مچ آ ملک اٹ تعلیمی ادارہ غاتے یکم ستمبر آن ملنگ نا فیصلہ غا امنا

اسلام آباد(آن لائن)بین الصوبائی تعلیمی وزراءکانفرنس اٹ کورونا وائرس نا سوب آن مچ آ ملک انا تعلیمی ادارہ غاتے 2 تُو پین ملپننگ نا فیصلہ کننگانے۔ کورونا آن کہنگ نا کچ‘جہانی کمکی ادارہ غاتا رپورٹ نا روشنائی ٹی ستمبر اٹ تعلیمی نظام ءِ بحال کننگ کن پک انگا فیصلہ این سی او سی نا دیوان کننگک۔ حوال نا رداٹ بین الصوبائی تعلیمی وزراءکانفرنس نا دیوان بنجائی وزیر تعلیم شفقت محمود نا کماشی ٹی اسلام آباد اٹ اڈ تننگا۔ دیوان اٹ کل صوبائی وزیرک ویڈیو لنک نا کمک اٹ بشخ ہلکر۔ دیوان اٹ کورونا نا ساڑی حالیت اٹ تعلیمی سلسلہ نا بحالی کن سلاہ تے مون آ تخانو۔ مروک آ دیوان اٹ ساڑی حالیت آتیٹی 2 تُو پین تعلیمی ادارہ غاتے ملپننگ نا فیصلہ کننگانے۔ حوال نا رداٹ دیوان نا بشخندار آتا ہندا سلاہ ئس کہ چُنکا عئید آ بے پامی نا سوب آن مالو آن کورونا بھلو کچ اسسکان تالان مسنے، وخت اس کہ ہندا تُو اٹ بھلا عئید او ایلو تُو اٹ محرم بریک ہراٹی دود آتے ادا کروئی تمک، دا حالیت آتیٹی مچٹ ءُ بے پامی اسے آن بھلو نسخان مون آ بریک۔ بنجائی وزیر تعلیم شفقت محمود او وخت آ پارے کہ آئی پی ای ایم سی تینا ایلو اِرا دیوان تیٹی کورونا نا اثر تا تازہ انگا کچ آ سجفک، ہرادے مون آ تخسا تینا رپورٹ ءِ این سی او سی غا راہی کیک۔ ہرا تعلیمی ادارہ غاتے ملنگ یا ملپننگ نا بابت پک انگا فیصلہ ءِ کیک۔ حوال نا رداٹ دیوان اٹ بنائی وڑاٹ پین اِرا 2 تُو تعلیمی درسگاہ تے ملپننگ نا اواری ٹی فیصلہ کننگا۔ حوال نا رداٹ دیوان اٹ پاننگا کہ 22 اگست آ دیوان ءِ بٹنگسا حالیت آتا جاچ ءِ ہلنگک۔ محکمہ جانجوڑی و ایلو ادارہ غاتیان کورونا وائرس آ بریفنگ ہلنگک۔ حالیت آتا جوانی آن پد یکم ستمبر آن تعلیمی ادارہ غاک ملنگرہ او اگہ حالیت آک پین خراب مسر تو تعلیمی ادارہ غاک مستی ہم بند مریرہ۔ دیوان اٹ بشخ ہلوک آ وزیر تعلیم سندھ سعید غنی پرائیویٹ اسکول آتے بیدس سود آن قرض تننگ نا خواست کرے او پارے کہ پرائیویٹ آ اسکول آک بھاز مالی کاختی نا گواچی ءُ، پرائیویٹ آ اسکول آتے حکومتی سپورٹ رسینگ انگ ایہن ہم تو چُناتے فائدہ رسینگک، اسٹیٹ بینک دا قرض آ سود ہلنگ خواہک تو سود بنجائی حکومت ادا کے۔