گوادر نا شونداری نا عمل اٹ ہندی آبادی نا فائدہ غاتے اہمیت تننگ انگ ءِ‘چیف سیکرٹری
گوادر (خ ن) چیف سیکرٹری بلوچستان کیپٹن (ر) فضیل اصغر پارینے کہ بلوچستان خاص وڑ اٹ کرکی علاقہ نا گوادر نا الس نئے بیرہ محب وطن ءِ بلکہ او شونداری نا پوسکن آ مرحلہ ٹی حکومت تون پبی وڑاٹ کمک کننگ اٹی ءُ۔ دا خیال آتا درشانی ءِ او ماہی گیر تا اسہ نمائندہ ڈل اسے تون ہیت وگپ کرسا کرے۔ اوپارے کہ ماہی گیری نا صنعت ءِ شونداری تننگ و ماہی گیر تا آسودہی کن ساڑی حکومت چندی ڈٹ آتیا عملدرآمد کننگ اٹی ءِ دا ڈٹ آتا پورو مننگ آن ماہی گیری نا بشخ انا شونداری تون اوارماہی گیر تپّہ نا زند اٹ گچینی بریک۔ اوپارے کہ گوادر نا شونداری نا عمل اٹ ہندی آبادی نا فائدہ غاتے اہمیت تننگ انگ ءِ۔ او شاری تیا زور شاغا کہ او امن و شونداری کن کروک گام گیج آتے ٹی کمک کیر و زموار شاری مننگ نا کڑد ادا کیر۔