کورونا نا دیک ءُ، نن اُن، سنگت آک ءُ

قوم و نسل آتیا قدرتی آ آفت آک یا دنیاوی خواریک امتحان اسے نا وڑ اٹ بریرہ۔ ہراٹی بھسکاری بندغ نا مقدر جوڑ مریک، ولے ”تدبیر کُند بندہ، تعبیر کند مولا“ نا وڑ اٹ امتحان آتیان پیش تمنگ، نسخان آتے کم آن کم کننگ کن اللہ تعالیٰ بندغ ءِ عقل انا بھلو ٹیکی اس تسنے، ہرا عقل آن کاریم ہلک، او بھلا مصیبت ءِ پش اس کرے، و ہرا عقل و مڈول ءِ کاریم اٹی اتتو او پش ءِ گنج کرے۔ اینو نن علم و معلومداری نا دنیا ٹی گام تخانن، ہرکس علم و معلومداری نا نف و نسخان آتے پہہ مس، ہمو تین کن دن انگا حالیت آتے ٹی جوان ءُ کسر اس پٹا۔ علم و معلومداری لس بندغ نا کاریم اف، دا کاریم عالم، ادیب و خوانندہ غا بندغ نا کاریم ءِ۔ ننے دا ہُروئی ءِ کہ ننا عالم ادیب دا وخت آ تینا زمواری تے اخہ در پورو کننگ اٹی ءِ۔ دا وخت لس گپ و تران نا اف۔ دا وخت بیرہ کورونا وائرس ءِ پہہ مننگ، تینا ہنین و گچین آ قوم انا باتی تا سلامتی ءِ سوگو تخنگ نا ءِ۔ دا ویل آن پیش تمنگ و پیش تمنگ آن گڈ اسیکا پدا زند انا زیبائی ءِ دوئی کننگ نا ءِ۔ ہرافک دا وخت ءِ خلیس اٹ گدریفیر، ہمو نسخان ہرفیر۔ ہرا دا وخت ءِ ملنڈ اٹ گدریفیر، اوفک تینا علم انا نزوری ءِ پاش کریر۔ ہرافک بیرہ تینا زند انا غم ءِ کنگر، اوفک تینے مدام تنیا کریر۔ کورونا ننے اینو دا سبخ تننگ اٹی ءِ کہ اگہ نن فطرت تون ہندن بیداد کرین، فطرت مستی ننے آن داڑان بھلو امتحان ہلو ءِ۔ اسہ پارہ غان کورونا ءِ ایلو پارہ غان ملخ آک ءُ، مسٹمیکو پارہ غان سیاسی و قبائلی جھیڑہ غاک۔ دافتیان پیش تمنگ کن مون آ ہمو کمبوتی تیان کاریم ہلوئی اف، ہراٹی ننے اسیکا پدا بھلو نسخان خنوئی تمے۔ تینا علم ءِ سوگو کروئی ءِ۔ تین کن راہشون ودی کروئی ءِ یا ودی مروک آتے پہہ مروئی ءِ، اینو دا حالیت آتیٹی لنگڑی نا سوب آ ٹک خلوئی ءِ۔ بے سیوتی نا غم ءِ کنوئی ءِ۔ حکومت نا نزوری آ خن پٹوئی ءِ، عالم و ادیب نا زمواری تیان دُو تے کشنگ نا سوب ءِ معلوم کروئی ءِ۔ گدرینگوک آ قوم آتا بے نشان مننگ، تاریخ اٹی یات مفننگ، یا گڑا زیات آن زیات نسخان ہرفنگ نا آمخی تیان تینے واخب کروئی ءِ۔ ایمان نا نزوری ہرادے انگریزی ٹی ”ول پاور“ پارہ، اونا نن تون سنگت مفننگ نا نزوری تیان تینے واخب کروئی ءِ، وخت گدرینگک اسہ جاگہ غا سلپک۔ بروک آ نسل اینو نا تاریخ ءِ یات کرو ءِ، خوانو ءِ، اونا کِسہ غاتے بنو ءِ۔ اگہ اینو ننے آن ہر اسٹ تینا زمواری تے پہہ مس، اوفتیا عمل کرے، بروک آ نسل آن شاباسی خنو ءِ، نہ تو بروک آ نسل ننے بشخپرو ءِ۔ اینو نا نوشتہ مروک آ نوشت آتے، گپ و تران آتے خوانو ءِ، بنو ءِ، ننا لائخی و کمبوتی تا اندزہ ءِ خلو ءِ۔ بایدے نن اینو ہندن ءُ نوشت مون آ اتین، ہراننا ڈکھ و ویل آتے پاش کننگ تون اوار ننا لائخی تے ہم پاش کے۔ اینو ہندن ءُ گپ و تران کین، ہراڑان ننا انسان دوستی بے مٹ مرے۔ دا وخت انا زیان و خلیس نن کن ڈری اس جوڑ مرو ءِ۔ اومیت ءِ راہشون و قلم نا خواجہ غاک منبر آتیا تولوک آک، نئے بیرہ کورونا نا مقابلہ ءِ جوان وڑ اٹ کرور، بلکن کورونا غان گڈ انا زند اکن بروک آ نسل انا تربیت ءِ آسان و آسرات جوڑ کرور۔

ہفتئی تلار

20-27 June 2020

تاک، 24

پنہ : 01