مادیت نا مارکسی آ فلسفہ۔۔۔

خیال پرست آتا خڑک آ دنیا ٹی اسہ آفاقی و اُلوہی روح یا عقل کل کاریم کیرہ۔ دافتا سوب آن دنیا وجود اٹی بس و ہمو فطرت برجا ءِ۔

داڑان چَپ مارکس انا خُڑک آ دنیا حقیقت اٹی مادی ءِ۔ دنیا ٹی مروک آ چندی شکست و واقعہ غاک متحرک مادہ نا جتا اِنگا حالیت آک ءُ۔ شکست و واقعہ غاک اسہ ایلو آ اثر شاغرہ۔ اَسہ ایلو تون اوار ءُ۔ہندا اوفتا ردوم ناجدلی اصول آک ءُ۔ دنیا نا ردوم مادہ نا حرکت آتا کانود نا ڈَول مریک۔ دا ردوم کن ہِچّ ءُ آفاقی ہروہ یا دیوتا سے نا مننِگ نا گرج اَف۔ مُتکُن انگا یونان نا فلسفی ہرکلیتس ہم مادیت نا فلسفہ ءِ اونا اولیکو دروشم اٹی مون آ ایسنے۔ اونا پاننگ نا رد اٹ دنیا سَٹی ءُ اَسہ گڑا سے، اوٹی کل اوار ءُ۔ دادے کس جوڑ کتنے، دا اسہ زندہ ءُ چڑینک اسے، و درسر اسے آن ارے۔ دا مدام برجا سلک، ہشنگسا کاہک، و پدی جوڑ مرسا کاہک۔

مادی فلسفہ نا دا اصول بیرہ فطرت نا ردوم نا اَف بلکن انسانی راج انا ردوم نا سرپد مننگ اٹی ننا کمک ءِ کیک۔

دا فلسفہ نا کُمک اٹ تاریخی ردوم نا بابت اسہ ٹِک اسے آ سجفنگ کینہ ہرانا رد اٹ تاریخی واقعہ غاک بھلا بھلا تاریخی آ بدلیک راج انا ردوم نا اصول کانود نا ڈَول مریرہ۔ دا فلسفہ مزورکار تا انقلابی آ پارٹی ءِ پہہ کننگ اٹ کمک کرے کہ راج اٹی انقلاب یا بدلی بھلو بندغ، عظیم ءُ شخصیت اسے نا، یا بھلو فکر و کس اَنا فکری اخلاقی نظام ءِ انسانی راج آ شاغنگ نا کوشست مفَک۔ بھلا بندغ یا کس انا اخلاقی نظام نا مون آ بننگ مادی چاگڑد نا پد مریک۔ ہندن جوان انگا انقلابی آ سیاست دا مادی آ چاگڑد اٹی ردوم نا کانود ءِ دریافت کننگ و دا کانود نا ڈَول عمل کننگ آن سرسہب مننگ کیک۔ دن کہ بھاز آ بندغ آک پارہ سرمایہ دار آک تینا جوفہ و خودبینی ءِ بس کیر تو اوفتیٹی اخلاق نا بڑزی ودی مریک، و اوفک انسان نا دڑد ءِ تینا است اٹ ودی کیر تو مزورکار و سرمایہ دار تا جھیڑہ کُٹّک۔ مزورکار تا انقلابی آ جماعت سرمایہ داری نظام نا ردوم و اونا کانود و اونا مادی بنداو آتا علم ءِ ہیل کننِگ آن گُڈ دا نتیجہ غا سر مسنو کہ سرمایہ داری نا نظام نا بنداو آک مزورکار نا کاریم نا طاقت آن چلینگرہ، ہندن سرمایہ دار کن اخلاق نا اصول تا ہیل تننگ ہندن ءِ دن کہ خاخر آن دا اومیت ءِ تخنگے کہ او ہشپ۔ ہندن مزورکار جماعت سرمایہ داری ءِ راہ راست آن غلط پہہ مریک۔ و سرمایہ داری نا نظام ءِ ماس آن چٹفنگے حقی و عملی سیاست پاہک۔

ہفتئی تلار

تاک: 28

18-24 July 2020

پنہ: 02