حیات نا شہادت و میڈیا نا منافقت

دنیا ٹی جنگ اس مرے یا دَین اس مرے، یا پین ہندن ءُ ویل اس کہ دنیا نا نسخان مرے، راج انا حکومت نا نیام اٹ جنگ و جھیڑہ مرے یا قدرتی آفت آک مریر، دافتا بارو اٹ راج اسکان معلومداری تے سر کننگ میڈیا نا زمواری مریک۔ دنیا نا ایلو راج آتیٹی تو میڈیا تینا کاریم ءِ ہم بھاز جوانی اٹ کیک۔ ولے ننا ملک انا الیکٹرانک میڈیا نا کڑدار کل انا مون آٹے۔

13 اگست 2020ء نا دے تربت اٹ حیات بلوچ نا شہادت نا واقعہ مس۔ حیات بلوچ کراچی یونیورسٹی نا طالب علم اس ئس۔ اینخو کورونا نا ناجوڑی نا سوب آن مچ آ پاکستان اٹ تعلیمی ادارہ غاک بند مسر۔ تو حیات بلوچ ہم یونیورسٹی نا چھٹی نا سوب آن تینا اُرا غا تربت آ بس۔ اُراٹی حیات بلوچ دے آن تینا باوہ تون اِلار نا باغ اٹی کاریم کریکہ، و ننکان تینا کتاب آتے خواناکہ۔ حیات تعلیم نا پڑ آ بھاز لائخ ئس۔ و تعلیم نا کر اٹ مون مستی ہنسا تینا لمہ باوہ نا محرومی تے چٹفنگ نا سوچاسس۔ اونا ارادہ غاک بھاز بڑزا ئسر۔ او تینا خلق اکن و تینا راج اکن گڑاس جوان کننگ نا سوچاسس۔ ولے شوم انگا بخت ءِ گڑاس پین منظور ئس۔ 

13 اگست نا دے حیات تینا باوہ تون باغ اٹی کاریم کریکہ۔ اوفتا باغ انا مون نا سڑک آ گدرینگوک آ واقعہ اس مسوسس۔ و ولدا حیات نا شہادت نا واقعہ پیش بس۔ ننے ہم دا واقعہ نا بارواٹ سوشل میڈیا نا سوب آن معلومداری مس۔ سینہ ٹی انسانی ہمدردی نا دڑد ءِ تخوک آ ہر بندغ مونجا ئس۔ سوشل میڈیا غا حیات نا شہادت نا خبر آک ہر پارہ غا تالان مسر۔ ولے ننا ملک انا الیکٹرانک میڈیا بلوچستان نا دا دڑد آن پر انگا خبر آن بے خبر ئس۔ پرنٹ میڈیا نا اردو اخبار تا خبر دا وڑ ئس کہ بلوچستان نا چندی علاقہ غاتیٹی بمب و تراک و سم کاری آن اسہ ورنا اس کزیت کرے۔ و شش بندغ ٹھپی مسر۔ دا ورنا نا شہادت ءِ الیکٹرانک میڈیا ہچ ءُ کوریج اس تتو۔

نن بحیثیت مسلمان کشمیر و فلسطین نا مسلمان تا زی آ مروک آ ظلم انا زی آ تو بھاز ہوغنہ۔ منہ وخت مست کشمیر اٹ اسہ چنا سے نا مون آ اونا پیرہ ءِ ہندوستانی فوج شہید کرے تو ننا الیکٹرانک میڈیا سہب شام ہندوستان نا فوج انا دا ظلم ءِ نشان تسکہ۔ فلسطین و کشمیر نا مسلمانک ہم ننا ایلم ءُ، اوفتا زی آ ظلم مریک تو ننا ہم است ہسون مریک۔ ولے ننا بلوچستان ءِ میڈیا ہچ ءُ کوریج اس تفک تو داڑان ہم ننا است ہسون مریک۔

داسہ منہ دے مست کراچی ٹی اسہ لیڈی ڈاکٹر اس خودکشی کرے تو الیکٹرانک میڈیا نا ہر چینل آ سہب و شام اونا بارو اٹ خبر آک ئسر، پولیس نا باست خواست نا ہر خبر اٹ ذکر مسکہ۔

داسہ نا موسم اٹ پاکستان نا گیشتری علاقہ غاتیٹی پر کرے۔ کراچی و سندھ انا بھاز انگا علاقہ غاتتون اوار بلوچستان نا چندی علاقہ غاک دا پر تیان بھسکاری نا گواچی مسر۔ بولان اٹ پول آک تمار۔ سڑک آتے دیر درے۔ شار تا شارک نوکاپ نا گواچی مسر۔ فصل آک بھس مسر۔ ساہدار تے دیر درے۔ ولے الیکٹرانک میڈیا چڑہ کراچی نا سڑک آتا دیر تے خناکہ پین ہچ خنتوکہ۔

کوئٹہ بلوچستان نا بھلا شار ءِ، وصوبائی دارالحکومت ہم ارے۔ داڑے پر کیک، بجلی دہ دوانزدہ گھنٹہ مفک۔ ولے داڑے تو میڈیا خاچانے۔ ہچ ءُ خبر اس نشر کپک۔ منہ دے مست بولان اٹ گیس انا پائپ لائن نوکاپ نا دیر انا گواچی مس۔ کوئٹہ شار اتون اوار مستونگ زیات، قلات، پشین نا شار تے ہم گیس انا فراوانی بند مس۔ و دا بند مننگ پنچ شش دے اسکان برجا ئس۔ ولے مجال ءِ کہ الیکٹرانک میڈیا دا خبر ءِ نشر کروسس۔ کراچی مرے یا پنجاب اوفتا تو اسہ چنکو ویل اسے نا خبر ہم بریکنگ نیوز جوڑ مریک۔ ولے الیکٹرانک میڈیا نا رویہ بلوچستان و بلوچستان نا مخلوق تون ماتنہ غاتیانبار ءِ۔ کوئٹہ کراچی نا سڑک مرے یا کوئٹہ جیکب آباد نا سڑک، ہندن کوئٹہ ژوب انا سڑک نا ہیت مرے ہم، دافتیا ہر ارٹمیکو دے آ شکست آک مریرہ، چندی خاہوت آک بھس مسنو۔ داڑے ہم میڈیا نا کڑدار نت اٹ بے انا کچ ہم اف۔ ہیت بنا کرے حیات بلوچ نا شہادت آن، و ہراڑسکان سر مس۔ دانا سوب دادے کہ است ہشنگک، ہرا وخت کہ نن تینا مخلوق و تینا راج اتون دا ظلم و بیدادی تے خننہ۔ 

حیات بلوچ بیرہ تربت نا حیات اَلو، بلکن او مچ آ بلوچستان نا حیات ئس۔ اسہ حیات نا واقعہ غا میڈیا نا چپی متنے، داکان مست چندی حیات آک ظلم و بیدادی تا گواچی مسنو۔ میڈیا نا اسہ چینل والاس تو بلوچستان نا ورنا تا ایرانی تیل ءِ گریزی کننگ ءِ خنک، ولے بلوچستان نا ورنا کہ ناحق سم تا گواچی مس، تو اوڑے ہندا صحافی ہرانگ ہنا؟ اونا باٹی منگ ءُ کہ چپ کرے۔

ہندا صحافی نا پروگرام ءِ سوشل میڈیا غا بلوچستان نا مخلوق بھاز پٹ و لعنت کرے۔ انتئے کہ نت تیان معذور اسہ ورنا اس تینا گاڈی ٹی تیل ڈوہنگ ءِ، تو ہمو پن نا صحافی ہمو معذور آ ورنا ءِ پارے کہ نے شرم بفک کہ نی تیل انا گریزی کیسہ۔ تو خواجہ! ہمو معذور آ ورنا اگہ تیل انا گریزی کپ تو مسیت اسے نا مون آ تولے پنڈنگ ءِ بنا کے۔ 

دا بے حس آ میڈیا ننا مخلوق ءِ تو بھاز زو اس شکی مننگ نا پاہک، ولے اونا جند اسُل شکی مفک کہ بے روزگار آ ورنا تے کن واکداری نا خواجہ غاتا مون ہیت اس کے۔ شرم تو واکداری نا خواجہ غاتے برے کہ اوفک دا ورنا تے کن ہچ کپسہ۔ بلکن داکان زیات شرم انا ہیت انت مرو ءِ کہ ننا صوبہ نا لوکل و ڈومیسائل آتیا پیشن نا مخلوق نوکری کیک۔

بلوچستان ہاؤس اسلام آباد اٹی افسر اس ڈیور و چپڑاسی اسکان گیشتری پنجاب والا تا ءِ۔ ننا مخلوق نا بشخ نُت اٹ بے انا کچ ہم اف۔ دا حالیت اٹ ننا ورناک بے روزگار ءُ تو اوفک ایرانی تیل انا کاروبار انتئے کپس۔ نوکری اوفتے اف، تیل انا کاروبار ءِ ہم بند کیرے تو اوفک دزی کیر؟ یا پنڈر؟

الیکٹرانک میڈیا بلوچستان نا مخلوق ءِ شیف خلنگ کن تو کل آن مونی ءِ، اوڑے تو او زو اس تینا توار ءِ بڑزا کیک، ولے ہرا وخت کہ بلوچستان تون زند انا ہر بشخ اٹ بیدادی مریک تو اوڑے الیکٹرانک میڈیا ءِ خل/ ہلیک۔

ہندا سوب آن تو بلوچستان نا مخلوق احساس محرومی تا گواچی ءِ، اوفتا است خراب ءِ کہ اوفتے کن کس توار چست کپک۔

اٹ گڑا کن ہوغون، بلوچستان نا وسیلہ غاک تو مچ آ ملک انا ءُ، ولے بلوچستان نا ویل آک بیرہ بلوچستان نا بشخ اٹی بسنو۔ بلوچستان چاہے اونا ڈکھ دڑد آک چار انتئے کہ ننے کس اف، ننا کس اف۔

ہفتئی تلار

تاک: 36

19-25 September 2020

پنہ، 6