براہوئی ادبی سوسائٹی نا 43 میکو سال دے

ہر سال 31مارچ آ براہوئی ادبی سوسائٹی نا سال دے اڈ تننگک کہ اودے آ سوسائٹی نا پارہ غان گچین ءُ سیمینار اس اڈ تننگک، ہراٹی کتاب آتا مون پاشی، اسٹیج ڈرامہ، محفل مشاعرہ، محفل موسیقی و ایوارڈ بشخنگ اوار ءُ۔ روایت ءِ برجا تخسا دا وار ہم سوسائٹی نا پارہ غان اسہ گچین ءُ سیمینار اس اڈ تننگاسُس ہراٹی بُڑزا لکھوک پروگرام آتتون اوار میر مہراب خان شہید نا زند و بود آ اسٹیج ڈرامہ اس ہم سجفنگاسس۔ ہرادے بلوچستان نا پنی آ ڈرامہ نگار اے ڈی بلوچ نوشتہ کریسُس۔ ولے کورونا دین انا سوب آن کہ اسہ پارہ غا مُچ آ دنیا لاک ڈاﺅن نا گواچی مس، تو ہموڑے براہوئی ادبی سوسائٹی نا پروگرام آک ہم سلیسُر۔ وخت انا ضرورت ءِ محسوس کرسا سنگت آک سلاہ کریر کہ دا وار براہوئی ادبی سوسائٹی نا سال دے ءِ سوشل میڈیا نا کمک اٹ اڈ ایتن۔ گڑا سوشل میڈیا نا اسہ بشخ اس وٹس ایپ نا کیہی گروپ آتیٹ کہ اوفتیٹی پام، بولان نا مسافر، گدان، ایلم، مہر ادبی کاروان، تلار اٹ سنگت آک تینا ہیت آتے کریر۔

دا رد اٹ کُل آن مُست نور خان محمد حسنی گروپ نا سنگت آتتون ہیت کرسا پارے کہ 31مارچ 2020ءکہ او براہوئی ادبی سوسائٹی نا سال دے ءِ ہرادے اڈ تننگ کن نن بھاز تیاری کریسُن، و اے ڈی بلوچ مہراب خان شہید نا حوالہ ٹی اسٹیج ڈرامہ اس ہم نوشتہ کریسُس، ہرادے سوسائٹی نا کُنڈ آن پیش کروئی ئس، ولے لاک ڈاﺅن نا سوب آن دا پروگرام آک پد بٹنگار۔ بہرحال کُل سنگت آتے براہوئی ادبی سوسائٹی نا سال دے مبارک مرے، ہرانا بُنداو ءِ 1978ءاٹی منہ سنگت تخار۔ ولے اینو دا اسہ بھلو ادبی ءُ تحریک اسے۔ ہراٹی براہوئی ادب نا ہر بشخ اٹ کیہی کتاب آک نوشتہ مسنو۔ براہوئی صورتخطی و اسٹیج ڈرامہ نا ردوم اٹی براہوئی ادبی سوسائٹی نا بھلو کِڑد اسے۔ سنگت آتیان خواست ءِ کہ اینو نا دے انا رد اٹ تینا ہیت آتے کیر۔ اینو اگہ نن مون پہ مون افّن ولے سوشل میڈیا نا ننے اوار کننگ اٹی بھلو دُو اسے۔

اوکان گُڈ براہوئی ادبی سوسائٹی نا چیئرمین عبدالقیوم بیدار ہیت کرسا پارے کہ اینو براہوئی ادبی سوسائٹی نا سال دے ءِ، و نن کُل مجبور اُن کہ تینا اُرا تیٹی تولوک اُن۔ ای کل سنگت آتے براہوئی ادبی سوسائٹی نا سال دے آ مبارکبادی ایتوہ۔ اینو ہم کنے ہمو تاریخ یات ءِ کہ اینو آن کم و وَد 43سال مُست بلوچستان یونیورسٹی نا پارہ غان سائنس کالج اٹی عالم فاضل و ادیب نا کلاس آتا بنا مس کہ اوفتے ٹی ای، پروفیسر خداداد گُل، رفیق قائم بنگُلزئی، عبدالوہاب ہمدم، منیر رودینی، ایوب عالم و ایلو سنگت آک دا کلاس آتیٹی داخل مسن۔ ننا اُستاد آک ڈاکٹر عبدالرحمٰن براہوئی، پروفیسر نادر قمبرانی، میر عاقل خان مینگل، سید عابد شاہ عابد اسک ئسر۔ دا ہمو وخت ئس کہ نن کُل سنگت آک ورنا ئسن و ننے ادب نا پِڑ آ بننگ نا بھاز شوق ئس۔ نن براہوئی ادبی سوسائٹی نا بُنداو ءِ تخان و براہوئی ادب کن کاریم تے بنا کرین۔ داڑان گُڈ افضل مراد، وحید زہیر، نور خان محمد حسنی، عارف ضیائ، اے ڈی بلوچ و ایلو سنگت آک دا قافلہ ٹی اوار مسر۔ داڑان بیدس ڈاکٹر عبدالرحمٰن براہوئی و ڈاکٹر عبدالرزاق صابر ننا کماشی ءِ کرسا بسر۔ ہندا سنگت آتا سوب آن سوسائٹی نا کاریمک مون مستی ہنار۔ نن اسٹیج ڈرامہ جوڑ کرین ہرافک مخلوق ءِ بھاز دوست بسر۔

اللہ نا فضل و کرم اٹ براہوئی ادبی سوسائٹی نا پارہ غان براہوئی ادب نا ہر بشخ آ کم و وَد 200 آن زیات کتاب نوشتہ مسنو۔ اگہ نن براہوئی ادب نا جاچ ءِ ہلین تو 1950ءآن گُڈ آزات جمالدینی و عبداللہ جان جمالدینی تینا رسالہ ”ماہتاک بلوچی“ نا منہ پنہ ٹی براہوئی ءِ اوار کریر۔ داڑان بیدس اثیرعبدالقادر شاہوانی ”اُلس“ و ”احوال“ نا کمک اٹ ہم ننا اُست بڈی ءِ کرے۔ ہندن پی ٹی وی ٹی افضل مینگل، سرور سودائی، دوست محمد گشکوری و ایلو سنگت آک ننے وارخواہی تسر۔ وخت اس کہ ریڈیو ٹی غلام حیدر حسرت، غلام نبی راہی و احمد دین خادم ہم نن تون کُمک کریر۔ اینو اللہ نا فضل و کرم اٹی براہوئی ادبی سوسائٹی نا ممبر و عہدیدار آتے اے وخت آ کہ کس تتوکہ، اینو ہر اسٹ تا تینا جاگہ غا اکیڈمی نا حیثیت اٹی درست مریک۔ ہندا سنگت آتا مہر ءِ کہ 43 سال آن پد ہم نن جتا متنُن بلکن ننا مہر آک پین ودّانو۔

اے ڈی بلوچ پارے کہ اینو براہوئی ادبی سوسائٹی نا سال دے ءِ ہرانا رد اٹ نن بھاز تیاری کریسُن۔ امر کہ نور خان محمد حسنی پارے کہ میر مہراب خان شہید نا بابت اسٹیج ڈرامہ اس کروئی ئس ہراکہ مننگ کتو۔ زندگی مس انشاءاللہ مون مُستی دا اسٹیج ڈرامہ ءِ ضرور کرون۔ براہوئی ادبی سوسائٹی ہمو ادارہ ءِ ہراکہ چنکو وخت اسیٹی ادب نا پڑ آ بھلو کاریم کرینے۔ نئے بیرہ کتاب آتے شینک کننگانے، بلکن براہوئی اسٹیج ڈرامہ نا ردوم ہم براہوئی ادبی سوسائٹی نا منت وار ءِ۔ ای ہرا وخت آ پی ٹی وی آ براہوئی ڈرامہ غاتا بنا ءِ کریٹ تو ہندا سنگت آک ئسر ہرا کنا اُست بڈی ءِ کریر۔ براہوئی ادبی سوسائٹی نئے بیرہ طنز و مزاح بلکن تاریخ و جدید دور انا زی آ ہم کیہی اسٹیج ڈرامہ غاتے پیش کرےنے۔ ای کُل سنگت آتے براہوئی ادبی سوسائٹی نا سال دے نا رد اٹ اُست انا ہُب اٹ مبارکبادی ایتوہ۔

مہر ادبی کاروان نا چیئرمین یوسف نسیم پارے کہ محترم قیوم بیدار و نور خان نواب نا بے کچ منتوار اُٹ کہ او ننے دا وارخواہی ءِ تسر کہ اینو براہوئی ادبی سوسائٹی نا سال دے انا رد اٹ گڑاس ہیت کین۔ مہالو براہوئی ادبی سوسائٹی نا سال دے ءِ بھاز جم و جوش اٹ اڈ تننگاکہ۔ مچ آ بلوچستان آن شاعر، ادیب آک بسنہ و اسہ زیبا ءُ مُچی اس مسکہ۔ دا مچی ٹی براہوئی ادبی سوسائٹی نا کار و کڑد نا بابت ہیت و گپ کننگاکہ، کتاب آتا مون پاشی مسکہ، اسٹیج ڈرامہ غاک مسرہ۔ داسہ مچ آ دنیا اسہ دین اسے نا گواچی مسنے کہ اودے کورونا وائرس پارہ۔ دانا سوب آن دا وار انا سال دے نا پروگرام ءِ کل انا رکھ و سلامتی کن ملتوی کننگا۔ یخین اٹ براہوئی ادبی سوسائٹی نا زبان و ادب ءِ مستی دننگ اٹ بھلو دُو اسے۔ دا ادارہ نا شخصیت آتے ٹی پروفیسر خداداد گل، رفیق قائم بنگلزئی، وہاب ہمدم، منیر رودینی، ڈاکٹر عبدالرحمٰن براہوئی، پروفیسر نادر قمبرانی، عبداللہ جان جمالدینی، عابد شاہ عابد، افضل مراد، وحید زہیر، اے ڈی بلوچ، نور خان محمد حسنی، قیوم بیدار، ڈاکٹر اعظم بنگلزئی، حسین بخش ساجد، حنیف مزاج، اُستاد عجب خان سائل، انور زیب، عبدالحلیم بیتات و کنا جند کہ نن براہوئی ادبی سوسائٹی نا پروگرام آتیا بسنہ و براہوئی زبان و ادب نا زی آ ہیت و گپ مسکہ۔ ننا سینئر آک ننا راہشونی ءِ کرسا اینو ننے اسہ پِن اس بشخانو کہ چار بندغ اس ننے براہوئی نا شاعر، ادیب اسے نا حیثیت اٹ درست کیرہ۔ استو کنا خیال اٹ بس کہ ای بیدار صاحب تون فون آ حال حوال کیو۔ و اودے پاو کہ نن پگہ اوار تولنگ کپرون۔ ہندن ءُ پروگرام اس وٹس ایپ نا زی آ مرے ہراٹی سنگت آک تینا اُست انا ہیت آتے کیر۔ ولے پارہ ہیت و سوچ آتا تعلقداری اُست آتتون مریک۔ دا زیبا پروگرام نا بنا ءِ نور خان محمد حسنی کرے، اُست خوش مس۔ گڑاس ہیت کننگ نا وار مِلا۔ براہوئی ادبی سوسائٹی براہوئی ادب کن بھلو سرمایہ اسے۔ اینو دا ادارہ ءِ 43 سال مننگ ءِ۔ دا وخت اٹی براہوئی ادبی سوسائٹی ہندن ءُ شاعر، ادیب، دانشور، خوانوک مون آ ایس کہ اینو براہوئی ادب اسہ زیبا ءُ مزل اسے نا پارہ غا گام تخنگ اٹی ءِ۔ ٹی وی ٹی ہم ہندا سنگت آک کہ اوفتے ٹی قیوم بیدار، افضل مراد، وحید زہیر، نورخان نواب، اے ڈی بلوچ داڑان بیدس ریڈیو نا زی آ ننا نمائندگی ءِ کرسا براہوئی ادبی سوسائٹی نا ہندا سنگت آک تینا زبان ءِ ہر مزل آ زندہ تخسا تینا جوزہ ءِ برجا تخانو۔ بیدار صاحب نا پاننگ ءِ کہ داسہ سوسائٹی آن بیدس پین کیہی براہوئی ادبی ادارہ غاک اریر کہ براہوئی زبان نا خدمت اٹی نن و دے ءِ اسٹ کننگ ءُ۔ نن براہوئی ادبی سوسائٹی نا بنداو ءِ دن ءُ وخت اسیٹ تخان کہ نن تون وسیلہ الّو۔ نن اِرا اِرا روپئی، چار چار روپئی چندہ کرینہ و تینا زبان و ادب کن کاریم کرینہ۔ لکھ سلام دن انگا خواری کش آتے کہ وسیلہ مفننگ آن پد ہم براہوئی زبان ءِ ہندن ءُ جاگہ اسے آ سر کرینو کہ اینو مچ آ دنیا ٹی دا زبان چاہنگک۔ دا کل ہمو سنگت آک ءُ کہ براہوئی زبان ءِ اسہ زیبا ءُ دروشم اس بشخانو، است خواہک کہ بندغ تینا سینئر تا راہشونی آ ہیت آتے بنے۔ اینو اگہ سوسائٹی نا سال دے نا رد اٹ ننا جونک اسٹ ایلو آن مُر ءُ، ولے ننا خیال آک اسٹ ایلو آن خُڑک ءُ۔

پروفیسر ڈاکٹر عبدالرزاق صابر سنگت آتتون ہیت و گپ کرسا پارے کہ کُل آن مست ای کُل سنگت آتے براہوئی ادبی سوسائٹی نا سال دے آ مبارکبادی ایتوہ۔ براہوئی ادبی سوسائٹی کن نما خذمت آک مدام مسنو و نم سوسائٹی نا سال دے ءِ بھاز جم و جوش اٹی اڈ تسنرے۔ بد قسمتی اٹ دا سال ہندن گدرینگ انگ اٹی ءِ ہراٹی ہچ ءُ مُچی اسے نا موکل اف۔ ظاہر ءِ ننے تینا خیال ءِ ہم تخوئی ءِ ولے اومیت ءِ انشاءاللہ ہرا وخت دا سختی نا دیک ایسر مسر سوسائٹی نا کاریمک مون مُستی ہنور۔ براہوئی ادب نا خذمت اٹی براہوئی ادبی سوسائٹی نا بھلو دُو اسے و براہوئی ادبی سوسائٹی نا باسک و عہدیدار آک ہم بھاز خواری کرینو۔ دا دیک ایسر مریر انشاءاللہ کاریمک پد آن ہم مننگ کیرہ۔

افضل مراد پارے کہ کُل آن مست مبارکبادی ہمو سنگت آتے کہ براہوئی ادبی سوائٹی نا بنداو ءِ تخنگ آن ہلیس اینو اسکان اوڑتون اوار ءُ۔ تینا وخت و لائخی تے مون آ اتسا براہوئی ادب نا خذمت ءِ کرسا بسنو۔ دا اسہ بھلو ہیت اسے و داٹی اللہ نا مہربانی ہم اوار ءِ، سنگت آتا اسٹ ایلو آ اعتماد ہم اوار ءِ۔ ہرا سہ سنگت تینا وس انا کچ آ براہوئی ادب کن کاریم کرینے۔ وخت وخت اس شیفی بڑزی ہم مسنے۔ جاگہ نہ جاگہ اس بے جاگہی نا سوب آن کیہی ویل آک مسنو۔ بھاز وخت ضرورت آک پورو متنو۔ اوڑان پد ہم سنگت آک مون آ بسنو۔ دا سوسائٹی نا اسہ تاریخی ءُ اہمیت اسے۔ ای دا ہیت آ بھاز خوش مسٹ کہ دخت انا ضرورت ءِ ہرسا اگہ اواری مننگ کتو تو وٹس ایپ انا زی آ براہوئی ادب سوسائٹی نا سال دے ءِ اڈ تننگ اٹی ءُ۔ داڑتون اوار دا افسوز ہم ارے کہ دا اولیکو سیمینار ءِ ہراٹی کتاب آتا رونمائی، اسٹیج ڈرامہ و محفل مشاعرہ اف۔ ہرانا تیاری ءِ کننگاسُس۔ براہوئی ادبی سوسائٹی نا اسہ بھلو سرسہبی اس خننگک کہ بھاز انگا سنگت آک داٹی اسٹ ایلو آن ہیل کرینو۔ اسہ ایلو نا حوصلہ افزائی ءِ کرینو و بھلا ہیت دا کہ اسہ ایلو نا احترام ءِ کرینو۔ اسہ ایلو نا اعتبار ءِ کرسا، اسہ ایلو ءِ قدر ترسا ہرا وخت آ نی مون آ کاسہ تو دا کُل انا سرسہبی ءِ۔ دا مف کہ بندغ اسہ جی جی کروک ءُ ٹولی اس جوڑ کے کہ اسہ بھلو خواجہ اس تولوک ءِ، و ایلوفک اونا نت تا مون آ تولر، و اودے واہ واہ کیر۔ براہوئی ادبی سوساٹی ٹی ہر بندغ چیئرمین مسنے، ہر بندغ جنرل سیکرٹری مسنے، ہر بندغ خزانچی مسنے۔ ای دادے براہوئی ادبی سوسائٹی نا اسہ بھلو سرسہبی اس تکوہ۔

داڑان بیدس پی ٹی وی نا جی ایم عطاءاللہ بلوچ، پروفیسر غلام دستگیر صابر، پنی آ گلوکار اختر چنال، عمر فاروق، جمیل زیب، حیدر شاہوانی و ایلو سنگت آک ہم سوسائٹی نا سال دے انا رد اٹ ہیت و گپ کریر او اسٹ ایلو ءِ مبارکبادی تِسُر۔