اصطلاحات نثر(پٹ و پول، 35)

دود ربیدہ نا ہند آک:۔ (Art Centers)

دود ربیدہ نا مرکز آک راج اتون گنڈوک علم و ادب و فنون لطیفہ کون آ اہم انگا گڑا تا نشاندہی ءِ کیرہ۔

دا مرکز آک لس وڑ اٹ سرکاری یا غیر سرکاری ادارہ غاتا مدت و کمک آن کاریم کیرہ۔ دود ربیدہ نا مرکز آتیٹی فن پارہ غاتا نمائش کننگ و ایلو ادبی فنی و دود ربیدہ غاتا پروگرام آک اڈ تننگرہ۔ نوری نصیر خان دود ربیدہ کمپلیکس کوئٹہ، الحمراء آرٹ کونسل، لاہور و کراچی آرٹ کونسل، کراچی پنی آ دود ربیدہ نا مرکز آتیٹی بریرہ۔

براہوئی لہجہ غاک:۔ (Brahui Dialects)

لہجہ عربی زبان نا لوز اسے، ہرانا معنہ لوز آتا توار و ہیت کننگ نا انداز ارے۔ دنیا نا چندی ہندن ءُ زبان ارے، ہرافتا اسٹ آن زیات لہجہ ساڑی اریر۔ و ہرافتیٹی اوفک تینا ہیت انا مسخت ءِ ایلوفتسکان سر کیرہ۔ 

21 فروری 2018ء نا ”ایتھنولاک“ سروے نا رد اٹ 7097 زبان داسہ ہم ساڑی اریر۔ دافتا ہیت کروک آک ارب آتیٹی اریر۔ ہندا ارب آ بندغ آتا نیام اٹ ہر اسہ بندغ نا اسہ جتا ءُ زبان اس ارے، ہرانا ہیت کننگ و پہہ مننگ نا انداز اونا لائخی ہم جتا ارے۔

اگہ دنیا ٹی 7097 زبان ساڑی ارے۔ تو دا پاش ءُ ہیت اسے کہ دا 7097 زبان نا پاروک آ بندغ آتا لہجہ غاک ہم 7097 آن گیشتر مرور۔ دن کہ افریقائی، امریکی انگریزی، امریکیت، اینگلو امریکی لہجہ، اینگلو انڈین، انڈک زبان آتا لہجہ، لنگوا فرانکائی و پین۔

دنیا ٹی گڑاس ہندن ءُ زبان تا پاروک اریر، ہرافتا داسکان لہجہ غاتا سائنسی وڑ اٹ مطالعہ کننگ متنے، دن کہ نیوگنی (New Guinea)، ایمازون (Amazon) نا بدھ والا علاقہ غاک، چترال، دیر، سوات، گلگت، سکردو، تھرپارکر، افریقہ و امریکہ نا گڑاس علاقہ غاک، انڈیا نا ریاست آک و چین و جاپان کون آ ملک آک بریرہ۔ 

دن تو پوسکن آ سائنسی دور اٹی دا پارہ غا کاریم مننگ اٹی ءِ، ولے اونا درشانی نا ترندی کم ءِ۔ لسانی بنداو آتیا بندغ آتا زبان تا لہجہ اوفتا السی، راجی و سیاسی معنہ ٹی ہم اہمیت تخک۔

ہفتئی تلار
تاک: 39
10-16 Oct, 2020
پنہ: 06