اصطلاحات نثر….پٹ و پول…… (62)

غفور جان ساسولی

0

Get real time updates directly on you device, subscribe now.

وساہت:۔ (Proverbs)

وساہت ہمو ہیت یا جملہ ءِ کہ ہرانا پد اٹ اسہ خاص ءُ و سرجم ءُ کِسہ یا داستان اس مریک۔

متل و بجازی تیانبار وساہت آک ہم زبان تا بیخ انا حیثیت تخرہ۔ امر ءُ زبان اس مرے اوٹی ہندا بجازی، متل و وساہت آک بنداوی کڑد ادا کیرہ۔ و ہراڑان زبان اسے نا کڑمبی، گشاد و شابیتی نا کساس مننگ کیک۔ پروفیسر سوسن، براہوئی خلقی ادب اٹی وساہت آتا رد اٹ اوفتا تعریف، بُن و جوڑ مننگ و اوفتا افسانوی ادب تون تعلق نا بابت نوشتہ کیک:

”وساہت ہمو ہیت یا جملہ ءِ کہ ہرانا پد اٹ اسہ سرجم ءُ کِسہ یا داستان اس مریک۔ نن ہراتم دافتا فنی مطالعہ ءِ کینہ تو خبر تمک کہ دا بھاز مست زمانہ اسے آن جوڑ مرسا بسنو۔ و مستی کن ہم جوڑ مرسا کرور۔ ولے دافتا تعلقاری افسانوی ادب تون اف کہ ہر ادیب تولے و تینے آن تینٹ وساہت تخلیق کے۔ بلکن وساہت دن مریک کہ اسٹ اسے آ ہندن ءُ ویل و واقعہ یا چَٹی اس تما یا اسٹ اسے آن ہندن ءُ کاریم اس مس، ہراٹی جوانی، خرابی، فائدہ یا نسخان اس مس یا اوٹی پنت و نصیحت نا دلچسپ ءُ ہیت اس مس، ہرا کہ ناقابل گیرام ئس، تو ہمودے مخلوق گونڈ ءُ فقرہ یا جملہ اسے ٹی موقع و مناسبت نا لحاظ اٹ کرسا وساہت کیرہ۔ مست انا وساہت آک بھازی آن مخلوق نا مخوئی آ ہیت و واقعہ غاتیا جوڑ مسنو۔ ہرافتے کہ مخلوق ٹوک و شغام ہم سارانے۔“ (سوسن، 2003ء، 62)

ہندا ڈَول پروفیسر غمخوار حیات تینا کتاب ”براہوئی متل آک“ اٹی حاجی محمد عثمان بنگلزئی نا وساہت آتا بارو اٹ نوشتہ مروک آ حوالہ ءِ دن بیان کرینے:

”براہوئی زبان اٹی وساہت آک بھاز چنک یعنی اسہ یا اِرا لوز آن جوڑ مریرہ، ولے دا اسہ بھاز بھلو نصیحت اسے آن پر ءُ معنہ اس تخرہ۔“ (حیات، 2017ء، 28)

وساہت آک سینہ بہ سینہ سفر کرسا ننے اسکان سر مسنو۔ ہرا اینو ہم تینا ہاٹی ٹی سوگو آ دروشم اٹی براہوئی زبان و ادب اٹی ساڑی اریر۔ وساہت آتا پد اٹ ہرا ڈَول انا کِسہ و واقعہ غاک ساڑی اریر۔ او پنت و نصیحت، عبرت تون اوار اوار ٹوک و شغان، بش توڷ، عادت و خصلت، مرک و زند، سیال و سیالداری نا بابت اوفتا جوانی، پراگندہیک پاش مریرہ۔ براہوئی ٹی پن آن بیدس پین چندی وساہت آک اریر، معنوی رد اٹ ہم چندی واقعہ غاتا پارہ غا اشارہ کیرہ۔ براہوئی خلقی ادب اٹ ہر اسہ صنف نا زی آ گچین کاریم مننگ اٹی ءِ۔ چاچا، متل، بجازی و وساہت آتا زی آ ہم پٹ و پولی کتاب آک مون آ بسنو۔ ہندا رد اٹ ڈینس برے نا لغت آن بنا مروک آ متل وساہت آتا کاریم، کامل القادری نا کتاب ”شروخ“ (1970ء)، ”براہوئی کہاوتیں“، (1974ء)، ڈاکٹر عبدالرحمن براہوئی نا کتاب ”وساہت آک“ (1979ء)، ”چاچا“ (1981ء)، ڈاکٹر عبدالرزاق صابر نا کتاب ”شاہی خروار“ (1989ء)، حاجی محمد عثمان بنگلزئی نا کتاب ”براہوئی ادب نا لال و جواہر آک“ (2006ء)، پروفیسر صالح محمد شاد نا کتاب ”ہنین خرین“ (2010ء) شینک مسنو۔

ہندن 2017ء ٹی عابد سلام نا اسہ کتاب اس ”جواہر“ نا پن اٹ شینک مس، دن تو دا ”چاربندی“ نا صنف آٹے، ولے ہر اسہ چاربندی اٹ متل و وساہت کاریم اٹ اتنگانے۔ یخین اٹ شاعری نا پڑ آ دا اسہ بے مٹ ءُ کوشست اسے۔ 2017ء ٹی پروفیسر غمخوار حیات نا کتاب ”براہوئی متل آک“ و 2019ء اٹی شاہین بارانزئی نا کتاب ”نرومب نا شکار“ شینک مس، ہراٹی متل، وساہت، بجازی، و چاچا تا اسہ بھلو کچ اس ساڑی ارے۔

منہ وساہت:۔

……نصروئی نا کفن

……کسک محمود خان

……بھائی خان والا ء ِبیغا

……خواری پوک آ جعفر خان

بڑز انا وساہت آک پن آن پن وساہت کننگانو۔ ہرانا پد اٹ اسہ نہ اسہ واقعہ یا کِسہ اس ساڑی ارے۔ ہندا سوب آن اودے پن اتون وساہت کیرہ۔ ایلو وساہت آک گڑاس دن اریر:

……بخال بے گڑھ؟

……پاک انگا رزان جوغن ءِ

……تیلی ءِ تمبہ کننگ

……زور انا مون اٹ زاری

……ہچ و بروے مننگ

کتاب آک:

سوسن، پروفیسر (2003ء)، ”براہوئی قدیم نثری ادب“، براہوئی اکیڈمی پاکستان کوئٹہ

حیات، غمخوار (2017ء)، ”براہوئی متل آک“ شعبہ براہوئی جامعہ بلوچستان کوئٹہ

ہفتئی تلار
تاک: 37
10-02 اکتوبر 2021ء
پنہ: 02

Get real time updates directly on you device, subscribe now.

Leave A Reply

Your email address will not be published.