حسن ناصر نا افسانوی مجموعہ ”چیہانٹ“ نا تنقیدی جاچ اس 3

شاہین بارانزئی

”چیہانٹ“ اٹی ساڑی افسانہ غاتے خواننگ آن پد دا تو معلوم مریک کہ نن اسہ ہندن ئُ ریاست اسے ٹی رہینگنہ کہ ہراڑے غریبی، بدحالی، بزّکاری، بینگنی، بیوسی کچ آن زیات ئِ، پنڈنگ لس ئِ۔ ولے داڑے دا ہیت انا درک ملپک کہ ریاست نا زمواریک انت ئُ؟ دا اسہ جمہوری ئُ ریاست اسے، دانا حکومت سازی مخلوق نا وونٹ آتا کمک اٹ مریک۔ ہندا وونٹ ہلوک آک ہرافتے کہ جمہوری Set Up پاننگک، داڑے مخلوق نا نمائندہ پاننگک۔ دا جمہوری نمائندہ غاتا زمواریک انت ئُ؟ ملک اٹی وفاقی و صوبائی لیول آ انتظامیہ اس ارے، بیورو کریسی اس ارے۔ دا انتظامیہ نا کڑدار انت ئِ؟ مخلوق نا دا غریبی، بزّکاری ، بدحالی او پنڈنگ ٹی ہندا Element آتا ہم دو ارے یا اف، بلکن داڑے ہندن لگک کہ دا غریبی، بدحالی، دا کل قدرتی ئُ گڑا ئُ۔ دافتے اگہ ختم کے تو قدرت کے آخا تو دا ہندن مریرہ۔ انتئے کہ دا ویل آتا ایسری قدرت نا کمامداری ئِ۔ افسانہ غاتا کل انا تھیم ہندادے ولے ای، مثال کن بیرہ اسہ اقتباس اس پیش کیوہ کہ اولیکو افسانہ ”انت کنا دعا ہم قبول مریک….؟“ اٹی ساڑی ئِ:

”تیویٰ علاقہ ٹی دا اِرا سال نا ئِ آسمان نا کنڈ آن ہچ ئُ رحمت اس شیف متویسس…. ہستین ڈکال و بے پری بومب آنبار علاقہ غا تینا منحوس آ پرّہ غاتے تالان کریسس“ (پ،33)۔

قدرتی معاملہ غاتا رد اٹ تو ہر افسانہ ٹی دُن ئُ اسٹ آخا کیہی اقتباس آک ساڑی ئُ، ولے انتظامیہ، حکومت و ریاست نا زمواری ےا بابت ہچ ئُ گڑاس اف کہ ”چیہانٹ“ نا خوانوک نا دماغ اٹی دا تاثر ودی مرے کہ دا غریبی و بدحالیک ریاست، ریاستی ادارہ و حکومت نا نزوری تا دو آن ملک ئِ، قوم ئِ و مخلوق ئِ پیش بروک ئُ۔ داڑے پانے اسہ غریب ئُ بندغ اسے نا اُست انا ہیت آک ئُ، بلکن قدرتی کاریم تیان اونا مایوسی نا پاشی ئِ کننگانے ہرا کہ ہندا پاریکہ ”انت کنا دعا ہم قبول مریک….؟“ انتئے کہ او ہنداخس لنگڑی، بینگنی، بیوسی، بزّکاری خناسس کہ داسہ اودے تینا دعا تیا ہم باور بتوکہ کہ اونا دعاک قبول مرور۔ ولدا ہندا افسانہ (انت کنا دعا ہم قبول مریک….؟) اٹی ہندا پک کننگانے کہ ڈکال نا ختمی کن نماز استسقاءکننگا، پر مس۔ دُن کہ افسانہ نا ایسری ٹی پاننگانے کہ:

”او اُرا کن پدی سر ہلک، مسیت نا خڑک آ سر مس مولوی صاحب ساہدار تا سل تے مچ کننگ ئس۔ آسمان آ پیہن آ جمرآک رنگ ئِ تینا مون ہڑساسر۔ چُنکا بھلا میر، متبر ہر اسٹ خوش و گل و بال ئس کہ خدا ننا خیرات ئِ قبول کرے“ (پ،35) ۔

مطلب کہ قدرت ڈکال کریسس، قدرت آن کاریم کشنگ کن مولوی صاحب آک تینا کڑدار ئِ ادا کننگ کیرہ۔ ہرا خیال آتےان ریاست ئِ پین Free Hand تننگ مریک کہ اصل دا کاریم قدرت نا ئِ، اونا نائب آک مولوی صاحب آک ئُ۔ ریاست نا داڑے انت کاریم؟

افسانہ ”خرین آ زند انا گچین آ تغ“ اٹی اسہ ٹھیکیدار اسے زموار اڈ تننگانے۔ حالانکہ ٹھیکیدار تو تینٹ اخس رشوت، ا خس کمیشن تننگ آن پد اسہ ٹھیکہ اس دوئی کننگ اٹی سرسہب مریک۔ داکان پد تو لازمی ئُ ہیت اسے کہ ٹھیکیدار ہم بے ایمانی کیک۔ ولے ہرا کہ مفت اٹی 44%، 22% یا1% 1کمیشن نا خواجہ مریرہ اوفتا بارو اٹ انتئے ہیت مفک؟ (دا وخت 44% ایم پی اے یا ایم این اے نا کمیشن، 22% محکمہ نا بھلا افسر، 11% انجینئر یا اونا گروپ نا کمیشن ئِ) اصل استحصالی تپہ تو ہندادے۔ بلکن اصل استحصالی آ تپہ تو ہمودے کہ ہرا مخلوق نا وونٹ آتے ہلسا اسمبلی تے ٹی سرمننگ آن پد تینا جند انا آسودہی تا رکھ اکن کانود جوڑ کیرہ ولے غریب مخلوق کن کانود جوڑ مفک۔ اوفک اسمبلی نا دیوان تے ٹی کانود تو تینا (بھلا تپہ نا) آسراتی تے کن جوڑ کیرہ، ولے ہنداڑے ہم اوفتا (TA & DA) جوڑ مریک۔ فاضل افسانہ نگار نا نوٹس اٹی دا ہیت انا مننگ ہم ضروری ئس کہ یکم مئی نا دے ہرا احتجاج و تقریر آک مریرہ اوفک ٹھیکیدار نا خلاف افس بلکہ ہمو تپہ نا خلاف مریرہ ہرا کانود جوڑنگ و پالیسی جوڑ کننگ نا پن آ مخلوق نا وونٹ آتے ہلیرہ، ولے اسمبلی ٹی تینا آسراتی تے کن پالیسی جوڑ کیرہ، اوفتا رکھ اکن کانود جوڑ کیرہ۔ خدل (کردار اسے نا پن ئِ) ہرا وخت کہ ٹھیکیدار تون جنگ لگا، ویل انا ایسری دا اف بلکن ویل انا اصل ایسری دادے کہ مزورک سنت سیوت کرسا ہمو بھلا تپہ ہرا کہ کانود یا پالیسی جوڑ کرسا بھلا تپہ نا حق آتا رکھ ئِ کیک، ولے شیف انا تپہ کن ہچ اس کپک۔ اوفتا زنچک اٹی ہلیر، اوفتے دا ہیت آ امنّا یا مجبور کرفر کہ لس مخلوق نا حق آتے کن گڑاس کیر۔

اسہ ہیت اس داہم ارے کہ فاضل افسانہ نگار تینا خوانوک یا لس مخلوق نا نفسیات و ذہنی کچ انا خیال ئِ تختنے، اگہ تخاکہ تو جوان ئس۔ انتئے کہ اونا کل خوانوک آک منیر حنفی کون ئُ عالم فاضل تو افس کہ ہر افسانہ ئِ خواننگ آن پد ہندا پار کہ دا افسانہ Stream of Cobsciousness نا تیکنیک اٹی نوشتہ کننگانے۔ بلکن اسہ قلم کار اسے نا خوانوک آتے ٹی میٹرک یا اوکان ہم کم مڈل یا پرائمری پاس مریرہ۔ باید ئس کہ اوفتا سرپند مننگ نا Level ئِ ہم مون آ تخنگاکہ۔ تاکہ اوفک آسانی اٹ افسانہ غاتے سرپند مننگ کیر۔