سیرت سرور کائناتؐ 13

پُچ اسے اٹ خن تے تینا دن خلؑیل ولدا تفے

وخت آ تکبیر نا نوا کہ اُست کنا دُن خوڑت مرے

دا عمل آ ہر ملائک بوچ مَش حیران ئس

انت مرو ءِ جٹ اسیٹی ہر َاسِٹ نالان ئس

لیٹفے تے مُون ءِ تِسک بیت انا کُنڈ آ خلؑیل

امتحان اٹ پاس کیس کہ نی اریس ربُ الجلیل

او پارے اللہ اکبر دوٹی کتار ءِ کرے

یا خدا نی صبر ایتِس بندہ بے وس حاجز ءِ

رب انا ولدا رحیمی جوش اٹی بس او زمان

حکم تِسّک جبراءؑیل ءِ نی مرک راہی روان

جنت آن خڑ اس گچین ءُ ہرف سر کہ اوڑے نی

چاخو نا با آن مار ءِ ہرف مُر کہ اوڑے نی

خن تا لگنگ آن مُست کہ جبرائیؑل حکم ءِ دا

قربانی کنا خلؑیل نا مس قبول کنا در آ

امتحان اٹ ابراؑہیم تو اسماعیؑل ہم پاس مس

او ذبیع اللہ لقب تو دُن نبی اس خاص مس

مس تکبیر تون چِپژہ کہ دتر نا بِنگ جوان

ای اریٹ راضی رب کہ نی مریسک مہربان

خسّا کتار ءِ اسہ کُنڈ پارے مسٹ کامیاب

دا دنیا تو ہچ اس افک انت اسے دا نا عذاب

اِناللہ پارے ولدا خن تے تینا او مَلَا

مس حیران اے تم آ او مار ءِ کہ زندہ خنا

شکر کشار مار و باوہ اللہ اکبر پارسا

تین پہ تین آ وا خڑ آ دُن او ہُرارہ مخسا

دُن خدا توم آ نبی تے امتحان آن گدریفے

اوفتے بخشا دون ءُ خِلعت رحمت اٹ دن بیرفے

رب اتون بندہ نا تینا نم خنارے یاری ءِ 

دا وڑ اٹ قربانی ہندا قیامت اسکا جاری ءِ

ہفتئی تلار

تاک: 36

19-25 September 2020

پنہ، 4