پوریا

سہب سہاری اُرا غان موکل کرسا دفتر نا کنڈ آ راہی روان ئسٹ اُرا غان پیشن مرسا پیش تمنگ نا دعا تے خواناٹہ، تین تون اختئی آ جون اتون دفتر نا سوچ و خیال اٹ کاریم تا گمان اٹ روان ئسٹ۔ تسبیح نا ٹک ٹک ایکان وار اس پچ آتے ہُراٹہ، وار اس جیب ءِ دو خلکٹہ کہ جیب انا گڑاک کل اریر یا افس؟ ہندا سوج و خیال اٹ کنا سفر ہنسا ہنا۔ دفتر ءِ خڑک کریٹ کہ اسہ کنڈ آن توار اس کنا خف تیا تما۔ ہر دا بابو صاحب ءِ امر استری پیری کیک۔ برے اسہ دے اس ننا کنڈ آ چار بیلچہ خلے گڑا ای ارفوہ ایان تے کہ استری پچ اتون پیری امر مریک۔ مون ءِ ہڑساٹ کہ اسہ وار پاو تے کہ کنے بابو مگہ نی جوڑ کرینس کے دن ہیت بنفسہ۔ ولدان ہُراٹ اِلے تے، دے سہب سبائے مڑدان دافتا بوز اٹ لگے۔ دفتر ءِ سر مرسا دفتر نا درگہ غان مونی ہناٹ تینا کمرہ ٹی پیہاٹ تولنگ تون کنے چپڑاسی دیر تس، پارے صاحب چا تے ہراتم کیو؟ ای پاریٹ چا تے الے، اول کنے دا پا دا ہیت انا مطلب انت ءِ کہ کنے کسر اٹ اسہ بندغ اس خنا و پارے ہُر دا بابو صاحب ءِ امر استری پیری کیک۔ برے اسہ دے اس ننا کنڈ آ چار بیلچہ خلے گڑا ای ارفوہ ایان تے کہ استری پچ اتون پیری امر مریک؟ اخر کن تون اوفتا انت کست اسے؟ او دا ہیت ءِ کنے انتئے پارے؟

چپڑاسی پارے ”بابو صاحب اوفتا ہم قصور اف، مچ آ دے او مزوری تون لگوگ ءُ۔ ولدان سہب انا پاس آ او کل مزدور چوک آ تولوک تینا پوریا نا انتظار ءِ کیرہ، وخت اس ملک تا وخت اس ملپک تا، پاش ءُ ہیت اسے کہ اوفتیٹی ہندن ءُ بندغ ہم ارے کہ اسکول کالج نا خوانوک ءُ۔ ولے نوکری اف تا۔“

کنے پہہ کرسا او تینا ہیت آتے کرے۔ ہنداڑتون توار اس بس، او چپڑاسی۔ تو چپڑاسی زو اس رم کرے، ”جی صاحب بسٹ حکم کبو۔“

صاحب نا مون پروک تولوک ءِ کڑسی آ ہندن جوکہ ءِ کہ کس دادے لٹ تسنے راہی کرینے۔

”نے سما اف کنے اٹ منٹ مس ای بسنٹ نا درک اف، دیر اس اتہ کن کن۔“ چپڑاسی رم کرسا ہنا دیر اس ایس تس تے۔ ولدان پارے کہ صاحب ”چا ہراتم کنیرے؟“ صاحب مون ءِ خرن پوشکن کرسا پارے ”مگہ نن اراٹی چا کنپنہ کہ نی بننگ تون چا انا ارفسہ؟“ چپڑاسی بیوسی اٹ پارے ”نہ صاحب کنا است خواہک کہ ای ہم نم کن زیبا ءُ چا اس بیٹ کیو کہ نم کنسا تینا کاریم تے کبو۔“ صاحب نا خوشامد ءِ کرسا اونا مون ءِ خرن پوشکنی آن ہڑسا۔

”سہی سہی داسہ ہن ہراتم پاریٹ نے گڑا چا تے اتیس۔“ چپڑاسی جی اؤ صاحب پارسا دفتر نا درخت نا سیخا ٹی توس کڑسی آ جوکہ کرسا کڑسی ءِ پدی مونی کریکہ، دُن کہ دفتر نا بھلا صاحب ہندا ئس۔

ہمو درخت نا سیخا ٹی تولوک چپڑاسی ءِ دفتر نا گیٹ آن پیشن ہنوک ءُ کسری اس خنا و تینا سنگت ءِ پارے ”ڈیوٹی ڈیوٹی مریک، بابو نا مرے یا چپڑاسی نا۔ کڑسی نا مزہ ءِ ہڑتوم آک ہلیرہ۔ ابوئے دا بیوس آتے کن کہ دے آ باسن آ کاریم کیرہ۔ سیخا نا مون ءِ خنپسہ۔ خید اٹ چُڑوک ءُ۔ بارن آ ارغ ءِ چا اٹ کنیرہ۔ خوانوک ہم اریر۔“ ہندن آڑسندہ کشسا پارے ”دعا کر اللہ دافتے کن ہم کسر اس ملے۔ و دا ہم ہندن زند انا چس ءِ ہلیر۔“

ہفتئی تلار
تاک: 29
13-07 اگست 2021ء
پنہ: 05