عظیم جان محمد شہی

براہوئی زبان نا پنی آ شاعر، شئیر جن، محمد عظیم، قلمی پن عظیم جان، 07 جنوری 1953ء نا دے ودی مس، اونا باوہ نا پن شفیع محمد، قبیلہ محمد شہی ءِ۔ و او کوئٹہ ٹی ہندی ءِ۔

عظیم جان تینا بنائی دینی و اسکول نا تعلیم ءِ تینا شار آن دوئی کرے و بلوچستان یونیورسٹی کوئٹہ غان ایم اے کرے۔ او اسہ علم بشخوک ءُ استاد اسے نا حیثیت اٹ تینا زمواری تے گچینی اٹ سر ترسا ریٹائر مس۔

عظیم جان ءِ چنکی آن براہوئی زبان و ادب، و شئیر پاننگ نا شوق ئسکہ۔ او اسہ ادیب قلم کار و استاد اسے آن بیدس اسہ گچین ءُ شئیر پاروک اس ہم ارے۔ اونا براہوئی زبان و ادب کن کروک آ خذمت آک لکھ ستا کڑزرہ۔ او شئیر پاننگ تون اوار اسہ ادیب و قلمکار اسے نا حیثیت اٹ براہوئی ادب کن ہرا کتاب آتے نوشتہ کرینے، اوفتیٹی ”کچاری“، ”قافلہ“ اوار اریر۔ اونا نوشت آتیٹی ادبی چاگڑد، ادبی شونداری، مہر و سیوت، رواداری ساڑی ءِ۔ اونا نوشتہ مروک آ کتاب آک براہوئی ادب نا پڑ آ بے مٹ ءُ مڈی اسے نا حیثیت تخرہ۔ اونا کتاب آتا خواننگ آن راجی شونداری، ادبی چاہنداری دوئی مرے۔

داکان بیدس عظیم جان اسہ شئیر پاروک اسے نا حیثیت اٹ براہوئی زبان نا پڑ آ بھلو پن اسے نا خواجہ ءِ۔ عظیم جان بھلو وخت اس اسکان ریڈیو پاکستان و ٹی وی آ براہوئی زبان اٹ تینا ہنین آ توار اٹ شئیر پارسا براہوئی زبان ءِ سدائی زندہ تخانے۔ او موسیقی نا مجلس آتا بادشاہ پاننگک، ہراتم کہ او اسٹیج آ بریک تو کل ساڑی بندغ آتا است ہنین مریک۔ اونا توار و پاروک آ گال آک بھلو مخلوق اسے تینا شیدائی جوڑ کرینو۔ او براہوئی زبان آن بیدس بلوچی، اردو، سندھی ٹی ہم شئیر پارینے۔ داکان بیدس او موسیقار نا وڑ اٹ ہم تینا زمواری تے گچینی اٹ سر تسنے، و کیہی شئیر تا موسیقار ءِ۔ او موسیقی نا استاد اسے نا حیثیت اٹ پاکستان و ملک آن پیشن ہم جوان ءُ پن اسے نا خواجہ ءِ۔

عظیم جان نا شخصیت اٹ مہر، رواداری، ایلمداری، ادب و ربیدہ تون مہر، انا ہم گچین ءُ جوزہ اس خننگک۔ اوڑتون تولوک آ بندغ ءِ گیشتری ادبی، ربیدگی و مہر رواداری نا ہم گچین ءُ چاہنداری اس دو بریک۔

او براہوئی ادب نا پنی آ ادارہ براہوئی ادبی سوسائٹی نا اسہ زیات خواری کروک ءُ باسک اسے۔ او گیشتری اڈ ہلوک آ دیوان و کچاری تیٹی بشخ ہم ہلسا کرینے۔

عظیم جان ورنا شاعر ادیب آتا است بڈی و ادبی چاگڑد نا سوگوی کن راہشون اسے نا کڑد ءِ ادا کرسا کرینے۔ اونا براہوئی زبان و ادب کن کروک کاریم تے کل امنا کیرہ۔

ہفتئی تلار
تاک: 27
23-17 جولائی 2021ء
پنہ: 03