قدرتی گیس اکن پنی ڈیرہ بگٹی نا سفر (04)

دا نم بیرہ داڑسکان پہہ مبو۔ پی پی ایل آن ہم زیات بھلن میراث تخوک آ کمپنیک ہم نمے ہندا ڈیرہ بگٹی ٹی ملرہ۔ فرق دادے کہ دانا کاریمک نمے سوئی ٹی آخا بلکن ڈیرہ بگٹی تحصیل اٹی نظر بننگ بنا مریرہ۔

”پیر کوہ“، ”زین کوہ“ و ”لوٹی“ نا جاگہ غاتیان گیس انا بھلو خزانہ کشنگ ہندا کمپنی ناکاریم ءِ۔ ہرانا پن OGDCL آئل اینڈ گیس ڈیویلپمنٹ کمپنی لمیٹڈ ءِ۔ حکومت تون دا کمپنی نا ہم 74 درسد شریکی ارے۔

اینو نا سیل و آزموندہ غاک ہنداخس۔ نم دافتے پہہ مننگ نا کوشست کبو۔ و ای داسہ سہب انا نماز ءِ خوانوہ۔ بروک آ معلومداریک لس وڑ انا مرور ہندا سوب آن نمے خواننگ و پہہ مننگ اٹی خواری مفرو۔

داسہ دا مچ آ ندارہ غان پد نم گڑاس غلط پہہ مَفیرے، ہندا سوب آن جوان ءِ کہ ای نمے تینٹ پاو کہ دا ضلع نا آبادی ءِ داسکان گیس تننگ تنے۔ ہمو گیس ہرا اسلام آباد اسکان کاہک۔ داڑان دا جاگہ نا جئی آ مخلوق بے بشخ ءِ۔

سوئی ٹی ہرا آبادی ءِ گیس تننگانے او پریشر مفننگ نا سوب آن ہچ ءُ کاریم اسے نا اف۔ ای تینٹ سوئی ٹی گیس مین لائن نا خڑک آ ہُچ آتیا پاٹ سودا کروک ءُ خناٹ۔ جئی آ آبادی 900 روپئی ترسا دا پاٹ تے ہلیک۔ مچ آ پاکستان نا دیگ دان آتے گیس فراوان کروک آ ضلع نا آبادی تینٹ تینا دیگ دان تے کن فریشان ءِ۔ جئی آ آبادی ءِ گیس تفننگ نا ہرا سوب آک مننگ کیرہ دا بارواٹ ای بھاز جُست و پُرس کریٹ کنے دا نا بھلا سوب سیاسی حالیت آتیان بیدس پین ہچ اس نظر بتو۔

ای انتئے کہ اِرا دے انا دورہ غا ڈیرہ بگٹی آ ہناسٹ دا وھیل چیئر بشخنگ پروگرام اٹی اوار مروئی ئس و مسٹ و بشخ ہلوک آتے گڑاس جوان ءُ سلاہ و سوج ہم تسٹ۔

15 جولائی آ کوئٹہ غان راہی مننگ تون مولانا عبدالحق ہاشمی صاحب و مولانا ہدایت الرحمان صاحب (امیر و سیکرٹری صوبہ جماعت اسلامی بلوچستان) ءِ وٹس ایپ وائس کلہو کریٹ کہ اگہ ڈیرہ بگٹی ٹی جماعت نا کاریم اس مرے کنے پاننگ کیرے۔ داکان بیدس میاں محمد عبدالشکور صاحب و شاہد اقبال صاحب (صدر و سیکرٹری جنرل الخدمت فاؤنڈیشن پاکستان) نا خاص آ پنت و شون آک ملار ہرافتیان بروک آ ارا دے گدرینگار۔

16 جولائی 2020ء سہب اتون 10 بجہ غا 17 بندغ ءِ وھیل چیئر تروئی ئس۔ دا مچ بندغ آتے پروگرام اٹی اوار کروئی ئس۔ داڑان بیدس سوئی شار انا میر و متبر آتے ہم دعوت تننگاسس۔ پروگرام اٹی اسٹیج آ ہرا مہمانک تولوک ئسر اوفتیٹی بلوچستان عوامی پارٹی نا ضلعی صدر جمال خان کلپر، ڈی پی او خالد بزدار، اسسٹنٹ کمشنر آفس آن عبدالمجید، مولانا بایزید بگٹی، خاوند بخش، تحصیل امیر جماعت اسلامی میر احمد بگٹی و دوست محمد بگٹی صاحب اوار ئسر۔ مچ آ شرفدار مہمانک الخدمت ڈیرہ بگٹی نا بھاز ستاءِ کریر۔ و پروگرام وڑا تا۔ و تینا پارہ غان ہر وڑ انا کمک نا باور ہم کرفیر۔ جمال خان کلپر صاحب اسٹیج آ کن تون اوار تولوک ئس۔ اودے ای پروگرام نا نیام اٹی خواست کریٹ کہ نی دن کہ بلوچستان عوامی پارٹی ٹی اُس و نما پارٹی نا بلوچستان اٹی حکومت ہم ارے ہندا سوب آن سوئی شار اکن نم کل اواری اٹ کوشست کبو۔ ہراڑا او اؤ ٹی ورندی تس۔ اسٹیج آن ای تینا ہیت و گپ اٹی اسہ عملی ءُ ہیت اس ہم کریٹ کہ ننا مچ آ شار تے ہندن پد تموک تخنگانے۔ داسہ مچ آ زند برانز کرسا گدریفوئی مریک یا تینا کچ انا کاریم تے کروئی مریک۔ گڑاس خیر بشخوئی مریک۔ گڑا ننا ہزار آویل آک مرمرور۔ نن اواری اٹ دافتے ایسر کننگ کینہ۔ دا مچ آ ہیت آک اُست آن ئسر ہندا سوب آن کل آدافتا بھاز اثر مس۔ پروگرام نا گڈ سر اٹی شرفدار مہمان تے الخدمت فاؤنڈیشن بلوچستان نا کارکڑد رپورٹ و گڑاس دینی کتاب ہم بشخان تسن، کل موکل کننگ آن مُست کنے تینا اُرا تیا بننگ نا سلہ خلکر۔ ای دوست محمد بگٹی صاحب نا جوڑ کروک آ لڑ و بند نا پابند ئسٹ ہندا سوب آن ہچ ءُ جاگہ اس ہننگ کن امنا کتوٹ۔

دینی آ کتاب آتے دوئی کننگ نا وخت آ حوالکاری بشخ آن تعلقداری تخوک آ اِرا ہندن ءُ سنگت ہم اوار ئسر ہرافتیان اسٹ نا پن نواز شریف و ارٹمیکو نا پن عمران خان ئس۔

ہراتم نواز شریف صاحب کنے آن تینا کتاب ءِ ہلنگ کن بس تو ای اودے پاریٹ ”نی تینے وزیراعظم عمران خان آن بچفس“ ہراتم ای دا ہیت ءِ کریٹ تو کنے اسُل گمان الو کہ بروک آ بندغ عمران خان ءِ، ہرا تینا کتاب ءِ دوئی کننگ کن بریک۔ ہراتم عمران خان صاحب کنا خڑک آ بس تو دا اتفاق آ حیران ہم مسٹ، و اودے ہم ای پاریٹ ”نی ڈیرہ بگٹی اسکان نواز شریف صاحب نا رند اٹ بسنس۔ ہراڑا خڑک آ تولوک آک ٹاکو اس خلکر و اسٹ اس توار خلسا پارے کہ ”سر داڑے تو شہباز شریف پنی ءُ بندغ ہم ارے۔“ ہراڑا کنے ہم مخنگ ہلک و ای ہم ٹاکو اس خلکٹ کہ پاکستان نا سیاست نا بھلا حریف آک سوئی شار اٹی بسنو۔

باسُنی نا تو نُم تون وختی ہیت مس، پروگرام نا وخت آ ٹینٹ آک ہر پارہ غان تہو ءِ بند کریسر۔ ہندا سوب آن نن خید اٹی چڑان۔ ہندن کہ پروگرام چٹا تو نن ٹینٹ آتیان پیش تمان۔ مہمان تے اسٹ اسٹ آ موکل کرین۔ و تینٹ وتاخ نا برانڈہ ٹی بسن و اوڑے کٹ آتیا توسن۔ بجلی اَلو ہندا سوب آن سیخا تیٹی وخت گدریفین۔ نن اسٹ ایلوڑتون ہیت و گپ کننگ اٹی ئسن کہ پیشیم نا نماز نا وخت خڑک تما۔ سنگت آک نماز کن تیاری کریر۔ و داڑے ای و خاوند بخش صاحب تینا کٹ آتیا مچے لیٹان۔ لیٹنگ انت ئس کہ نن تنگان ہنان۔ ہراتم کنا خنک ملنگار تو آذان مسوسس۔ مخلوق نماز ہم خواناسس۔ و داسہ بیرہ گڈیکو بندغ آک مسیت آن پیش تمنگ اٹی ئسر۔ ای خاوند بخش صاحب ءِ ٹوہاٹ بش کریٹ و نماز نا تیاری ءِ کرین۔ نماز خوانان تو مولانا بایزید بگٹی صاحب مسیت و مدرسہ نا خڑک آ تینا اُراغاننے درے۔ نن تون گڑاس جئی ءُ بندغ ہم اوار ئسر۔ ہرافتیٹی شہید امان اللہ بگٹی صاحب نا مار سیف اللہ ہم اوار ئس۔ سیف اللہ تون کنا اولیکو ملاقات ئس۔ او اسلام آباد نا اسہ یونیورسٹی اسیٹی خواننگ اٹی ءِ۔

ہراتم نن مولانا بایزید بگٹی صاحب نا اُراٹی پیہان تو گمان مس کہ ننے نیمروچ نا اِرغ کن داڑے اتنگانے۔ انتئے کہ بست و بند بایزید بگٹی صاحب جوان کریسس۔ بھاز گچین ءُ دعوت اس ئس۔ ارغ تون اوار گڑاس میوہ ہم تخنگاسس۔ نن جوان کنگن و پڈ ءِ پُر کرین۔ ارغ آن پد مولانا بایزید صاحب موکل خواہس و تینا عارضی آ اُرا مدرسہ غا ہنا۔

ننا بروک آ مزل ڈیرہ بگٹی ضلع نا تحصیل ہیڈ کوارٹر ئس۔ و ننے وخت آ اوڑے سر مروئی ئس۔ ہراڑے مولانا مجیب الرحمن بگٹی صاحب الخدمت نا سنگت آتتون نن کن انتظاری ئس۔ ڈیرہ بگٹی شار اکن راہی مننگ آن مُست کنا ساڑی مننگ نا ڈس ننا یونیورسٹی نا اسہ کماش ءُ سنگت اس انجینئر نواز بگٹی صاحب ءِ مسوسس۔ او رابطہ کرے۔ ہراتینٹ توسوئی شار اٹی الو ولے اونا ضد ئس کہ نن اونا اُراغا ضرور کان۔

ہزار منت کرین ولے بگٹی تا ضد انا مون آ بندغ بے وس مریک۔

نواز بگٹی نا چنکا ایلم ننے دننگ کن بسوسس۔ نن دا شڑت آ ہننگ کن راضی مسن کہ اوڑے نن بیرہ اسہ پیالہ اس چا کینہ و مون آ راہی مرینہ۔

دہ منٹ اٹی نن نواز بگٹی نا اُراٹی ئسن۔ اوڑے اونا باوہ محترم تون ملاقات مس۔ جوان ءُ گپ شپ اس مس۔ اوفک ننا شڑت انا برخلاف بھلو بست و بند کریسر۔ ہندا سوب آن اوکان پیش تمنگ اٹی وخت لگا۔ تینا شرفدار آ مہماندار آتا منت ءِ ہرفین و ڈیرہ بگٹی نا ایلو تحصیل کن راہی مسن۔

سرور بگٹی صاحب (صدر الخدمت سوئی) تینا گاڈی ءِ تینٹ چلیفنگ اٹی ئس۔ بھلو گچین ءُ انسان اسے۔ دوست محمد بگٹی صاحب اوڑتون مون انا سیٹ و ای و خاوند بخش صاحب پد انا سیٹ آ ئسن۔ گاڈی بروک آ مزل کن راہی مس۔ و مچٹ ءُ وخت اسے ٹی شارآن پیش تمان و گچین آ دامان تیٹی سر مسن۔ اصل اٹ سڑک نا ہڑتوم آ پارہ غا ویرانہ ئس۔

بلوچستان نا مُچ آ شار تا ہندا حالیت ءِ۔ پاننگ کن تو دا شار پاننگرہ ولے شار تیٹی ہرا آسراتیک مریرہ اوفک ننا بلوچستان نا شار تیٹی افس۔ ہرا علاقہ ٹی کُننگ نا دیر مف…… ہراڑے ناجوڑ آتیکن دارو درمان نا آسراتی (ہسپتال) مف…… ہراڑے مار و مسن تیکن خواننگ نا جوان ءُ تعلیمی ادارہ مف۔ ہراڑے دیر و اِرغ کن بجلی و گیس مف او امر شار پاننگ مریرہ……؟ و ہندا مچ آ شار تا حال و حقیقت ءِ۔ اسہ کلو میٹر اس ہرانگ کہ سفر کیس تو شار آنبار ءُ ہچ ءُ نشان اس خننگپک۔ ہنداڑا افسوز بھاز مریک۔ حکومتی اختیاردار و داڑے کرن آتیان رہینگوک آ ہزگار آک ہم دا ردا ٹ خیال کتنو۔

خیر نن انتئے کہ سوئی شار انا ہَد و اویل آن گدرینگ انگ اٹی ئسن۔ و داڑے سخت باسنی ئس۔ ولے امر کہ نن ڈیرہ بگٹی نا پارہ غا ہننگ اٹی ئسن۔ موسم بدل مرسا ئس۔ سوئی شار آن ڈیرہ بگٹی 50 کلومیٹر یا گڑاس زیات مرو۔ کسر جوان و بھاز زبیدار ئس۔ سڑک نا ہڑتوم آ پارہ غان ڈغار آوار ئس۔ جاگہ جاگہ چنکو مش و اوفتیا درخت، بئے و بوچ تِرک کریسس۔ مش تا رنگ ہم زیبدار ئس۔ اللہ نا قدرت ننا خن تا مون آ ئس۔ دا ندارہ غاتے سیل کرین و خوش مسن۔ ہنداڑتون ایف سی نا چیک پوسٹ بس۔ ہندن کہ ضلع صحبت پور آن سوئی اسکان چار چیک پوسٹ ئسر۔ ہنداخس داڑے ہم ئسر۔ ہر چیک پوسٹ آ ڈیور ءِ گاڈی آن دڑنگ، کاغد آتے نشان تننگ و تینا و سواری تا چاہنداری کرفنگ ئس۔ دا کسر تیا سفر کننگ آ داگڑا المی جوڑ مسنے۔

انتئے کہ بلوچستان اٹی ایف سی نا کارندہ غاک خیبر پختونخواہ صوبہ غان ءُ۔ ہندا سوب آن اوفک تینا ڈیوٹی نا وخت آ نئے کس انا پرواہ ءِ کیرہ نئے کس انا لحاظ ءِ۔ کلاک یا سوا کلاک نا سفر آن پد نن ڈیرہ بگٹی نا ہَد و اویل اٹی سر مسن۔ و داڑے گڈیکو چیک پوسٹ آ زیات سلوئی تما۔ کنا خیال اٹی ڈیرہ بگٹی نا شار اسُل جتا مرو۔ ولے داڑے اولیکو وار سر مننگ تون کنا ہمو خیال آک غلط مسر۔ ہرا سال آتیان کنا مزغ اٹی ئسر۔ شار اٹی پترینگوک آ چیک پوسٹ آ سلنگ ناوخت آ راستیکو پارہ غااسہ بھلو مش اس خننگا، ہرا بھاز مُر اسکان ہناکہ۔ داکان سڑک ہم مچے بھلن ئس۔ ہڑتوم آ پارہ غا درخت ہم ئس۔ ولے اسٹ اس اسُل ننا مون آ بھاز بھلن ئس۔ عجب لگاکہ۔ دا مش انا خننگ تون جوزہ غاک گیشتر مرسا کریر۔ داڑان است ءِ سیبو ملا۔ دانا عجب ءُ ندارہ اس ئس۔ دن کہ بندغ آجادو کے۔

ہفتئی تلار

تاک: 29

13-07 اگست 2021ء

پنہ: 04