آدینک تل کشک، ولے راست ءِ ڈکپک (2)۔

لٹ و پل اٹ ہر بندغ تینا ہنر اٹ قدیر خان، وزیر و مشیر آن ہلیس چنکا دز اسکان تینا شکار ءِ شکرا نا خن اٹ ہُرک۔ اسٹ نا بوٹ آک ہنداخہ متکن مسر، کہ کس دُپ اسے آن دتوکہ تا۔ بوٹ آتے پوسکن کننگ کتو۔ عئید آ تسمہ غاتے تا پوسکن کرے، مسیت آ نماز کن ہنا، بوٹ آتے پیشن اِلا۔ متکن ءُ دیر درو تا، نماز آن پیش تما، بوٹ آک تو تخوک ئسر، کس بوٹ آتا تسمہ غاتے دریسس۔

ننا تعلقداری ہمو قوم اتون ءِ ہرا سپرطاقت نا خن تیٹی مش شاغا، چل سال اسکان جیب تے تا کسٹم والا تیانبار پٹا، مذہب نا سرونز اٹ پنجا سال عرب آتے ناچ تس، وخت اس طالب نا کارخانہ ملا، وخت اس روشن خیالی نا کلف اٹ ہمو کارخانہ غاتے بند کرے، وخت اس پیسہ کن باہوٹ جوڑ کرے، وخت اس باہوٹ ءِ کٹیا ٹی بہا کرے، تسمہ نا دزی تو ہچ اس اف، اسل اٹ نن ہمو راج آتا بشخ اُن، ہرا آدینک اٹ خالی تینا مون ءِ ہُررہ۔

اینو ننا راج اٹ کبینی، لنگڑی نا دو آن شیفکو تپہ نا زندہ سلنگ کن ہر وڑ انا چنکو چنکو دزی المی مسنے۔ خڑچ آک ہر پارہ غان با ءِ شیڑ کننگ ءُ۔ ہر بندغ تینا خید اٹ بارسنے۔ ایمانداری نا پنت کرینگ اس جوڑ مسنے، انتئے کہ تینے ہشنگ کن دُنگ اس گازلیٹ نا وام اٹ دو بفک۔ تیلی ءِ لگفنگ کن باکس ہم پین اسٹ اسے آن خواہوئی تمک۔ سیر ءِ لنگڑ نا، سوار ءِ پیادہ نا سما اف۔ کس انا زند اٹ اونا زند اکن ازباب ودی کننگ اونا کٹ ءِ کوپہ تننگ و اونا قبر آ الحمد و قل ہواللہ خواننگ آن ہزار وار جوان ءِ کرپشن اٹ دزی کلچر اٹ غریب آتا ٹولیک وڑ وڑ اٹ تینا بڈ ءِ سبک کننگ کن رنگ رنگ انا راگ اٹ مخلوق نا جیب آن پیسہ کشنگ نا کوشست کیر۔

سال دوانزدہ تو شار اٹ چندی تندور تا خڑک آ زالبول آتا ٹولیک ہنوک بروک آتیان تینا لنگڑ آ چنا تے کن تندور آن بارن آ اِرغ نا خواست کیرہ، دا ہم پارہ کہ نن پخیر افن، نئے ننے پیسہ نا گرج ءِ۔ خالی چنا تا پڈ اکن ہلبو ایتبو۔ ہر نیاڑی نا بغل اٹ اسہ کٹور اسے، اِرغ مچ کرسا کٹور اٹ ڈکسا کیرہ۔شام اتون ہر نیاڑی ہندا اِرغ آتے ولدا تندور والاڑا نیم بہا اٹ بہا کیک، مکر و فریب اٹ ہر نیاڑی تینا دڑد ءِ تینا اداکاری ٹی خُلک، ولدا کل تا رکشہ سے ٹی تینا اُرا تیا سر ہلیرہ۔ سرکاری ادارہ غاتیانبار غریب آتا دزی نا تینا رنگ آک ءُ۔ ولے دا راج اٹ سفید پوشی چلینگپک، انتئے کہ اونا دوی گنگ ءِ، کس چپر اٹ گڑاس تس تے، ہلیک تے، نہ تو غیرت نا خل مدام اونا پڈ آ تفوک ءِ۔ دن ءُ بندغ اسے نا پڈ اٹ اسہ باخوس اس بٹنگ ہزار مسیت آتا جوڑ کننگ آن جوان ءِ۔

کرپشن نا دریاب اٹ ہرکس تینا وس انا کچ اٹ دو سلنگ ءِ۔ دا وہوک آ دیر آن کس انا جون بارن سلتنے، ہر اسٹ تینا ملاسی ءِ تینا ہشوک آ است ءِ ہندا دیر آن پدین کرینے، کس چنک اس، کس گلاس اس، کس اس بالٹین اٹی کاٹم آتینا شاغنگ ءِ۔ سرکار نا جند انا پالیسیک ہم سفتی افس۔ ہر پالیسی تے چوٹ ءِ۔ مزور تا جہانی دے یکم مئی نا دے مچ آ دنیا ٹی مزورکار آک شکاگو نا شہید آتا یات اٹ چھٹی ءُ، ولے داڑے اصلی آ مزورکار آک یکم مئی نا دے ہم دیہاڑی پٹرہ۔ کلنگ و بیل آتتون ہر چوک آ دے ٹاک آ بین و ملاسی ءِ جان آ سگرہ۔ سرکاری تنخواہ خور ملازم آک چھٹی ءُ۔ گڑاس تا ہمودے پکنک و گڑاس تا سڑک آتا نیام اٹ سہب آن نیم روچ اسکان کوک پاڑو کیرہ۔ لیڈر آک ریٹائر مسنو، ولے مرک اسکان سردار آتیانبار دستار نا خواجہ ءُ۔ مزورکار دے آ تو اوفتا عئید ءِ۔ انتئے کہ اوفک دے آن عثمانیہ ٹی شام آ سرینہ ہوٹل اٹ ’آئی ایل او‘ نا مہمانک ءُ۔ مزورکار آتا پن آ اوفتا سیمینار آک فائیو اسٹار ہوٹل آتیٹی مننگ ءُ۔ و سیمینار آتیا و مزورکار ڈے انا جلسہ غاتیا مزور لیڈر آک سی سی لکھ انا گاڈی تیٹی بریرہ۔

2020ء اٹ فیڈریشن نا صدر نا مار انا برام سرینہ ہوٹل نا رنگی آ فرش آ مس۔ ہراٹی ہزار بندغ آن زیات بشخ ہلکر۔ باور بف ہوٹل نا ریکارڈ آ اونا کمپیوٹر اٹ مدام نوشتہ ءُ۔ ہر مزور لیڈر نا تعلقداری، اونا بولی، قوم پرست پارٹی اسے تون ارے۔ کوٹلیہ تینا کتاب اِرتھ شاستر اٹ نوشتہ کیک، ”آسمان اٹ بال کروک آ چک آک حساب مریرہ، ولے سرکاری ملازم آتا لیڈر شپ نا نیت اسُل چاہنگپک، انتئے کہ اوفتے میری متبری نا دستار اوفتے خیسن نا تشت اٹ مفت دو بسنے۔ دن انگا متبری خالی سرکاری آ پوسکن آ سردار آتے دو بننگ کیک، ولے اوفتا کاٹم مدام گہو تخوک ءِ۔ نئے اوفک دستار نا ول آتے کاٹم آ پیچنگ کیرہ، ولے مزورکار لیڈر آتے دستار نا وَل وَل آن سما ءِ، او دستار نا ہر وَل اٹ اسہ مکر اس اِرا فریب ڈکرہ۔ تینا سیاہ کاری تے ڈکنگ کن وخت وخت اس پیر انگا مزورکار ءِ اسٹیج نا زی آ ویڈیو، فوٹو سیشن تون اوار کورونا نا راشن تروک آتیانبار گڑاس ایترہ، مسیت آتیٹی چندہ و مفت کفن تننگ نا بورڈ ہم بھاز جاگہ خلکنو۔

تینا سخاوت ءِ پنی کننگ کن اسٹ تا مدام تینا جلسہ غاتیٹی افلاطون، ارسطو و سقراط نا دا قول ءِ وار وار آ مزورکار آتے بنفک کہ سقراط زیار انا پیالہ ءِ تنگسا پارے ”کنا بت کہنگ ءِ، ولے سقراط مدام زندہ سلو ءِ۔“ دروغ و چرپ زبانی ٹی ہندا لیڈر آک مدام مزورکار آتا مون ءِ بے گوا کروک آتا مون انگا لوت اٹ ڈکرہ، انتئے کہ بھاز وخت ہندا لوت کنا کاٹم آ مسنے۔

اینو مست آن زیات جادوگر آتا جادوگر نا سیاسی تڈا غا غریبی جہالت، ناجوڑی، رشوت، کبینی، و وڈی خوری نا دت دے پاک غریب و مزورکار آتا ساہ ءِ ہلنگ ءِ۔ زند دے پہ دے خرین مننگ ءِ، ہچ سما تمپک کہ مظلوم آتا است آن خلیس ءِ دیر ایسر کرو ءِ، دیر اوفتے تغ آن بش کرو ءِ۔ کہ اوفک تینا حق اکن توار خلیر، دیچہ انتئے وخت اسے آن بے انصافی و وڈی خوری نا لٹ ءِ کاٹم آ سگنگ ءُ، ولے چُپ ءُ۔ بے روزگاری آن ورناک وخت آن مست پیر مننگ ءُ، لمہ غاک لنگڑی آن پنچ شش چنا تون اوار کور انگا دون تیٹی جپنگ ءُ۔ باوہ غاک جک جوڑ است ترخ مننگ ءُ، چناک گوازی نا چس آن نا پہہ ءُ۔ چنا تا پڈ ءِ ولفنگ کن پاک دامن انگا چندی نیاڑیک تینے ہڑی آ خرما تا باٹی تننگ ءُ۔ ولے ایلو پارہ غان کٹیا کروک آ سرکاری ادارہ غاتا بزرگ آک وڈی نا پیسہ ٹی ہر سال تینا چک و چوری تتون حج و عمرہ نا روحانی مڈی آن روحانیت نا چس ءِ ہلنگ ءُ۔ مون انگا پیسہ غاتے پیہن کننگ ءُ۔ گناہ تے ثواب اٹ بدل کننگ ءُ۔

بدکڑدار ءُ نیاڑی اس کل زند مون مونی ٹی بھلو مڈی اس مچ کریسس، نیم عمر مننگ آن کین ولنگار آن سلیس، توبے آنبار انگا مون تے آدینک آنبار تل کرے، زیبائی آن شوخی و مستی نا بلبل بال کرے، گناہ تا باریم دے پہ دے اودے دم کشتہ کریسس، نن نیمہ غا ضمیر نا پڑی بے توار خن تیان چٹاکہ، مڈی بے وارث ئس، گندہی تا لچخ آن تینے کشنگ کن فکر مند ئس، اخیر اسہ دے با پٹ ءُ ملا اسے آن ارفے، مولوی صاحب، کل زند ہر نن ای گناہ تا مین اٹ مسنٹ، پیسہ بے کچ کٹانٹ۔ اللہ نا مون آ شکی اُٹ۔ دعا کیوہ:

یا اللہ گناہ ای بے حد کرینٹ

جند آ تینا ورنائی آ ود کرینٹ

پوڑو ارے است کنا نا کرم تیا

اِلاٹ داسہ توبہ کیو بد کرینٹ

ای خواوہ ہندا کٹیا نا پیسہ غاتیٹی مسیت اس تفو، انت کنے ثواب ملک؟ ملا رنگی مزاج اس ئس، پارے تے۔ مائی گناہک ثواب آتتون، ثواب آک گناہ تتون جڑینگار، نی مفت اٹ کل زند تینے نہار آتیان چونڈفیس۔

دا بدکڑدار آ مائی آنبار وڈی ہلوک آ بندغ آک اخیر حج عمرہ مسیت تفنگ آ بریرہ، صدقہ جاریہ نا جو اٹ ریڑ کننگ خوارہ، گیشتر روچہ نا تو اٹ با ملنگ نا وخت آ روچہ توروک آتے کن مسیت آتیٹی تینا بیٹھک آتیٹی افطاری نا کندوری تالان کیرہ۔ دیہاڑی آ حافظ قرآن اس تینا بیٹھک یا مسٹمیکو ڈاکہ نا چھت آ تراویح کن خواہفرہ۔ ہرا کہ جتا جتا پیکیج آتیٹی تراویح ایترہ۔ کس دہ دے ٹی، کس پانزدہ، کس بیست و سَے دے اٹ قرآن ءِ صاحب نا فرمائش آ ختم کیک۔ تراویح آن شیرچا میوہ پیشٹری و پنی آ مٹھائی والا تا برفی نا دور، ہنینی نا خوشی تے تالان کیک۔ روچہ نا اخریکو عشرہ ٹی صاحب تینا گناہ تا سلنگ کن اعتکاف نا قلعہ ٹی روحانی ءُ دروشم اس کشک۔ عئید آ ہر ٹھیکیدار تینا بل آتا کشنگ کن صاحب نا مون آ ہُرسا پاہک، وا سبحان اللہ صاحب! اعتکاف اٹ اللہ پاک امر ءُ زیبا ءُ رنگ اس تسنے نے۔ لگک اللہ نا دعا تے کل ءِ قبول کرینے، بدکڑدار آ نیاڑی آنبار وڈی ہلوک آک تینا گناہ و ثواب آتا بارو اٹ مُلا غان سلاہ ہلپسہ، نئے ملا اوفتا گناہ تا بارو اٹ دبنگ ءُ ہیت کیک۔ بلکن اوفتا خڑک سیال آتتون اوفتا سخاوت نا گپ آتے علم عروض نا شاعری ٹی چرپ ءُ گٹ اسے تون بیان کیک، انتئے کہ مُلا جان نا جند انا پڈ گناہ تا ثواب اٹ زک انا خریش اٹ چرپ ءِ۔ ہرا راج اٹ مذہبی آ بندغ آک مذہب ءِ کٹیا نا کانڑ اس جوڑ کیرہ، تباہی و بربادی راج انا قسمت جوڑ مریک۔

ہفتئی تلار
تاک: 27
23-17 جولائی 2021ء
پنہ: 07