زندان نا ڈائری (سال 1973ء) 9

پگہ غا دا برانزی ریلی سائنس کالج آن بناکرے۔ ہموزدے مست آنبار غٹ طالب علم تنظیم آک اوار ئسر۔ دا ریلی ہراتم جناح روڈ منان چوک آ سر مس، تو بلوچ اسٹوڈنٹس آرگنائزیشن نا راہشون حنیف بلوچ اسٹیج آ بس، و ریلی ٹی خلوک نعرہ و درو نا برانز اٹی منہ ترانکار نا بے ڈَول آ ہیت آتیا تینا گڑتی تیان جلوس اٹ ساڑی ایلو تنظیم آتا سرکڑدہ غاتے معلومدار کرے، اوکان پد قطب خان لہڑی ہرا کہ ”بلوچ ورنا“ نا سرکڑدہ ئس، اسٹیج آ بس، و نیپ حکومت آ بھاز دوبہ خلک۔ قطب خان نا تران نا وخت آ حنیف بلوچ دوارہ اسٹیج آ پاش کرے، و ترند توار اٹ ریلی ٹی ساڑی بی ایس او نا باسک آتے ریلی آن پیش تمنگ و اسہ کنڈ مننگ نا پارے۔ نن غٹ ہرا بی ایس او تون گنڈوک ئسن، ریلی آن پیش تمان و روڈ انا اسہ کنج اسے آ سلیسن۔ قطب خان لہڑی نا تران آن پد علی احمد کرد اسٹیج آ بس و کوک و پاڑو اٹ نیپ انا سرکڑدہ غاتیا دوبہ غاتا سم شلا۔

علی احمد کرد انا تران نا وخت آ کنا اِرا اِلہ عبدالحمید کُرد، محمد مراد کُرد، علی احمد کُرد انا اِلہ نا مار نادر عزیز کرد، حامد عزیز کرد اسٹیج آ بسر۔ اوفک قطب خان لہڑی و طالب علم راہشون تے پاریر کہ علی احمد کرد ننا خاہوت نا بندغ اسے، نن غٹ نیپ اٹی اُن، تو گڑا نن تینا بندغ ءِ دننگ اٹی اُن۔ دا پاننگ تون اوفک اسٹیج آ تران نا نیام اٹ علی احمد کرد ءِ خمب کریر، و اسٹیج آن پیشن دریر۔ علی احمد کرد انا نَت دُوک توروک ئسر، ولے با غان تے داسکان تران برجا ئس۔ ٹانگان ٹولی نا وخت آ ہم او نت دُو خلنگ ئس۔ ننا تینائیک علی احمد کرد ءِ مون پہ مون اسہ ملوک ءُ دکان اسے ٹی بند کریر، و دکان نا پیشن آن شٹر ءِ شیف چکار۔ بند انگا اسٹور اٹی ہم علی احمد کرد جوزہ غان پُر ئس، و تران ءِ برجا تخاسس۔

نیپ حکومت نا دے تیٹی علی احمد کرد نیپ آن مُر ئس۔ نیپ حکومت نا اینک مننگ آن پد او نیپ انا صوبائی دفتر آ ہنا، سردار عطاء اللہ مینگل و نواب خیر بخش مری تون اوڑدہی نا وخت آ تینا خذمت آتا سلہ خلسا بروک آ لائحہ عمل نا بابت سوج کرے، ہراتم اوفتا کنڈ آن علی احمد کرد ءِ صبر انا پاننگا تو علی احمد کرد بش مس و پارے، ”نم صبر کبو، ای چاو کنا کاریم چاہے۔ تنیا غان تنیا کنا وس اٹ انت اس کہ مننگ کرے کیوہ۔“

پگہ غا علی احمد کرد بلوچ اسٹوڈنٹس آرگنائزیشن نا راہشون تتون ملا۔ طالب علم تنظیم آتیا تالان طلباء ایکشن کمیٹی ٹہیفنگا، ہراٹی علی احمد کرد، عطاء اللہ محمد حسنی، امان اللہ شادیزئی، امان اللہ بازئی اوار ئسر۔

دا طلباء ایکشن کمیٹی نا اولیکو جلسہ 3 مارچ 1973ء نا دے پیشیم نا وخت آ جناح روڈ کوئٹہ نا منان چوک آ مس۔ جلسہ نا دے سہب اتون علی احمد کرد و امان اللہ بازئی بیرشت بدل کرسا رکشہ سے ٹی توسر، و اناؤنسمنٹ کرسا کریر۔ امان اللہ دستار اس تفیسس، و علی احمد کرد ٹوپ و خیری اس بیناسس۔ دُوٹی مائیکرو فون اس ہرفیسس جلسہ نا پڑو کرسا ہناکہ۔ و داڑتون اوار دا پاریکہ کہ دا جلسہ غان علی احمد کرد، امان اللہ شادیزئی و ایلو طالب علم راہشونک تران کیرہ۔و ہندن الس آن دا جلسہ ٹی بشخ ہلنگ نا خواست ہم کریکہ۔

جلسہ نا وخت آ منان چوک نا ایب کیب اٹ الس و طالب علم آتا اسہ بھلو کچ اس مچ مسوسس۔ کل علی احمد کرد و ایلو راہشون تا چاری ئسر۔ علی احمد کرد اسہ رکشہ سے ٹی منان چوک آ بس۔ علی احمد کرد ءِ خننگ تون طالب علم آتا و الس نا بھلو کچ اس اوفتے کوپہ غاتیا ہرفے و منان چوک نا چجہ غا ایس۔ ہندا وخت آ ایلو راہشونک ہم منان چوک آ سر مسر۔ ہندا دے تیٹی عراقی سلہہ غاتا سیل ءِ کرفنگ کن سلہہ تے ٹرین اٹ تخسا چندی اسٹیشن آتیا الس ءِ نشان تننگ نا بنا پنڈی آن کننگا۔ سہب اتون مہالو ریڈیو پاکستان آن ملی ترانہ ”جاگ رہا ہے پاکستان“ نشر کننگاکہ، ایلو طالب علم راہشون تا تران آن پد علی احمد کرد تینا تران نا بناءِ عراقی سلہہ غاتا ہلنگ انگ ءِ راگ پارسا کرے، او بھاز جوزہ ٹی سرہ ءِ سرفسا مون آ تموک آ پژہ غاتے ہور تا کمک اٹ اینک کرسا و حکمران آتے ہور انا اشارہ اٹ ہکل ترسا سفا انگا لوز آتیٹی پاریکہ کہ حکومت نا دا شیفکو کہولی گام آن بیداد و آمرانہ پالیسی تا سوب آن ”سما کپننگ ءِ بلکن دُو آن ہننگ ءِ پاکستان“ جلسہ بھاز سرسہب مس۔ جلسہ نا ایسری آ نیشنل عوامی پارٹی نا اسہ سینئر ورکر اس، ملنگ لانگو علی احمد کرد ءِ کوپہ غاتیا ہرفے۔ ورکر آک پبی نعرہ خلکر۔ علی احمد کرد زندہ باد نا نعرہ غاک آسمان ءِ کاٹم آ ہرفیر۔

دا سرسہب جلسہ غان علی احمد کرد نا است بھلن مس۔ دا جلسہ غان پد 7 مارچ 1973ء نا دے طلباء ایکشن کمیٹی نا کنڈ آن اسہ پین جلسہ اس مس۔ 13 مارچ نا دے منان چوک آ اسہ جلسہ اس مروئی ئس، ہرا ”بلوچ ورنا“ نا کنڈ آن جلسہ نا مچی آ سم کاری نا سوب آن جنگ اسے نا دروشم ءِ دوئی کرے۔

دا دور بھاز سخت آزمائش آن پُر ءُ دور اس ئسکہ۔ ہنداکان اسلم کرد اسہ ایجیٹیٹر کے نا وڑ اٹ مون آ بس۔ وار اس مستونگ، وار اس مچھ و وار اس سبی ٹی برانز نا پروگرام شین ترسا کریکہ۔ عبدالقیوم ساسولی، خورشید جمالدینی، حمید شاہوانی و محمد عمر مینگل مدام اسلم کرد اتون اوار مسرہ۔ دا ننا اُرا غا بسرہ، انت اس کہ اُرا ٹی تیار مسکہ، کل کنگرہ۔ اگہ ہچ اس متوکہ تو آئی پٹاٹہ و خواہے بسیکہ تسکہ۔ اسلم نا دا سنگت آک اگہ وخت اس ہچ اس مفروسس تو چا اٹ اِرغ کنگرہ۔ ہندا دے تا ہیت اسے، کہ 13 مارچ 1973ء نا دے بلوچ اسٹوڈنٹس آرگنائزیشن نا ریلی ہرانا کماشی ءِ بی ایس او نا سیکرٹری جنرل مجید بلوچ و بی ایس او نا راہشون اسلم کرد کریرہ، جناح روڈ منان چوک آ اسٹوڈنٹس ایکشن کمیٹی نا کنڈ آن جلسہ ٹی بشخ ہلنگ کن ہراتم جناح روڈ آ سر مسر تو مہالو آن تاک اٹ تولوک ”بلوچ ورنا“ نا سالار میر قطب خان لہڑی و اوڑتون اوار سلہہ بند بندغ آک جناح روڈ نا دیکی کنڈ آن اسہ لشکر اسے آنبار پاش کریر، جناح روڈ نا فردوسی ہوٹل نا ہند آ جلوس نا کماشی کروک آ میر قطب خان لہڑی پشٹول ءِ کشا و بڑزائی سم کاری کرے۔ ہرانا ورندی ٹی ننا کنڈ آن ڈوکاری کننگا۔ قطب خان لہڑی و اونا منہ سنگت جناح روڈ نا کپڑا مارکیٹ والا گیٹ آن پترینگار، و مارکیٹ نا قندھاری بازار والا گیٹ ءِ ہم کلف کریر، و ”بلوچ ورنا“ نا اسہ اِرا سلہہ بند باسک ناؤچہ کریر۔ جناح روڈ والا گیٹ آن بڑزائی سم کاری برجا ئس، وخت اس کہ قندھاری بازار والا گیٹ انا مون آن مون پہ مون سم کاری مسکہ۔ ننا کنڈ آن روڈ انا خل تے ہرفسا ڈوکاری برجا ئس۔ دا سلہہ بند جھیڑہ مرغن مس، کنا اِلہ عبدالمجید کرد جناح روڈ آن سائیکل آ تینا اُرا شالدرہ غان پشٹول اس ہرفے و پدی جناح روڈ آ سر مس، و قندھاری بازار والا گیٹ انا کنڈ آن ناؤچہ کرسا ورندی ٹی سم کاری نا بناءِ کرے۔ ہراڑان قطب خان لہڑی اسک تینے پد توریر، ولے ہرانگ ہنوسس، ہڑتوم آ گیٹ آک بند ئسر۔ و پیشن آ بی ایس او، نیپ و ایلو طالب علم تنظیم آتا ورکر آک ڈوکاری کریرہ۔ سم کاری نا بنا ٹی چاکر خان لہڑی، جہانگیر لہڑی، سونا خان لہڑی و علمدار لہڑی ہرافتا تعلقداری نیپ آن ئس، قندھاری بازار و چوک نا دیکی ماڑی تیا لگسا ناؤچہ کریسر، و ورندی ٹی سم کاری کریرہ۔ فتح خان مارکیٹ نا مالک حاجی شفو بنا ٹی منہ سم اس خلک، چاکر لہڑی پارٹی ءِ مون پہ مون نا ماڑی آ ناؤچہ ٹی خنا تو سم کاری ءِ بس کرے۔

ہفتئی تلار

تاک: 36

19-25 September 2020

پنہ، 3