پروفیسر سنی اسہ دے سیٹی بتو تو بی اے بی ایس سی نا امتحانک مفسہ،اے ایس اے

کوئٹہ (آن لائن) اکیڈمک اسٹاف ایسو سی ایشن جامعہ بلوچستان پروفیسر ڈاکٹر لیاقت سنی نا برمتہ نابرخلاف بی اے، بی ایس سی تون اوار غٹ امتحان تا نگران کمیٹی نا بائیکاٹ و حکومت ءِ 24گھنٹہ نا الٹی میٹم ترسا پارینے کہ گہ پروفیسرءِ رکھی وڑ اٹ بازیاب کننگتو تو یکم دسمبر آن امتحان تا پورو بائیکاٹ کرسا گورنر ہاؤس، بلوچستان اسمبلی، کوئٹہ پریس کلب تون اوار مچ آ ملک اٹ برانزی مچی و دھرناتننگک۔دا ہیت انا پڑو ءِ اکیڈمک اسٹاف ایسوسی ایشن نا صدر پروفیسر ڈاکٹر کلیم اللہ بڑیچ، پروفیسر ڈاکٹر شبیر شاہوانی وبلوچستان پروفیسرز اینڈ لیکچرارز ایسوسی ایشن نا صدر حمید خان اسک اے ایس اے نا جنرل سیکرٹری عبدالباقی جتک، بی پی ایل اے نا جنرل سیکرٹری عارف بلوچ، پروفیسر ڈاکٹر منظور بلوچ،کنٹرولر جامعہ بلوچستان ڈاکٹر عین الدین آغا وایلوفتتون اوار کوئٹہ پریس کلب اٹ پریس کانفرنس آن تران کرسا کریر۔او پاریر کہ است ہسونی ناہیت دادے کہ تدوک آدے جامعہ بلوچستان نا مسہ پروفیسر ہرافتے ٹی پروفیسر نظام بلوچ، ڈاکٹر شبیر احمد شاہوانی و ڈاکٹر لیاقت سنی ءِ مستونگ اٹ دے پاک اٹ نادرست بندغ آک برمتہ کریر‘ اوکان گڈ پروفیسر نظام بلوچ و ڈاکٹر شبیراحمد شاہوانی ءِ اغبرگ نا ہند آ مَش اٹ خن تیا پٹی تفسا الار۔ او پاریر کہ حکومت نا بے حسی ناسوب آن راج انا ’معمار‘ آک بے رکھی نا گواچی ءُ‘ اوسیاسی جماعت‘ طالب علم تنظیم‘وکیل آتاتنظیم‘ میڈیا‘راجی تنظیم و سول سوسائٹی آن خواست کریر کہ او پروفیسر ڈاکٹر لیاقت سنی نا بازیابی کن توار چست کیر تاکہ ملک اٹ علم و پٹ وپول نا علم بڑزا مرے۔ او حکومت بلوچستان ءِ 24گھنٹہ نا الٹی میٹم ترسا بی اے، بی ایس سی نا نگران کمیٹی آن بائیکاٹ نا پڑو کریر و پاریر کہ اگہ 24گھنٹہ ٹی پروفیسر ڈاکٹر لیاقت سنی بازیاب متو تو یکم دسمبر آن بی اے، بی ایس سی نا امتحان تا بائیکاٹ و گورنر ہاؤس، بلوچستان اسمبلی، پریس کلب تون اوار مچ آ ملک اٹ برانزی مچی و دھرنا تننگک۔داوخت آ بی پی ایل اے نا صدر حمید خان اے ایس اے نا غٹ خواست وفیصلہ غاتا مخ تفی ءِ کرسا پروفیسر ڈاکٹر لیاقت سنی نا برمتہ نا مذمت ءِ کرے وباور کرفے کہ بی پی ایل اے برمتہ پروفیسر نا بازیابی اسکان اے ا یس اے نا ہر پلیٹ فارم آ مخ تفی و برانز اٹ بشخ ہلیک۔