نادر قمبرانی نا رند اٹ اکبر بارکزئی ہم ایوارڈ ہلتو 1

 وخت و حالیت اسہ جتا ءُ سر اسے ٹی رُم کیک، وخت و حالیت رم کروک آ وڑ اٹ بھاز گڑا بدل کننگ نا بود تخک۔ چندی بدلی تا رہی آن گدرینگسا چنکا چنکا انسان تے بھاز بھلو بندغ، وخت وخت اس بھلا بھلا بندغ آتے چنک کیک۔ ہراتم پلو ءِ چنڈا، ہراتم پالو ءِ بدل کرے، ہموتم وخت و حالیت نا وڑ اٹ پوسکن ءُ وڑ اسے ٹی پوسکن ءُ گڑا اس ودی کیک۔ ہندن انسان نا زند اٹ پوسکن آ کسر تا گچین کاری نا وخت آ بندغ ءِ بے وس کیک۔ وخت وخت اس اسہ دیو آنبار ءُ چک اسے نا رنگ اٹ بندغ ءِ تینا چانپول اٹی ہرفک، بے چرت بال کیک۔ ہندن بندغ بے وس مرسا اوڑتون اوار بال کننگ ءِ بنا کیک۔ دنیا نا مون آ وخت انا شِل انگا زیل والا پنجہ سخت توروک آ بندغ ءِ پاش وڑ اٹ گٹو کننگ آ خننگک۔ ولے ہمو دڑد ہمو خڷ بندغ ءِ سوگو و بے مٹ مننگ اٹ کمک ایتک۔ وخت قوم تا تاریخ ءِ شیف بڑز کننگ نا حالیت ودی کیک۔ ولے زندہ انگا قوم آتیٹی بے مٹ آ کماش آک ہمت کروک آ نظریاتی ورکر آک حالیت نا لوڑ و دنز اٹ جلونٹ کننگ، مون اٹ لوڑ و دنز انا مون ءِ ہڑسنگ کن بے مٹ ءُ فیصلہ کیرہ۔ دنیا ٹی اینو بھاز آ قومک حالیت و وخت انا بے رحم آ کاٹار نا مون اٹ سلنگ کپسہ۔ نئے اوڑتون رم کننگ کیرہ۔ ہندا وڑ اٹ کس اس تینا زبان، کس اس قوم اتون، کس اس تینا باوہ پیرہ ئی آ ڈغار ءِ مش اٹی کورنگے، ولے ننا مون اٹ ڈغار تون اوار تینا شناخت و نسل ءِ بچفنگ نا بندوی ویل آک اسہ نہار اس آخا بلکن چندی نہار تا رنگ اٹ با پٹوک ویل اتون اوار سلوک ءُ۔ ننا انت اس کہ ارے ننا اف، ولے ننا وطن اٹ ہندن ءُ سیاسی و قبائلی و ادبی ءُ کماش ارے، ہرا تینا وطن تون لیلیٰ غانبار عشق کرینو۔ وطن نا زیبائی کن تینا زند ءِ ستی و ستی گری ٹی اسہ رینگڑ اسے ٹی گدریفینو۔ اونا عشق اٹ پاہو نا چٹ ءِ ہم خن تیا تخانو۔ عشقیہ داستان تیٹی مدام اسہ کڑد اسے نا حوالہ تننگک، ہرا کہ ہر وڑ اٹ عشق ءِ بے سہب و نامراد کننگ کن اسہ نہ اسہ منفی ءُ سوچ اسے تون کل داستان اٹ ہر کنج اٹ ہر پاناد آ تل ودی کننگ کن روایت آتے پرغسا بج آن جلہو کیک۔ ہانی و شے مرید نا داستان مرے یا شیریں فرہاد نا مہر آن پر انگا کسہ، بیبگر و گراناز مرے، دوستین و شیرین یا لیلیٰ و مجنون، سردار خان محمد زرک زئی مرے یا بابو نوروز، نورا مینگل و علی دوست مریر یا اینو نا اکبر و بالاچ۔ ادبی کماش آتیٹی ایماندار پروفیسر نادر قمبرانی مرے یا کہ صبا دشتیاری۔ براہوئی و بلوچی ادب اٹ اسہ نہ اسہ رنگ اسے ٹی دا سوچ انا تاریخی کڑدار آتے عشق و مہر انا مون اٹ جوان کننگ نا درس اٹ تدریس نا اسہ گچین ءُ رنگ اس گروشک ایتک۔ بھاز جاگہ منفی سوچ ہندا گروشک تروک آ رنگ ءِ بے چس کننگ کن ربڑ اٹ ڈکنگ نا کوشست ہم کیک، دا ننا تاریخ نا بشخ آک ءُ، ننا تاریخ اٹ نم خنرے جاگہ اس میر چاکر رند ءِ سازش آتا جال اٹ گنڈنگک، تو جاگہ اس اسہ بلہ اس لٹ بند کرسا مش تا ٹول آ سر مننگ تون شیرین فرہاد نا اُست انا نیام اٹ کاٹار اس غُت ایتک۔ ہراتم کنے عشق انا دا داستان تینا فکر کننگ نا کمک دو بریک تو ای ہندا نتیجہ غا سر مریوہ کہ اگہ میر چاکر نا سازش متوکہ تو ہانی و شے مرید نا داستان امر پنی مسکہ؟ فرنگی تا لشکر کشی متوکہ تو شیرین فرہاد ءِ دیر چاہسکہ؟ اگہ عئیدو متوکہ تو سرحدی چھاپہ مار آتا داستان آ دیر نوشتہ کریکہ۔ مننگ کیک ہندا تاریخی آ راستکی ءِ ہندا منفی کڑدار آتا منفی کڑد مون آ بتوکہ تو دا جہان نا بے مٹ آ رنگ آک جہان نا مون آ تالان متوسہ۔ اینو راج اٹ اخس کہ قومی، مذہبی، عشقیہ کڑدار آتا کڑد ٹل و پل ءِ، ہندا منفی کڑد والا خواجہ غاتا منفی سوچ انا سوب آن ءِ۔

ہفتئی تلار

22-28 August 2020

تاک: 33

پنہ : 3