۔”مزل“، اسہ جاچ اس(1)۔

قلات دامان اسہ پربھرم ءُ ڈغار اسے۔ دا گلزمین نصیر خان نوری، بہادر دلیر آ مجاہد، غازی تا ڈغار ءِ۔ دا گلزمین شہید آ ”خان میر مہراب خان“ نا ڈغار ءِ۔ دا گلزمین نا مش چندی آ دلیر، مجاہد، غازی، شہید آتے ودی کرینے۔ ہر ہمو بندغ ہرا قلات نا مش آن ودی ءِ، قلات تون مہر تخک، دا ہمو کل انا ڈغار ءِ۔ ہندن دا ڈغار نا پربھرم آ مِش آن ودی مروک آ دا گلزمین تون مہر تخوک آ، دا گلزمین نا ہر بے وس، مفلس، شپاد ءِ تینا تکوک آ، خواجہ غاتیٹی اسہ خواجہ اس ”یوسف عجب“ ءِ۔ یوسف عجب تینا لمہ وطن، ڈغار، ڈغار نا باتی تتون مہر تخوک ءُ، اوفتا غم ءِ کنوک ءُ، اوفتا دڑد ءِ است اٹی تخوک ءُ خواجہ اسے۔ بیرہ یوسف عجب، آخا دا ہر بندغ نا زمواری ءِ کہ او ہرا مش آن، ہرا ڈغار آن، ہرا وطن اٹی ودی مریک، او تینا مش، ڈغار وطن تون مہر تخک، و تخے۔ انتئے کہ وطن لمہ ءِ، و لمہ تون مہر تخنگ ہر اولیاد آ فرض ءِ۔

”مزل“ یوسف عجب نا شاعری نا کتاب ءِ۔ دا کتاب نا ٹائٹل آ پیہن آ روشنائی اٹ ”مزل“ لکھوک ءِ۔ آسمان خننگک، آسمان آ جمر مچے بھاز ءِ۔ یانزدہ بھلو چک پرواز اٹی خننگرہ۔ و ڈغار آ دیر تالان ءِ۔ اسہ خزم اس ہرا مون خننگک، و دیر اٹی اونا عکس ہم ارے۔ دا خزم ہلمہ ٹی ءِ۔ درک ترسا رم کننگ ءِ۔ داڑان دا پاش مریک کہ شکاری اس خزم انا پد اٹ تمانے۔ خزم اوڑان تینا جان ءِ بچفسا نرنگ اٹی ءِ۔ و دا کتاب نا شیف آن پیہن ءُ پٹی اسے، ہراڑا نیلی روشنائی اٹ یوسف عجب لکھوک ءِ۔ دا ٹائٹل نا کاغد سخت ءُ ڈٹخہ اسے۔

کتاب نا ڈٹخہ ءِ مل، بڑزا کر تو اول اٹی پیہن رنگ انا کاغد اسے، ہراڑا خواجہ لکھانے ”محترم سکندر سالک زہری کن، مزل نا ٹیکی اس۔“ و شیف آن تینا دستخط ءِ کرینے۔ ہمودے انا تاریخ ءِ، یعنی 20/11/21 لکھانے۔ دا کتاب نا کل پنہ غاک یک سد و بیست و ہشت ءُ، ہرافتا رنگ شیرچائی ءِ۔ بھاز سبک ءُ پنہ ءُ۔ اولیکو اِرا پنہ ہورک ءُ۔ مسٹمیکو پنہ غا مون انگا روشنائی اٹ زی آن ”مزل“ لکھوک ءِ۔ نیام اٹی تے ”یوسف عجب“ و شیف آن ”آماچ ادبی دیوان (رجسٹرڈ) مستونگ بلوچستان“ لکھوک ءِ۔ انتئے کہ یوسف عجب نا دا کتاب ”مزل“ ءِ ”آماچ ادبی دیوان (رجسٹرڈ) مستونگ بلوچستان“ شینک کرینے۔

چارمیکو پنہ غا کتاب نا حق آتا بابت سرجم حوال تروک ءِ۔

پنچمیکو پنہ غا پنافی ءِ، و کتاب ءِ یوسف عجب تینا استاد آتا پن آ کرینے۔

ششمیکو پنہ غا ”یوسف عجب پوسکن آ چین انا مہکش“ نا سرحال اٹ غمخوار حیات نا خیال آک درشان ءُ، او نوشتہ کیک کہ ”ننا اینو نا شاعر نئے بیرہ تینا راج بلکہ ایلو راج آتتون فکری پڑ آ ہم گرنچ سفر کننگ ءِ۔ و یوسف عجب ہم دادور باری نا ہمو نوشتکار آتیان اسٹ ءِ۔ ہرا اسہ جوان ءُ مطالعہ اسے نا خواجہ ءِ۔ اونا فکر اٹ روشن خیالی، ترقی پسندی، جدت پسندی، انقلاب پسندی نا برانز آک شینک مروک گروشک ایترہ۔“

ہفتئی تلار

تاک:04

28-22 جنوری 2022ء

پنہ: 02