دا امر ءُ چیہانٹ اسے

دیک بدلینگ انگ ءُ۔ سال آک بدل مسر۔ وخت ہم تینا دروشم ءِ بدلیفسا مون مستی گام خلنگ ءِ۔ انسان نا حالیت اسہ رنگ آن ایلو رنگ اٹ بس۔ زند سخت انگا حالیت آن آسودہی ٹی گام تخا۔ زند اول تینا جون آن کاریم ہلسا زند ءِ مونی دھکہ ترسا کریکہ، ولے داسہ مشین تیان کاریم ہلسا ایشکامی اٹ زند ءِ تیر کننگ ءِ۔ اول چنکا ناجوڑی نا سوب آن ملخموت نا دو آن موت انا گواچی مسکہ، ولے داسہ سخت انگا ناجوڑی ہم درمان مننگ ءِ۔ اول خلق و شار و ملک آتے پند اٹ مزل کرسا لنگڑ ملاسی سختی و سوری تیٹی کیہی تُو و سال آک لگارہ، ولے داسہ تو چنکو ساہت اسیٹی علاقہ غاتا علاقہ غاتے سر مننگ کیسہ۔ داسہ انسان شون ہلکنے۔ زند انا تدیفنگ نا ڈول آک جتا مسنو۔ آسراتیک انسان ءِ ہر جاگہ پلویڑ کرینو۔ دے پہ دے آن آسودہیک ودنگ ءُ۔ داسہ خواننگ ہم زیات مسنے۔ چنا چنا داسہ کتاب آن واخب ءِ۔ ہر اُراٹی داسہ خوانندہ ءُ بندغ دُو بریک۔ داسہ مخلوق اٹ پُہی، چاہنداری، سمجھ و شعور ہم ودانے۔ ہر اسٹ تینے پہہ مریک۔ ہر اسٹ خلق و شار تا حال آتیان واخب ءِ۔ ہر اسٹ ءِ سما ءِ کہ اونا چپ و چاگڑد اٹ انت مننگ ءِ، انت اسے کن مننگ ءِ، دیر دا وڑ حالیت ءِ جوڑ کننگ ءِ۔

داخہ شون ہلنگ، آسودہی دوئی کننگ، زند اٹ بدلی تا بننگ، علم دوئی کننگ، پہی چاہنداری نا ودنگ آن بیدس ہم دنّا توار است ءِ کپ کننگ ءِ۔ دا دنّا چیہانٹ ءِ کل مخلوق ءِ فریشان کرینے۔ دا دیر اسے۔ انت مسنے تے۔ انت اسے کن پراد کننگ ءِ؟ دیر ءِ تینا فریشانی و ڈکھ آتے نشان تننگ ءِ۔ دیر آن کمک خواہنگ ءِ۔ اخر دا دیر اسے دن است انا پُر آ چیہانٹ کننگ ءِ۔ وار اس دے ٹکی آ ہرک چیہانٹ کیک تو وار اس دے کیہلنگ آ خن تے خلیک ہوغک۔ دا امر ءُ بندغ اسے ہراکان بسنے دن پراد کننگ ءِ۔ نئے کس اونا گور آ کاہک نئے کہ کس اودے حوال کیک؟

دا اسہ زالبول اسے۔ کیہی دے تا بے تغی آن خنک تے خیسن مسنو۔ ہندن ءُ ڈکھیائی سے نا گواچی مسنے کہ نئے ارغ اس کننگ کیک نئے کہ دِیر انا پُڑی اس کیدنگ کیک۔ بس بڑزا آسمان ءِ ہرک چیہانٹ کیک۔ دن ءُ فریشانی کہ مون نا تے رنگ ءِ ہم بدلیفینے۔ جون نا تے سیک ہم خلاس مسنے۔۔۔۔ بس تولوک ہوغک۔۔۔۔۔ چیہانٹ کیک

نت شپاد، کاٹم آ متکن ءُ گُد اس شاغوک لاغر آ دو تے بڑزا کرسا پاننگ ءِ کنا مار ءِ اتبو…… کنا چغر نا ٹکر ءِ ظالم آتیان اتبو…… ذاکر جان کنا زند ءِ…… کنا مڷ ءِ…… کنا ذاکر جان ءِ دروک آتا دوتیان کشبو اتبو…… ای یانزدہ سال نا سے بے تُغ اُٹ…… ای یانزدہ سال نا ءِ بے قرار اُٹ…… فریشان اُٹ…… کنا مچ زند ہندا ڈکھ اٹ تدینگ انگ ءِ…… کنا زند انا ہر ساہت کن کن سکرات ءِ…… کنے دا سختی سوری تیان بچفبو…… کنا ذاکر جان ءِ کنے آ سر کبو۔

ہفتئی تلار
تاک: 10
12-06 فروری 2021ء
پنہ: 03