لٹ خانہ 53

منہ وخت آن پد قادربخش نظامانی کراچی آن ننے آ اسہ پُروفارما اس راہی کرے۔ ہرانا چندی کاپیک ئسُر۔ دافتیٹ پارت دا کننگاسس کہ دافتے کوئٹہ نا لس و خاص مخلوق آن دستخط ہلسا پدی راہی کننگے۔ پُروفارما ٹی شہزادہ عبدالکریم و اونا سنگت آک عبدالصمد اچکزئی نا خواست آ کننگاسس ہرافک بھلو وخت اسے آن جیل اٹی بندی ئسُر۔ حالانکہ او مخلوق نا شونداری، آسراتی، جمہوریت و پریس نا آزادی کن جُہد کننگ ئسر۔ دا اوفتا خلاسی کن اسہ دستخطی مہم اس ئس۔

غلام محمد شاہوانی دا بارو اٹ ”نوائے وطن“ اٹی اداریہ اس نوشتہ کرے۔ ای و ڈاکٹر خدائیداد دا پُروفارما غا مخلوق آتا دستخط آتے ہلنگ نا بنائِ کرین۔ اخس کہ ننے آن مسکہ کرین، او دا پُروفارما ئِ پدی کراچی آ مون تسن۔ (دارداٹ سرجم حوال یات آ بننگ اف)

قادربخش نظامانی نا کڑدار، بلوچستان نا راجی سیاست تون بنا غان ہمگرنچ مسنے۔ اوکان پد ننے دا معلومداری مس کہ قادر بخش برصغیر نا بشخنگ آن مُست سندھ وبلوچستان کیمونسٹ پارٹی نا سیکرٹری ہم رہینگانے۔ ارٹمی جہانی جنگ نا دے تیٹ پارٹی پالیسی تون اختلاف تخا۔ او جنگ ئِ السی جنگ اس پارسا پارٹی پالیسی تون اوار متو۔ پارہ کہ پدا پارٹی اونا دا موقف ئِ سہی پاریسس۔ ایہُن بلوچستان نا بابت نظامانی صاحب بلوچستان نا سیاسی راہشون و کارندہ غاتتون اوار داڑے سیاسی جہد اتون اوار ئس۔ یوسف عزیز مگسی، عبدالصمد اچکزئی، محمد حسین عنقا و ولدا غوث بخش بزنجو ہم اوفتتون ہمراہ مس۔ کراچی نا چندی اخبار و صحافتی جہد اٹ نظامانی نا گچین ئُ کڑد اس مسنے۔ دُن کہ او لکھانے و میر بزنجو ہم پاریکہ۔ 1934ءاٹی کیمونسٹ پارٹی نا موکل و سفارش اٹی او کوئٹہ غان نال پدا ایران آ کریم بخش سعیدی نا ہنکین ’راسک‘ آ ہنا۔ اوکان شاید ”سرخس“ کسر آن ایرانی سیم آن ایمون ترکمانستان آن مرسا ماسکو آ ہنا۔ اوڑے سال اسے آن زیات او ماسکو آن خڑک پارٹی نا اسکول اکیڈمی ٹی خوانا۔

ولے نظامانی نا تَب اٹ اخہ در کہ ای سرپند مسٹ جارات الو وتک سُر وتربڑی اس کریکہ۔ زو جوزہ ٹی بسکہ۔ تینا مسخت آخا ہمکار آتےا غصہ کریکہ۔ گڑا انت اس کہ مروسس او بے چیتا مون پہ مون پاریکہ۔ چندی بندغ آک اونا دا تَب اتون اوڑتون سنگتی آ گیگ خنتوسہ۔ خوش آمدی اوڑان متوکہ، نئے دا عمل اودے دوست ئس۔ بھاز ہشار ئس، اسہ دم تون عمل کن راضی مسکہ۔

دلچسپ ئُ ہیت اس ہراتم او روس آ ہننگ ئس تو کوئٹہ ٹی میر شہباز خان نوشیروانی آن اسہ سینکل اس خواہس کہ او ہندا سینکل آ ’نال‘ آ کاہک۔ ہراتم او لندن آن کوئٹہ غا بس تو چندی متکن آ سنگت آتے یات کرسا اوفتتون ملنگ خواہس۔ گیشتری سنگت آک تو دنیا ٹی ساڑی الوس۔ اسٹ اکبرخان اچکزئی تون مِلّا، ہراکہ خان صمد خان نا سیال اسے۔ ایلو اونا شاگرد آتتون ۔

یوسف علی خان نا ادیرہ غا ہنا، پاتیا کرے، و ادیرہ نا ویرانی نا پارہ غا مخلوق نا چکار ئِ ہم کرفے۔ میر شہبازخان نوشیروانی ہراکہ اونا خان صمد خان و یوسف علی خان نا متکن ئُ سنگت اس ئس۔ پدا مسلم لیگ اٹی قائد اعظم تون اوار مس۔ اونا بارو اٹ نظامانی کنے آن سوج کرے۔ اونا معلوم کریٹ تو سما تما کہ او یخ اٹ خاران آ کاہک تو اودے تیٹ کوئٹہ ٹی ساڑی اَلو، خاران کن ہناسس، ہراتم ملا تو اودے قادربخش نا بارو اٹ پاریٹ۔ بھاز ارمانی مس کہ خنتوٹ تے۔ ولدا مخا او ہندا سینکل والا کِسہ ئِ کرے کہ نظامانی کنے آن نال آ ہننگ کن سینکل اس خواہس، انتئے کہ اودے تیٹ بلوچستان اٹی سواری/ ٹرانسپورٹ نا ہچ ئُ وسیلہ اس الو۔ بیدس ساہدار تیان۔ نظامانی ہم ہُچ اسے آ بلوچستان نا دے ٹکی سیم اسکان روس انا سفر کن ہنا۔

(ماہتاک”سنگت“کوئٹہ، جنوری1999ء)

29

کراچی ٹی ورنائی نا دے تے ٹی اسہ فوٹو اس ہلکوسٹ ہراٹی قادربخش نظامانی، میر بزنجو و کریم سعیدی (پدا او حاجی اس مس) ہر مُسٹ انگاک اوار اُن۔ اونا اُرا ٹی دا فوٹو ہُرے اسکان خلوک ئس۔

قادر بخش نظامانی صاحب ہر دور اٹ بلوچستان نا سیاسی جہد اٹ بشخ ہلک، ولے ہر وار بلوچستان نا سیاستدانک نئے بیرہ اوڑتون رُوردائی وبے وفائی کریر، بلکن اونا کڑدارکُشی ئِ ہم کریر۔

برصغیر نا ونڈ مننگ نا وخت آ بلوچستان شورش آن پد شہزادہ عبدالکریم خان بغاوت نا پڑو کرے، ہرانا ذکر ئِ ای سرجمی اٹ مہالوکرینُٹ۔ ہمودے تیٹ قادربخش نظامانی صاحب سندھ ہاری پارٹی نا پنی آ سروک خواجہ مولانا عزیزاللہ جتوئی ومحمد حسین عنقانا سنگتی ٹی شہزادہ کریم نا کیمپ آ ہنار۔ اوفک تینا پن تے بدل کریسُر۔

سعید دہوار و قادر بخش نظامانی صاحب اس تے اوغان گورنمنٹ تون ہیت وگپ کن شہزادہ عبدالکریم خان نا ایلچی (قاصد/سفیر) ناحیثیت اٹی اوغانستان آراہی کننگاسس۔ جتوئی تو پدی سندھ آ ہناسس، دا واقعہ نا سرجم ئِ میرعبدالواحد کرد تینا یادداشت آتیٹ نوشتہ کریسس، ہرا داسکان شینک متنے۔ ہراتم ملک سعید دہوار و نظامانی اسک پدی اوغانستان آن دانگ بسر تو نئے کیمپ ئس نئے باغیک۔ اوفتے ہربوئی قلات آن خڑک دزگیر کننگاسس۔

بلوچستان نا دَنگ آن دامون مرسا ملک سعید ہم دزگیر کننگا تو ہندا وخت آ اونا توارتوار کوک وپاڑو آن تارمئی نا فائدہ ئِ ہرفسا نظامانی تینے اوکان کشاسس۔ پدا سندھ آ رسیفیسس تینے۔ ہراتم دافتیا بغاوت نا کیس چَلینگا، تونظامانی نا درک متو۔ او ڈکوک ئس۔ وس کریر، ولے کس ئِ دو بتو۔ وخت اس کہ مقدمہ چُٹّا کل انا سزاک پورو مسُر گڑا نظامانی پدا منظرِ عام آ بس۔ شک انا بنداو آ ہچ خبر تمتو کہ اودے انت اکن دزگیر کننگا۔ منہ تُو کن اودے سکھر جیل اٹی بندی کننگا، اناگتی ملک سعید دہوار ہم ہمو جیل اٹی بندی ئس۔

اسہ وڑ اسے ٹی قادربخش نظامانی کنا نظریاتی اُستاد ئس۔ کنا ذہن سازی ٹی اونا بھلو کمکاری اسے۔ ہندا وڑ انا ہیت و خیال آک میر غوث بخش بزنجو نا ہم نظامانی صاحب نا بارو اٹی ئسر۔

نظامانی صاحب نا ہیت آتیان لگاکہ کہ او بلوچستان نا عظیم انگا سیاسی، فکری، راہشون ہراکہ داڑے راجی سیاست نا بنداو ئِ تخا، نواب یوسف عزیزمگسی نا اولیکو سنگت آتیان مسنے۔

ولے دا ہیت ئِ گیشتری بلوچ سیاسی راہشون و کارندہ غاک امنا کیرہ کہ میر عبدالعزیز کرد راجی سیاست نا مہکش و مہاڑو ئِ۔ ہراکہ کل آن مُست مستونگ اٹی سیاسی شعور تخوک آ ملازم آتا ڈکوک ئُ تحریک اس ”اتحادِ بلوچاں“ نا پن اٹی بنا کرے۔ ولدا میر یوسف علی خان مگسی ہراتم لاہور نا روزنامہ سے ٹی ”فریادِ بلوچستان“ نا سرحال آ نوشت اسے نا شینکاری نا ڈوہ اٹی سڑدار تا جرگہ سے نا فیصلہ نا رند اٹ اسہ سال قید ودہ ہزار روپئی جرمانہ مرسا مستونگ جیل اٹی بندی کننگا تو داڑے عبدالعزیز کرد اونا سنگت آک ملک فیض محمد، عبدالکریم شورش (امن) و ایلوفک یوسف عزیزمگسی تون جوانیکا حالی حوالی مَسُر۔