“

”ندر مسٹ نے کن باوہ۔ کاوہ ای داڑے اڈ کپرہ…… بس نا خاطر آن بسٹ۔ اللہ کنے نے آن مست کے……“

دم ہمو اسٹ ئس کہ مہراب نا چار سنگت اونا کمرہ غا بسر۔ مہراب شکی آ خن تتون تینا قبلہ ءِ ماما پارسا اودے موکل کرے۔ ولدا بس سنگت آتے حوال کرے۔ حوال آن پد سنگت آک ارفیر۔ ”مہراب یار! دا پیر انگا دیر اس ئس۔ امر بسوسس۔“

مہراب نا ہیت اونا سینہ ٹی تاب کنسا اونا گٹ اٹ نیمہ غا بارس۔

”یار دا پیر انگا ننا خلق انا واخب ءُ بندغ اس ئس۔ شار آ بسوسس۔ تو ننا اُرا غان ہنداڑتون کن کن گڑاس ٹیکی مون تسوسر۔ تو ہندا کماش ہمو ٹیکی تے کنے آ ایس سر کرے۔ ولدا پدا اشتافی ئس خلق آ ہنا۔“

داسہ مہراب لمہ نا دو انا ٹیکی ءِ سنگت آتتون ٹاکو خلسا نوشی جان کرے۔

اسہ سال اس گدرینگا۔ داسہ لمہ باوہ نا دعاک بھرم تسر۔ مہراب ہنداڑے شار اٹ ڈاکٹر مس۔ تینا زند اٹ خوش گل و بال ئس۔ داسہ تو لمہ باوہ اسُل اونا است آ ہم بتوسہ۔ خلق اٹ وخت آن مست تینے کماش و پیر کروک آ باوہ ناجوڑ مس۔ اونا ناجوری زیات مرسا ہنا۔ ولے مہراب ءِ دوشہ ہم کنتو۔ اسہ وار ہم باوہ غا پاش کتو۔ باوہ ارمان آن کلہو مون تس کہ اسہ وار برے سیر اٹ خنو تے۔ خلق انا اسہ تریل ءُ ورنا اس شار آ بس زور اٹ مہراب ءِ خلق آ ہرفے درے۔

مہراب داسہ ڈاکٹر ئس۔ ہر گام ءِ ناز اٹ ہرفیکہ۔ خلق آ سر مننگ تون لمہ تے ماہ گنج، کرم خان نا دڑد ءِ سینہ ٹی ڈکسا مار اکن ندر مرسا غور کروک آ بانگو ءِ اوڑکن تڑفے۔ باوہ نا حالیت و اونا درمان مہراب نا وس آن پیشن ئس۔ داسہ سلاہ ہندا مس کہ باوہ ءِ شار آ بھلو ڈاکٹر اسے آ دروئی ءِ …… کنا وس آن اونا ناجوڑی پیشن ءِ۔ سہب اتون خلق انا ہمو اسٹ انگا لاری اٹ مہراب باوہ ءِ شار آ ایس…… داڑے مہراب ءِ سنگت اس تے خنا حوال کرے تو مہراب حوال ترسا پارے ……کہ دا پیر انگا ننا ہمسائے ءِ۔ اولیاد اف بیچارہ ءِ۔ بس اللہ نا رضا کن ای اودے داڑے شار انا بھلا ڈاکٹر آ درمان کن ایسنٹ۔ دعا کر اللہ پاک دا بیوس ءِ دراخ جوڑ کے۔

اسٹ انگا مار انا دا پراگندہ غا ہیت آتے بنسا باوہ نا خن تیان اِرا باسن ءُ خڑینک تمار…… اوڑا است انا دورہ بس…… او دا جہان آن آخبت کن خن تے تر کرسا موکل کرے……

ہفتئی تلار

15-21 August 2020

تاک: 32

پنہ : 5