۔”دا ریڈیو پاکستان کوئٹہ ءِ“۔

ہندن کہ مخلوق نا مشغولیک و گرج انا گڑاک وخت اتون اوار اوار بدل مرسا کننگ اٹی ءُ۔ دا حالیت اٹی اگہ نن ڈاک، ٹیلفون، ریڈیو یا ایلو گرج آتا ہیت ءِ کین تو ہندن کہ دافک وخت اسیٹی بھلو کاریمی ءُ بشخ و ادارہ ئسر، اینو ہم دافتا اہمیت کم متنے، بلکن مچے بدلی تون دافتا گرج و اہمیت اینو نا وخت اٹی پین زیات مسنے۔

”دا ریڈیو پاکستان کوئٹہ ءِ“ یا ”ریڈیو پاکستان کوئٹہ نا توار“ دا لوز آتے ننے آن بھاز آک بھلو وخت اسے آن بنسا کننگ اٹی ءُ۔ اسہ وخت اس کہ ریڈیو پاکستان کوئٹہ غان خلقی آ شرفدار آتے کن شینک مروک آ پروگرام ”خلقی کچاری“ کہ ہرادے ایماندار غلام نبی راہی پیش کریکہ۔ دا پروگرام اٹی غلام نبی راہی تینٹ ٹکری شاہ بیگ و مہ جبین مینگل ”شینلو“ نا کڑدار ءِ کریکہ۔ دا پروگرام نئے بیرہ خلق بلکہ شار تیٹی ہم بھاز بننگاکہ و مخلوق ءِ دوست بسکہ۔ دا پروگرام اٹی ہراڑے خلقی آ بنوک آتے کن کشاری معلومداری، پامدار آتا انٹرویو و ایلو سرحال آتیا نئے بیرہ ہیت و گپ مسکہ، بلکن بنوک آتا اُست خواہی نا رد اٹ شعر و باگل و خلقی آ خبرک ہم اوار مسرہ۔

خلقی کچاری تون اوار بیست و چار کلاک اٹی کم و وَد پنچ کلاک براہوئی نا پروگرام آک مسرہ، ہرافتا رد دن ئس، سہب اتون 7:15 بجہ غا ”دے ٹک“ 10:5 منٹ آ ”بلسم“ 12:05 منٹ آ ”زمبار“ 4:05 منٹ آ ”خلقی کچاری“ و ننکان 8:15 منٹ آ ”دیوان“ پروگرام مسکہ۔ دا پروگرام آتیٹی ”دے ٹک“، ”خلقی کچاری“ و ”دیوان“ کمپیئرنگ پروگرام ئسرہ۔ کمپیئرنگ پروگرام اٹی شونکار نئے بیرہ جتا جتا سرحال آتیا ہیت و گپ کیک بلکن چٹھی تا ورندی و فرمائشی شئیر و باگل چلیفک۔ وخت اس کہ ”بلسم“ و ”زمبار“ اناؤنسمنٹ پروگرام ئسرہ۔ اناؤنسمنٹ پروگرام اٹی شونکار بیرہ شئیر و باگل بنفک و شئیر پاروک و شاعر نا پن ءِ ہلیک۔ داکان بیدس او منہ جوان ءُ ہیت یا زرتول ءُ ہیت کرو، داکان زیات اودے تینے آن ہیت و گپ یا تینا خیال ءِ پیش کننگ نا موکل مفک۔

دا پنچ پروگرام اٹی دے انا 12:30، دیگر نا 4:30 بجہ و ننکان 8:30 بجہ غا قومی و جئی آ خبرک پیش مسرہ۔ ہندن یک شنبے نا دے ”چنا تا مجلس“، ”نیاڑی گل“ ہم پیش مسرہ، ہراکہ ہفتہ وار نیم کلاک نا پروگرام ئسرہ۔ داکان بیدس ”ورنا گل“ نا پن اٹ ہم ورنا تے کن نیم کلاک نا پروگرام اس پیش مسکہ۔ داکان بیدس ہفتہ وار کمپیئرنگ پروگرام ”داکان ایکان“ ہم پیش مسکہ، دا پروگرام آتے کروک آتیٹی کل آن زیات میر محمد الفت نا پروگرام زیات دوست بسکہ، ہزار آتا کچ اٹ چٹھیک بسرہ۔ اوکان گڈ ”دیوان“ پروگرام مخلوق ءِ ہنداخس دوست بس کہ اونا ہم بنوک آک بھاز زیات ئسرہ۔ ہراڑکن گچین ءُ چٹھی و ٹیلفون آک برسا کریرہ۔ اونا انداز مخلوق ءِ بھاز دوست بسکہ، وخت اس کہ دا پروگرام آتیٹی پین چندی کمپیئر و اناؤنسر آک تینا وڑ اٹ جوان ءُ جوان ءُ پروگرام پیش کریر۔

”داکان ایکان“ پروگرام ءِ وخت اس ڈاکٹر عبدالرزاق صابرؔ ہم کرسا کرے۔ دا پروگرام آتا پیشکار (پروڈیوسر) آتیٹی ایماندار غلام نبی راہیؔ، ایماندارغلام حیدر حسرتؔ، ایماندار یوسف ثانی ساسولی و میر محمد الفت اوار ئسرہ۔ وخت اس کہ اینو پگہ اختر بلوچ، سلیم بلوچ و سلطان شاہوانی پروگرام آتے پیش کننگ اٹی ءُ۔

وخت اس کہ پروگرام آتا شونکار کمپیئر و اناؤنسر آتیٹی ایماندار عالم خان مینگل، خدادادگل، ایماندار عبدالقادر حارث، رفیق شاد، عمر فاروق، ظفر مینگل، غلام فاروق وفا، نادر شاہوانی، درخان ابابکی، عبدالقدوس ساجد ابابکی، عطا عادل، ظفر اقبال، کنا جند (مطلب مینگل) و ایلو چندیک اوار ئسرہ، یا داسکان اریر۔ وخت اس کہ دا پن تیٹی بھاز آ پنک اوار افس، ہراکہ جتا جتا وخت و دورباری ٹی دا پروگرام آتیٹی اناؤنسمنٹ و کمپیئرنگ کریر۔

دا پک ءِ کہ ہمو وخت آ ریڈیو ہر اُرا ٹی بننگاکہ، و دا پروگرام آتا پیشکار و شونکار آتا بھلو پن اس ئس۔ داکان بیدس بھاز آ شئیر پاروک آک ریڈیو نا وسیلہ اٹ پن کٹار۔ پنی آ شئیر پاروک آتیٹی عئید محمد علی، عظیم جان، عالم مسرور، اختر چنال، بشیر احمد، محمد مراد پارکوئی، دلمراد، سیف جان، نصر اللہ مینگل، امیر بخش خضداری و سازندہ غاتیٹی امان اللہ مینگل و پین چندی شئیر پاروک و سازندہ غاک اوار ئسر۔

وخت اس کہ ریڈیو نا گیشتری شئیر تیٹی خلقی شئیر وخت اس کہ غزل آتا نوشتہ کروک آتیٹی غلام حیدر حسرتؔ، میر محمد الفتؔ، امیر الملک مینگل، ڈاکٹر عبدالرزاق صابرؔ، قیوم بیدارؔ، پیر محمد نیمرغی و ایلوشاعر آتا گچین آ غزل آتے جتا جتا شئیر پاروک آک تینا توار اٹ زیبدار کرینو۔

اینو پگہ براہوئی پروگرام آتا وخت پنچ کلاک آن کم کرسا مسہ کلاک یا دا پان کہ مسہ پروگرام ”گندار“، ”سینگار“ و خلقی کچاری سلیسنو۔ ایلو کنڈ آ ریڈیو نا کمک اٹ پروگرام آک بننگ مفسہ۔ دا کمبوتی نا سوب آن اسہ دے اس کمپیئر ظفر مینگل تون رابطہ مس تو او جوان ءُ حوال اس تس کہ وخت و زمانہ نا رد اٹ اینو پگہ پروگرام آک نیٹ انا وسیلہ اٹ موبائل آ بننگ مریرہ۔ داڑکن نم تینا موبائل اٹی (نیٹ مرے تو) Play Storeاٹی Radio Pakistan نوشتہ کرسا کلک کبو، ولدا Lestine Live اٹی نمے صوبہ پنجاب، خیبر پختونخواہ، سندھ و بلوچستان نا آن لائن پیش مروک آ ریڈیو اسٹیشن آتا لڑ مِلک۔ ہندا لڑ اٹی Balochistan اٹی ارا ریڈیو آن لائن و اسہ ایف ایم و اسہ میڈیم ویو چینل اسے۔ اینو پگہ 10:05 منٹ 12:05 و 4:05 منٹ آ آن لائن براہوئی پروگرام آتے نم تینا موبائل آ بننگ کیرے۔

اگہ ریڈیو نا رد اٹ ہیت مرے تو دنیا نا ہر ملک انا تینا چندی پرائیویٹ و سرکاری ریڈیو چینل آک اریر۔ ہر ملک و راج انا بولی تا تینا چینل آک ءُ۔ ہراکہ اینو نا وخت اٹی ہم بھلو کچ اسیٹ بننگرہ۔ اگہ ریڈیو نا شرفمندی و اہمیت نا ہیت مرے تو داڑے بھاز لائخ وخوانندہ شونکار تینا راج انا بھلا چنکا پیر ورنا و نیاڑی تے کن تینا تینا وڑاٹ جوان آن جوان پروگرام و ہیت و گپ کننگ کیرہ،و دا وڑ اٹ اوفک نئے بیرہ اوفتا وخت ءِ پاس کیرہ بلکن اوفتے علم و پامداری ہم بشخرہ۔

اگہ ریڈیو پاکستان یا براہوئی بولی نا ہیت مرے تو دا وخت آ ریڈیو پاکستان کوئٹہ و پاکستان ٹیلی ویژن کوئٹہ غان پی ٹی وی بولان نا بھلو کڑدار اسے۔ ہندن ہمو ارا بھلا وسیلہ غاک ءُ ہرافتیٹ براہوئی زبان نا بنوک آک و پاروک آک تینا بولی و رسم و دود و ڈکھ وشادکامی نا رد اٹ معلومدار کرسا کیرہ۔ و ہنداارا اسٹیشن زبان نا شونداری نا ہند ءُ۔ داڑکن گرج دا گڑا نا ءِ کہ بیست و چار کلاک اٹی بیرہ مسہ پروگرام بھاز کم ءُ، داجاگہ نا باتی تا زبان تون بھلو بے انصافی اسے۔ گرج دا گڑا ناءِ کہ دا رد اٹ پروگرام آتا کچ و وخت ءِ ودفنگے۔

ہفتئی تلار

تاک:04

28-22 جنوری 2022ء

پنہ: 07