براہوئی شاعری نا سفر(8)

میاں عبدالحق لاکھوریانی:۔

میاں عبدالحق لاکھوریانی باوہ نا پن داد محمد 26، دسمبر 1905ء اٹی سوراب نا علاقہ لاکھوریان اٹی ودی مس، بنائی دینی تعلیم ءِ مولوی عبداللہ نا مدرسہ ٹی خوانا۔ ”عبدالحق لاکھوریانی نا بارو اٹ مرشد علی حسن آزاد ساسولی نوشتہ کیک کہ لاکھوریانی چنک سنی آن چوری ئس تو اونا باوہ نا ایلم رسول بخش تون سندھ اٹی رہینگاکہ، اونا الہ اودے گنوک سرپند مرسا تینا کُر انا شوان کرے۔ ولے باباعبدالحق لاکھوریانی کُر انا شوانی آن زار ترخ مرسا کُر ءِ النگ و تینا مون ہننگ نا فیصلہ ءِ کرے۔ ہندن او سکھر نا اسہ مدرسہ اسے نا پارہ غا مون کرے، مدرسہ ٹی مولوی عبداللہ نا شاگڑد مس، مولوی مننگ آن پد مَش یعنی بلوچستان لاکھوریان سوراب آ بس و داڑے اسہ مدرسہ اسے نا بنیاد ءِ تخا، درس تدریس نا کاریم ءِ بنا کرے، او دینی کاریم تون اوار 1920ء اٹی براہوئی شاعری نا بنا ءِ کرے۔(لاکھوریانی، جولائی 2002ء، الف)

1951 اٹی‘ اونا شاعری نا مجموعہ ”سخن حق“ شینک مس، اونا داکتاب نا جاچ ءِ ہلین تو دا معلوم مریک لاکھوریانی نا شاعری ٹی دینی رنگ اتون اوار انقلابی، مزاحمتی، قوم دوستی وطن دوستی، انسان دوستی رنگ آک ہم اسہ پُرفکرءُ دروشم اسے ٹی خننگرہ، او دینی(عربی) تعلیم تون اوار فارسی زبان اٹ ہم تعلیم دوئی کننگ کن سندھ اٹی خواناسس۔ ہندا سوب آن اونا براہوئی شاعری ٹی فارسی و سندھی نا رنگ زیبا ءُ وڑ اسے اٹ درشان خننگک۔

مٹھا مور منٹھار کپہ ناز کن تون

خدا پاک چاہک اُست کنا بھاز نم تون

صورت اُست سوریا جتائی جان جوڑیا

کیوہ ساہ ءِ گوری مرک راز کن تون

یا

نہ یار تے ٹی ارے یاری نہ ایلم تو وفا داری

الان الفت ہفین خواری عجب دا ملک بلوچستان

اگر دوست آن کننگ خنپک پاروس اودے اسُل تپک

وری اونا پارہ ہِنپک ہندا دوست آک بلوچستان“

(لاکھوریانی، جولائی 2002ء،28)

میاں عبدالحق لاکھوریانی نا زندبود ءِ تدیفنگ نا ہرا حالیت آک مسنو ہمو حالیت آک اونا داخلی کیفیت آک اونا شاعری ٹی بھاز جوان خننگرہ۔ میاں لاکھوریانی نا چنکی نا زند بھاز ڈکھ و ویل آتا نیام اٹ گدرینگانے، اوچنک سنی ٹی لمہ باوہ نا پدین آسیخاغان محروم مسنے، کُر خوافینے، سندھ و بلوچستان نا سفرءِ پند خواری اٹ کرسا کرینے۔ آخر کار مدرسہ اسے ٹی داخل مسنے۔ دینی تعلیم دوئی کرے۔ او دینی تعلیم دوئی کننگ تون اوار براہوئی شاعری نا ہم بنا ءِ کیک۔ اونا شاعری راج انا خرین آ رویہ غاتیان گلہ دار مننگ تون اوار انقلابی فکر اسے تون ہم پیوست ءِ۔ انتئے کہ ہمو شاعری انقلابی نظریہ نا خواجہ مریک کہ تینٹ سختی و سوری تیان تدینگ انگ ءِ۔

ہفتئی تلار
تاک: 37
10-02 اکتوبر 2021ء
پنہ: 08